သျှမ်းပြည် လားရှိုးမြို့ အမှတ် (၄) ရပ်ကွက် မီးပွိုင့်အနားရှိနေသည့် ယာဥ်ထိန်းရဲ တစ်ဦးကို အရပ်ဝတ် အမျိုးသားတစ်ဦး မှ သေနတ်ဖြင့် လာရောက်ပစ်ခတ်ခဲ့ကြောင်း စုံစမ်းသိရှိရသည်။
ယနေ့ စက်တင်ဘာ (၂၂) ရက် မနက် (၁၀) နာရီခွဲဝန်းကျင်အချိန်တွင် လားရှိုးမြို့ အမှတ် (၄) ရပ်ကွက်တွင်ရှိသည့် မီးပွိုင့် မှ ယာဥ်ထိန်းရဲတစ်ဦးသည် မီးနီဖြတ်သည့် ကားတစ်စီးကို ပိုက်ဆံလိုက်တောင်း ရာမှ သေနတ်ဖြင့် ပစ်ခတ်ခံရကြောင်း ဖြစ်စဥ်ကို မြင်တွေ့ရသည့် အမျိုးသား တစ်ဦးက သျှမ်းသံတော်ဆင့်ကို ပြောသည်။
“မီးနီဖြတ်တဲ့ ကားကို ပိုက်ဆံလိုက်တောင်းရာကနေ ကားပေါ်မှာ ပါတဲ့သူက သေနတ်နဲ့ ပစ်လိုက်ကြတာတဲ့၊ သူက (ယာဥ်ထိန်းရဲ) ဆိုင်ကယ် နဲ့ လိုက်တာပါ။ ညှိလိုက်ကြသေးတယ်။ ညှိမရလို့ သေနတ်နဲ့ ပစ်လိုက်တာလို့ ထင်တာပဲ” ဟု ဖြစ်စဥ်ကို မြင်ရသည့် အမျိုးသား တစ်ဦးက သျှမ်းသံတော်ဆင့်ကို ပြောသည်။
အဆိုပါ ယာဥ်ထိန်းရဲသည် မီးပွိုင့်နား စောင့်လေ့ရှိသူ ဖြစ်ပြီး ၊ မီးနီဖြတ်သွားသည့်ကားများ၊ ဆိုင်ကယ် ဦးထုပ်မဆောင်းသည့် သူများကို လိုက်လံ ပိုက်ဆံတောင်းလေ့ရှိကြောင်း သိရသည်။
ယနေ့ ပစ်ခတ်ခံရမှုတွင် ရင်ဘတ်နေရာသို့ သေနတ် နှစ်ချက် ပစ်ခတ်ခံရပြီး၊ လက်မောင်း၊ ဝမ်းဗိုက် တို့မှာလည်း ကျည်ဆံထိမှန် ထားကြောင်း အထက်ပါ ပုဂ္ဂိုလ်က သျှမ်းသံတော်ဆင့်ကို ဆက်ပြော သည်။
“အဲ့နားဖြတ်သွားတဲ့သူတိုင်းက သူ့ကိုသိတယ်၊ ပိုက်ဆံလည်း အတောင်းကြမ်းလို့ သူ့ကို ရှောင်ချင် ကြတာပေါ့၊ ဒီနေ့ ပစ်ခတ်မှုမှာ ရင်ဘတ်ကို ၂ ချက်၊ လက်မောင်း နဲ့ ဗိုက်တွေမှာလည်း ထိထားတယ်။ သေနတ်အချက်ပေါင်း ၅ ချက် ပစ်ခတ်ခံရတယ်လို့ သိရတယ်၊ အလောင်းကိုတော့ လူမှုကူညီရေးက လာသယ်သွားပြီ” ဟု အထက်ပါ ပုဂ္ဂိုလ်က သျှမ်းသံတော်ဆင့်ကို ဆက်ပြောသည်။
ယာဥ်ထိန်းရဲကို ပစ်သွားသည့် ကားသမားသည် မည်သူ မည်ဝါဖြစ်ကြောင်းကို သျှမ်းသံတော်ဆင့် အနေဖြင့် သီးခြား အတည်ပြုချက် မရနိုင်သေးပေ။
ပြီးခဲ့သည့် စက်တင်ဘာလ ၁၉ ရက်နေ့ကလည်း လားရှိုးမြို့ အမှတ် (၂) ရပ်ကွက်ရှိ CS Hotel အနီး ပေါက်ကွဲမှုဖြစ်ပြီး (၄) ဦးထိခိုက်ဒဏ်ရာရကာ (၂) ဦးသေဆုံးမှု ရှိခဲ့သည်။
လားရှိုးမြို့သည် စစ်ကောင်စီတပ်ဖွဲ့ရှိသော်လည်း လက်နက်ကိုင် တပ်ဖွဲ့များ မြို့ပေါ်အထိ ဆက်ကြေး ကောက်ယူမှုများ၊ ဗုံးခွဲတိုက်ခိုက်မှုများ နှင့် စစ်ကောင်စီ လက်အောက်ခံ စခန်းများ ပစ်ခတ် တိုက်ခိုက် ခံရမှု မကြာခဏ ဖြစ်ပွားလေ့ရှိသည်။
