Wednesday, July 24, 2024

လားရှိုးမြို့ပေါ်ရှိ ဟိုတယ်အနီး ပေါက်ကွဲမှုဖြစ်၊ (၅) ဦးထက်မနည်းဒဏ်ရာရ၊ (၁) ဦးသေဆုံး

Must read

သျှမ်းပြည် လားရှိုးခရိုင်၊ လားရှိုးမြို့ပေါ် အမှတ်( ၂) ရပ်ကွက်၌ ပေါက်ကွဲမှုဖြစ်ပြီး အရပ်သား (၅) ဦး ထက်မနည်း ထိခိုက်ဒဏ်ရာရသည့်အပြင် (၁) ဦးသေဆုံးသွားကြောင်း သတင်းသိရသည်။

.

ယနေ့ စက်တင်ဘာလ ၁၉ ရက် ညနေပိုင်း ၅ နာရီ ၂၅ မိနစ်အချိန်တွင် လားရှိုးမြို့ အမှတ် (၂) ရပ်ကွက် နှင်းဆီလမ်းတွင် ရှိသည့် CS Hotel အနီး၌ ပေါက်ကွဲမှု ဖြစ်ပြီး လမ်းသွားလမ်းလာ အမျိုးသား (၃) ဦး ၊ အမျိုးသမီး (၂) ဦး ထိခိုက်ဒဏ်ရာရပြီး အမျိုးသား (၁) ဦး သေဆုံးသွားရကြောင်း သိရသည်။

“ချိန်ကိုက်ဗုံးလိုမျိုး ကနေ ပေါက်ကွဲမှုဖြစ်တာပါ။ တချို့ကလည်း နင်းမိလို့ ပေါက်ကွဲမှုဖြစ်တာလို့လည်း ပြောနေကြတယ်။ ဒီတစ်ခေါက် ပေါက်ကွဲမှုက တကယ်ပြင်းတယ်။ မြေတွေတုန်ပြီး အိမ်ခေါင်မိုးပေါ် အထိ မြေစာတွေကျလာတယ်။ ဒဏ်ရာရသူ နဲ့ သေဆုံးသူတွေကို ပရဟိတအသင်းက သယ်သွားပြီ” ဟု အနီးပတ်ဝန်းကျင်တွင် နေထိုင်သည့် အမည်မဖော်လိုသူ အသက် (၃၀) ဝန်းကျင် အမျိုးသား တစ်ဦးက သျှမ်းသံတော်ဆင့်ကိုပြောသည်။

အဆိုပါ ပေါက်ကွဲမှုတွင် အရပ်သား ပြည်သူ ထိခိုက်သေဆုံးမှု ရှိသည့် အပြင် အနီးပတ်ဝန်းကျင်ရှိ ဆိုင်ကယ်၊ ကား နှင့် နေအိမ် မှန်ပြတင်းပေါက်များလည်း ထိမှန်ပျက်စီးမှု ရှိကြောင်း သိရသည်။

ယင်းပေါက်ကွဲမှုသည် မည်သည့် အဖွဲ့အစည်းက လုပ်ဆောင်သည်ကို မသိရကြောင်း နှင့် ပေါက်ကွဲရသည့် အကြောင်းရင်းကိုလည်း သျှမ်းသံတော်ဆင့်မှ ဆက်လက်စုံစမ်းနေဆဲ ဖြစ်သည်။

ထို့အပြင် လားရှိုးမြို့တွင်း ဟိုတယ် ၊ စားသောက်ဆိုင် ၊ Bar ရှိသည့် နေရာများ၌ ပေါက်ကွဲမှု ဖြစ်လေ့ရှိသည့် အတွက် လက်နက်ကိုင် အဖွဲ့အစည်းများမှ အခွန်ဆက်ကြေးပေးဆောင်ရန် ခြိမ်းခြောက်သည့် လုပ်ရပ်ဖြစ်နိုင်ကြောင်းလည်း လားရှိုးမြို့ခံ အသက် (၄၀) ကျော် အမျိုးသား တစ်ဦးက ပြောသည်။

“ဒီပေါက်ကွဲမှု (CS Hotel အနီးပေါက်ကွဲမှု) က ဆက်ကြေး ကိစ္စတွေနဲ့ ဆိုင်မလားတော့ မသိဘူး။ ဒါပေမဲ့ အရင်တုန်းက လားရှိုးမြို့တွင်း ပေါက်ကွဲမှုတွေဟာ လက်နက်ကိုင်တွေကနေ ဆက်ကြေး ပေးကြဖို့ ခြိမ်းခြောက်တဲ့ လုပ်ရပ်လို့ မြို့ခံတွေကြား ပြောနေကြတာ၊ ဘယ်အဖွဲ့က ဖြစ်ဖြစ် ဒီလိုမျိုး ကတော့ မလုပ်သင့်ပါဘူး။ အခုဆို အပြစ်မဲ့ အရပ်သားတွေ ထိခိုက်သေဆုံးရတယ်၊ စိတ်မကောင်းဘူး” ဟု လားရှိုးမြို့ခံ အသက် (၄၀) အမျိုးသားက သျှမ်းသံတော်ဆင့်ကို ပြောသည်။

လားရှိုးမြို့သည် စစ်ကောင်စီတပ်ဖွဲ့ရှိသော်လည်း လက်နက်ကိုင် တပ်ဖွဲ့များ မြို့ပေါ်အထိ ဆက်ကြေးကောက်ယူမှုများ၊ ဗုံးခွဲတိုက်ခိုက်မှုများ နှင့် စစ်ကောင်စီ လက်အောက်ခံ စခန်းများ ပစ်ခတ်တိုက်ခိုက်ခံရမှု မကြာခဏ ဖြစ်ပွားလေ့ရှိသည်။

ပြီးခဲ့သည့် သြဂုတ်လ အတွင်းမှာလည်း လားရှိုးမြို့ပေါ်ရှိ Sunny Hotel ၌ ပေါက်ကွဲမှု ဖြစ်ပွားခဲ့သေးသည်။

Leave a Comments

- Advertisement -spot_img

Latest article