သျှမ်းပြည် မူဆယ်ခရိုင် ကွတ်ခိုင်မြို့နယ်အတွင်း ရှမ်းပြည် တိုးတက်ရေးပါတီ၊ ရှမ်းပြည် တပ်မတော် (SSPP/SSA) နှင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တို့ အချင်းချင်းကြား ထိတွေ့တိုက်ပွဲ ဖြစ်ပွားခဲ့ကြောင်း သတင်းရရှိသည်။
ယမန်နေ့ (စက်တင်ဘာလ ၂၃ )ရက် မွန်းလွဲပိုင်း ၁ နာရီ ဝန်းကျင်မှ စတင်ကာ ကွတ်ခိုင်မြို့နယ်၊ မိုင်းယု ကျေးရွာအုပ်စု၊ ဖာပျဥ်ကျေးရွာအနီး (ဝၢၼ်ႈၽႃပႅၼ်ႈ) ၌ SSPP/SSA ကို TNLA တပ်ဖွဲ့မှ စတင်ပစ်ခတ် ခဲ့ခြင်းဖြစ်ကြောင်း SSPP/SSA မြေပြင် အရာရှိ တစ်ဦးက သျှမ်းသံတော်ဆင့်ကို ပြောသည်။
“ဖြစ်စဥ်က မနေ့က ကျနော်တို့လူ စစ်ကြောင်း တစ်ခုပေါ့နော်၊ မိုင်းပါးဘက်ကနေ မိုင်းယုဘက်ကို အရေးကြီး တက်လာဖို့ ရှိတယ်။ အဲ့ဘက်မှာ TNLA နဲ့ စစ်ကောင်စီနဲ့လည်း စစ်ရေးတင်းမာမှုတွေ ရှိနေတယ်ဆိုတော့ စစ်ရေး သဘောအရ ဒီလမ်းကို အသုံးပြုမယ်ဆိုပြီး ကြိုတင် အကြောင်းကြားမှုတော့ရှိခဲ့တာပေါ့၊ ဒါပေမဲ့ မန်ပန်ရွာ (ဝၢၼ်ႈပၢင်ႇ) တောင်ဘက်အရောက် ဖာပျဥ်ရွာနားမှာ ကျနော်တို့ကို သူတို့က စတိုက်ခိုက်ခဲ့တာပဲ၊ ၁ နာရီကနေ ၆ နာရီအထိ တိုက်ပွဲဖြစ်ခဲ့တယ်” ဟု မြေပြင်အရာရှိ တစ်ဦးက သျှမ်းသံတော်ဆင့်ကို ပြောသည်။
ယင်းကဲ့သို့ တိုက်ပွဲဖြစ်ပွားပြီးနောက် ယနေ့ (စက်တင်ဘာလ ၂၄ )ရက် အထိ နှစ်ဖက် တပ်ဖွဲ့၏ မြေပြင် စစ်ရေး တင်းမာမှု ဆက်လက်ရှိနေသေးသည့်အတွက် တိုက်ပွဲကြား နှစ်ဖက်တပ်ဖွဲ့၏ ထိခိုက်ကျဆုံးမှုများကို အတည် မပြုနိုင်သေးကြောင်းလည်း အဆိုပါ အရာရှိက သျှမ်းသံတော်ဆင့်ကို ဆက်ပြောသည်။
အဆိုပါ တိုက်ပွဲဖြစ်ပွားရာ နေရာသည် အာဏာသိမ်း စစ်ကောင်စီနှင့် TNLA တပ်တို့ စစ်ရေးတင်းမာမှုလည်း ရှိနေကြောင်း သိရသည်။
TNLA နှင့် SSPP တို့သည် UWSA “ဝ” တပ်ဖွဲ့ ဦးဆောင်ဖွဲ့စည်းထားသည့် မြောက်ပိုင်းမဟာမိတ် တပ်ပေါင်းစု တွင် ပါ၀င်နေသည့် လက်နက်ကိုင်အဖွဲ့များဖြစ်သည်။
သို့သော်လည်း နေပြည်တော် အစိုးရ ဦးဆောင်ဖော်ဆောင်နေသည့် တနိုင်ငံလုံးအပစ်အခတ်ရပ်စဲရေးစာချုပ် NCA တွင် ပါဝင်လက်မှတ်ရေးထိုးထားခြင်း မရှိပေ။
ပြီးခဲ့သည့် စက်တင်ဘာလ (၂၁) ရက်တွင်လည်း ကွတ်ခိုင်မြို့နယ်၊ ခိုမုန်းကျေးရွာအနီးတွင် TNLA နှင့် စစ်ကောင်စီ တို့ ထိတွေ့တိုက်ပွဲဖြစ်ပွားခဲ့ရာ စစ်ကောင်စီဘက်မှ တပ်သား (၆) ဦး ထက်မနည်း သေဆုံးပြီး TNLA ဘက်မှလည်း ထိခိုက်ဒဏ်ရာရမှု ရှိခဲ့ကြောင်း သတင်းသိရသည်။
သြဂုတ်လနှောင်းပိုင်းမှ စတင်ကာ ကွတ်ခိုင်မြို့နယ်၊ မူဆယ်မြို့နယ် နှင့် အနီးပတ်ဝန်းကျင်တို့၌ စစ်ကောင်စီ နှင့် TNLA တပ်တို့၏ စစ်ရေးပြင်းထန်မှုကြောင့် အရပ်သား ထိခိုက်သေဆုံးမှု ၊ နေအိမ် နှင့် အဆောက်အအုံများ ထိခိုက်ပျက်စီးမှုများ နေ့စဥ် နှင့် အမျှ ရှိနေသည်။
