သျှမ်းပြည် တောင်ကြီးခရိုင် ရွာငံမြို့နယ် အတွင်း ပြည်သူ့ကာကွယ်ရေး ပူးပေါင်းတပ်ဖွဲ့ (PDF) များ၏ လှုပ်ရှားမှု အခြေအနေများကို စုံစမ်းသတင်းပေးရန် စစ်ကောင်စီ နှင့် ပျူစောထီးတပ်ဖွဲ့က ဒေသခံများကို ဖိအားပေး ခြိမ်းခြောက်ထားကြောင်း စုံစမ်းသိရသည်။
.
ရွာငံမြို့နယ်အတွင်း နွားဘန်းကြီးကျေးရွာအနီး လှုပ်ရှားသည့် PDF တပ်ဖွဲ့များ၏ အခြေအနေများကို စုံစမ်း သတင်းပေးပို့ရန် နှင့် သတင်းမရပါက ကျေးရွာကို မီးရှို့ဖျက်ဆီးမည်ဟု စစ်ကောင်စီတပ် နှင့် ပျူစောထီးတို့က ဒေသခံများကို ခြိမ်းခြောက်ပြောဆိုထားကြောင်း ရွာငံမြို့နယ် ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“နွားဘန်းကြီးကျေးရွာက ပျူစောထီးခေါင်းဆောင်ဟာ စစ်ကောင်စီကို ရွာထဲ ခေါ်လာတာ။ PDF တွေ ရှိနေတာ သူတို့ သိတယ်တဲ့၊ ရွာသားတွေရဲ့ လုံခြုံရေးအတွက် PDF သတင်းတွေကို စုံစမ်းပေးဖို့ပြော တယ်။ မပေးရင်တော့ အိမ်တွေကို မီးရှို့ခံရမှာဆိုပြီး သေနတ် ပြပြီး ခြိမ်းခြောက်ပြောသွားတယ်” ဟု ဖြစ်စဥ်ကို သိရှိသူ အမျိုးသား တစ်ဦးက သျှမ်းသံတော်ဆင့်ကို ပြောသည်။
ယင်းကဲ့သို့ ပြောဆိုခြိမ်းခြောက်မှုကြောင့် ဒေသခံများ အနေဖြင့် ကြောက်လှန့်နေရသော်လည်း PDF သတင်းကို အမှန်တကယ် မသိရှိသည့်အတွက် စစ်ကောင်စီ၏ ရန်ပြုမှုကိုလည်း စိုးရိမ်နေရကြောင်း ဒေသခံတစ်ဦးက သျှမ်းသံတော်ဆင့်ကို ပြောသည်။
ထို့အပြင် ပြီးခဲ့သည့် စက်တင်ဘာလ ၅ ရက်မှ စတင်ကာ ရက်အကန့်အသတ် မရှိ နွားဘန်းကြီး ကျေးရွာမှ ဒေသခံများ လယ်ယာ သွားလာခြင်း မပြုကြရန် စစ်ကောင်စီမှ ပြောဆို တားမြစ်ခဲ့ကြောင်းလည်း အထက်ပါ အမျိုးသားက သျှမ်းသံတော်ဆင့်ကို ပြောသည်။
“ရွာသားတွေ ရှိတဲ့ အရင်းနှီး နဲ့ ကြိုးစားစိုက်ထားတဲ့ သီးနှံတွေ သွားကြည့်ဖို့တောင် မရဘူး။ အဲ့ (၅) ရက်နေ့ ကတည်းက ပိတ်ထားတာ ဒီနေ့အထိ သွားလာခွင့်ကို ပိတ်ထားတယ်။ လယ်ယာသွားရင်း PDF တွေနဲ့ ဆက်သွယ်မှာကို ကြောက်လို့ တားထားတာ ထင်တယ်” ဟု ရွာငံ ဒေသခံ အထက်ပါ အမျိုးသားက သျှမ်းသံတော်ဆင့်ကို ပြောသည်။
လက်ရှိ နွားဘန်းကြီး ကျေးရွာအနီးတစ်ဝိုက်၌ စစ်ကောင်စီတပ်ဖွဲ့မှ စခန်းချ နေထိုင်လျက်ရှိပြီး စုစုပေါင်း အင်အား ၂၀၀ နီးပါး ရှိနိုင်ကြောင်း ဒေသခံများက ပြောသည်။
ရွာငံမြို့သည် စစ်တပ်မှ နိုင်ငံတော် အာဏာသိမ်းယူပြီးနောက် ရွာငံမြို့နယ်အတွင်း စစ်တပ်မှ နေရာယူ တပ်စွဲထားသည့်အပြင် စစ်ဆေးမှု တင်းကြပ်ခြင်း၊ ဒေသခံများကို ခြိမ်းခြောက်ဖိအားပေးခြင်းတို့ ရှိနေကြောင်း သိရသည်။
ပြီးခဲ့သည့် စက်တင်ဘာလ ၆ ရက် မွန်းလွဲပိုင်း ၂ နာရီဝန်းကျင်တွင် ရွာငံမြို့နယ်၊ ကျောက်ပချုပ်ရွာအနီး၌ စစ်ကောင်စီ နှင့် ပြည်သူ့ကာကွယ်ရေး ပူးပေါင်းတပ်တို့ ထိတွေ့တိုက်ပွဲ ဖြစ်ပွားခဲ့သည့် ဖြစ်စဥ် ဖြစ်ပွား ခဲ့သည်။
