မိုးကုတ်မြို့နယ်အတွင်း တိုက်ပွဲဖြစ်ပွားပြီးနောက် မိုးမိတ် – မိုးကုတ် လမ်းပိုင်းကို စစ်ကောင်စီက ပိတ်ဆို့ပြီး ဖြတ်သန်းသွားလာခွင့် တားမြစ်ထားကြောင်း စုံစမ်းသိရသည်။
ပြီးခဲ့သည့် စက်တင်ဘာ ၁၀ ရက်မှစပြီး စစ်ကောင်စီတပ် နှင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA)၊ မိုးကုတ် PDF ပူးပေါင်းတပ်တို့အကြား မိုးကုတ်မြို့နယ် အတွင်း တိုက်ပွဲဖြစ်ပွားခဲ့ရာ စစ်ကောင်စီမှ မိုးမိတ် – မိုးကုတ် လမ်းပိုင်းကို ယနေ့အချိန်ထိ ဖွင့်လှစ်နိုင်ခြင်းမရှိသေးကြောင်း ဒေသအတွင်း တက်ကြွ လှုပ်ရှားသူ ဒေသခံတစ်ဦးက ပြောသည်။
“တိုက်ပွဲဖြစ်တဲ့ ဒီလထဲမှာပဲ စစ်ကောင်စီက လမ်းတွေကိုပိတ်လိုက်တာ။ ဘယ်သူ့ကိုမှ ဖြတ်သန်းသွားလာခွင့် မပေးဘူး။ KIA၊ TNLA နဲ့ PDF တွေအရပ်ဝတ်ပြီး ဝင်လာမှာကြောက်လို့ ထင်တယ်။ ကျနော်တို့ ပြည်သူတွေ အတွက်တော့ ခက်တာပေါ့ဗျာ။ အလုပ်အကိုင်နဲ့ သွားလာဖို့ အဆင်မပြေဘူး “ ဟု ၎င်း အမျိုးသားက ပြောသည်။
အလားတူ စက်တင်ဘာလ ၁၉ ရက်တွင်လည်း မိုးကုတ်မြို့ အရှေ့တောင်ဘက်ရှိ အောက်ညောင်ကုန်းရွာနှင့် ယင်းရွာအနီးရှိ အထက်ညောင်ကုန်းရွာ၊ ကုန်းစံရွာကို စစ်ကြောင်းထိုးလာသော စစ်ကောင်စီ၏ စစ်ကြောင်း နှစ်ကြောင်းကို TNLA တပ်မဟာ – ၂ လက်အောက်ခံ တပ်ဖွဲ့များက စောင့်ကြိုတိုက်ခိုက်ခဲ့ပြီး တိုက်ပွဲပြင်းထန်ခဲ့သည်။
မိုးမိတ်မြို့ဒေသခံ အမျိုးသားတစ်ဦးကလည်း “ စစ်ကောင်စီ လမ်းပိတ်ထားတာက ကျနော်တို့ကို တော်တော်ထိခိုက်တယ်။ ကျနော်တို့ စားဝတ်နေရေးအတွက် အလုပ်သွားလာဖို့ အခက်ခဲဖြစ်တယ်။ ဒီလို ပိတ်ထားတော့ ကျနော်တို့လည်း မသွားရဘူး “ ဟု ၎င်းဆိုပြန်သည်။
မိုးကုတ်မြို့နယ် နှင့် သျှမ်းပြည် မူဆယ်၊ ကွတ်ခိုင်မြို့နယ်များတွင် စစ်ကောင်စီတပ်နှင့် တအာင်း (ပလောင်) အမျိုးသားလွတ်မြောက်ရေးတပ်မတော် (TNLA)တို့ကြား တရက်တည်း၌ တိုက်ပွဲ ၇ နေရာ ဖြစ်ပွားခဲ့ ကြောင်း TNLA သတင်းနှင့်ပြန်ကြားရေးဌာနက ထုတ်ပြန်ထားသည်။
