သျှမ်းပြည် လားရှိုးမြို့နယ် ပြည်သူပိုင်လယ်ယာဧကများကို ပြည်သူ့စစ်နှင့်ဆက်နွယ်သူများက ဖိအားပေး ရောင်းချခိုင်းနေကြောင်း လားရှိုးဒေသခံများက ပြောသည်။
ပြီးခဲ့သည့် သြဂုတ်လ ပထမအပတ်တွင် လားရှိုးမြို့နယ် ဟန်နားကျေးရွာအုပ်စု နှင့် စဉ့်အင်ကျေးရွာအုပ်စုရှိ ပြည်သူပိုင်လယ်ယာဧကပေါင်း (၅၀၀) ဧကကို ရောင်းချပေးဖို့အတွက် စိန်ကျော့ပြည်သူ့စစ်ခေါင်းဆောင်၏ သားဖြစ်သူ စဝ်နွမ်မိန်းမှ အုပ်ချုပ်ရေးမှူးများကို ခေါ်ယူပြီး ပြောကြားခဲ့သည်။
လယ်ယာမြေများသည် ဟန်နားရွာ၏ တောင်ဘက်အရပ်တွင် ၃ မိုင်ကွာဝေးပြီး ဆိုင်ကယ်ဖြင့် ၂၀ မိနစ်ကြာ မောင်းနှင်ရသလို မန်နားရွာဘက်မှ ဟိန်းလွမ့်ရွာလမ်းသို့သွားပါက ၅ မိုင်ကွာဝေးပြီး ဆိုင်ကယ်ဖြင့် ၃၀ မိနစ်ကြာ မောင်းနှင်ရသည်။
ပြည်သူများအနေဖြင့် အဆိုပါ လယ်ယာမြေဧကများကို မရောင်းချပေးစေလိုကြောင်း၊ ထိုသို့ ရောင်းချပေးပါက လယ်ယာ မြေပိုင်ရှင် (၁၆၀) ကျော်သည် အလုပ်လက်မဲ့ဖြစ်ပြီး နေ့စဉ်လုပ်ကိုင်စားသောက်ဖို့အတွက် ခက်ခဲသွားမည်ဖြစ်ကြောင်း အမည်မဖော်လိုသူ လယ်ယာမြေပိုင်ရှင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ ဒီလယ်ယာမြေကို မရောင်းရစေဖို့ ကျမတို့ တောင်းပန်ခဲ့တယ်။ ဒီလယ်ယာမြေမှာ စပါး၊ ပြောင်း လုပ်စားတာကလွှဲပြီး ကျမတို့ ဘာမှမလုပ်နိုင်ဘူး။ စပါးတောင်မှ စားဖို့သောက်ဖို့အတွက်ဘဲ လုပ်နိုင်တာ ရောင်းဖို့တောင် မဟုတ်ဘူး။ ရောင်းလိုက်ရင် ဘာမှလုပ်စားလို့ မရတော့ဘူး “ ဟု ၎င်းအမျိုးသမီးတစ်ဦးက ပြောသည်။
အဆိုပါ လယ်ယာမြေများသည် လက်ရှိကာလပေါက်စျေးမှာ တစ်ဧကလျှင် ကျပ်သိန်း ( ၇၀၀ ) နှုန်းရှိသော်လည်း စိန်ကျော့ပြည်သူ့စစ် ခေါင်းဆောင်၏ သားဖြစ်သူ စဝ်နွမ်မိန်း တစ်ဧကလျှင် ကျပ်သိန်း ၈၀ ဖြင့် ဝယ်ယူမည်ဖြစ်ကြောင်း ပြောဆိုခဲ့သည်။
ထိုလယ်ယာဧကပေါ် တွင် သကြားစက်ရုံဆောက်လုပ်ရန် နှင့် ရေအားလျှပ်စစ်ဆောက်လုပ်ရန်အတွက် အုပ်ချုပ်ရေးမှူးမှတစ်ဆင့် ဒေသခံများကို ပြောခဲ့သည်။
လက်ရှိ လားရှိုးမြို့ပေါ်ရှိ လယ်ယာမြေများသည် ၆၀ ပေပတ်လည် တစ်ကွက်ကို ကျပ်သိန်း (၃သောင်း) အထိ ပေါက်ဈေးရှိနေပြီး မြို့ပြင်ရှိ လယ်ယာမြေမှာ ကျပ်သိန်း ထောင်နှင့်ချီ ပေါက်ဈေးရှိကြောင်း၊ ကျေးရွာရှိ လယ်ယာမြေ တစ်ဧကမှာ ကျပ်သိန်း (၇၀၀) ကျော်ရှိပြီး လယ်ယာမြေအပေါ်မူတည်ပြီး ဈေးကွာခြားမှုရှိကြောင်း ဒေသခံများထံမှ သိရသည်။
လယ်ယာမြေများကို မရောင်းချပေးစေလိုသောကြောင့် ပြည်သူများက စုပေါင်းပြီး ရှမ်းပြည်တိုးတက်ရေးပါတီ၊ ရှမ်ပြည်တပ်မတော် (SSPP/SSA) ထံသို့ သြဂုတ် ၂၂ ရက်တွင် အသနားခံစာ တင်ခဲ့သည်။
ထို အသနားခံစာထဲတွင် ပြည်သူပိုင်လယ်ယာမြေများကို SSPP/SSA မှ ဗိုလ်ချုပ် ပန်ဖမှ ဦးဆောင်၍ မြေဧက ၁၀၀ မှ ၅၀၀ ရောင်းချပေးရန် ညွှန်ကြားခဲ့ကြောင်း၊ စိန်ကျော့ပြည်သူ့စစ်ဘက်မှ ဖိအားပေးနေကြောင်း ရေးသားခဲ့သည်။
ပြည်သူပိုင်လယ်ယာမြေများကို အတင်းအဓ္ဓမ ရောင်းချခိုင်းခြင်းနှင့် ပတ်သက်ပြီး အမည်မဖော်လိုသူ အုပ်ချုပ်ရေးမှူးတစ်ဦးထံ သျှမ်းသံတော်ဆင့် သတင်းဌာနမှ ဆက်သွယ်ခဲ့ရာ လယ်ယာမြေရောင်းချမှုသတင်းသည် မှန်ကန်ကြောင်း၊ သို့သော်လည်း အသေးစိတ်ကို မသိရကြောင်း ၎င်းဇနီးဖြစ်သူ ဖြေကြားခဲ့သည်။
အလားတူ ဟန်နားကျေးရွာနေ ဒေသခံအမျိုးသားတစ်ဦးက “ကျနော်တို့ ရွာဉက္ကဌပြောတာတော့ သူဌေးရှင် ကုမ္ပဏီတွေက ဒီလယ်ယာမြေကို ဝယ်ချင်တယ်လို့တော့ ပြောတယ်။ ဘယ်သူဘယ်ဝါတော့ သူတို့ပိုသိတာပေါ့။ အဲ့ကြောင့် ကျနော်တို့ကို လယ်ယာဘယ်နှစ်ဧကရှိလဲ စာရင်းကောက်ခိုင်းတယ်။ သဘောတူရင် ရောင်း၊ မတူရင် စုပေါင်းပြီး သဘောတူညီတဲ့ အသနားခံစာတင်လို့ပြောတယ် “ ဟု ၎င်းက ဆိုသည်။
ယင်းကဲ့သို့ ပြည်သူပိုင်လယ်ယာမြေများ အတင်းအဓ္ဓမ ရောင်းချခိုင်းခြင်းနှင့် ပတ်သက်ပြီး သျှမ်းသံတော်ဆင့် သတင်းဌာနမှ (SSPP/SSA) ၏ ပြောရေးဆိုင်ခွင့်ရှိသူများထံ ဆက်သွယ်ခဲ့သော်လည်း ဖုန်းလက်ခံ ဖြေကြားခြင်း မရှိပေ။
ပြည်သူများစုပေါင်းပြီး အသနားခံစာတင်ပြီးနောက်ပိုင်း ထပ်မံကြားရသည့်သတင်းသည် လယ်ယာမြေဧက ၅၀ ကို မဖြစ်မနေ ရောင်းချပေးရမည်ဖြစ်ကြောင်း လက်ရှိအချိန်ထိ နယ်မြေသိမ်းဆည်းခြင်း မရှိသေးဘဲ ငြိမ်သက်နေကြောင်း ဒေသခံများက ပြောသည်။
စိန်ကျော့ပြည်သူ့စစ်တပ်ဖွဲ့ ခေါင်းဆောင်သည် ၁၉၈၉ ခုနှစ်က စစ်တပ်နှင့် အပစ်ရပ်ငြိမ်းချမ်းရေး ယူထားသည့် သျှမ်းလက်နက်ကိုင်တပ်တစ်ခု၏ ဉက္ကဌ ဗိုလ်ချုပ်လွယ်မော ဆိုသူ ဖြစ်သည်။ ၂၀၀၉ ခုနှစ်က တပ်မဟာသုံးခု ဦးဆောင်ပြီး စစ်အစိုးရလက်အောက်ခံ ပြည်သူ့စစ်တပ်အဖြစ် အသွင်ပြောင်းထားသည်။
