သျှမ်းပြည် တောင်ကြီးခရိုင် ဆီဆိုင်မြို့နယ် ပုံးအင်းဒေသတွင် မူးယစ်ဆေးဝါးသုံးစွဲသူကို ပအိုဝ်းပြည်သူ့စစ် PNO မှ ဆက်တိုက်ဖမ်းဆီးနေပြီး ငွေတောင်းခံနေကြောင်း စုံစမ်းသိရသည်။
.
ပအိုဝ်းပြည်သူ့စစ် PNO သည် ပုံးအင်းဒေသရှိ မူးယစ်ဆေးဝါး ရောင်းချသူများကို ဖမ်းဆီးနိုင်ခြင်းမရှိဘဲ မူးယစ်ဆေးဝါးသုံးစွဲသူများကို လိုက်လံဖမ်းဆီးပြီး တစ်ဦးကို ကျပ်သိန်း ၄၀ ကျော် တောင်းခံလျက်ရှိကြောင်း ပုံးအင်းဒေသခံ အသက် ၄၀ အရွယ် အမျိုးသားတစ်ဦးက သျှမ်းသံတော်ဆင့်ကို ပြောသည်။
“အခု ပုံးအင်းမှာ မူးယစ်ဆေးသမားတွေကို လိုက်ဖမ်းနေတာ တော်တော်ကြမ်းတယ်။ ဖမ်းခံရသူတွေလည်း များတယ်။ တစ်ယောက်ကို ကျပ်သိန်း ၄၀၊ ၅၀ ပေးပြီး ပြန်ရွေးရတယ်။ သုံးတဲ့သူကို ဖမ်းမိပြီဆို ရောင်းတဲ့သူကို ဖော်ခိုင်းတော့လည်း သူတို့က မဖမ်းဘူး။ သူတို့ထဲက လူတွေအချင်းချင်းပဲ။ ရွာလမ်းကြား၊ လယ်ယာတွေထဲမှာ လိုက်ဖမ်းတာ “ ဟု ၎င်းအမျိုးသားက ပြောသည်။
အဆိုပါ ဖမ်းဆီးခြင်း ပြုလုပ်မှုများသည် အမှန်တကယ် မူးယစ်ဆေးဝါး တိုက်ဖျက်နေခြင်း မဟုတ်ကြောင်း၊ ပိုက်ဆံရဖို့အတွက်သာ လုပ်ဆောင်နေခြင်း ဖြစ်ကြောင်း ၎င်းက ဆက်ပြောသည်။
လက်ရှိမှာ မူးယစ်ဆေးဝါး (WY) တစ်ပြားလျှင် မြန်မာကျပ်ငွေ ၅၀၀ ဝန်းကျင်တာရှိသည့်အပြင် နေရာတိုင်းတွင် အလွယ်တကူ ဝယ်ယူနိုင်ကြောင်းလည်း ပုံအင်းဒေသခံများက ပြောသည်။
စစ်တပ်က အာဏာသိမ်းပြီးနောက်ပိုင်း ပုံးအင်းဒေသတွင် မူးယစ်ဆေးဝါး သုံးစွဲသူ အိမ်တိုင်းနီးပါး ရှိနေပြီး ၈၀ ရာခိုင်နှုန်းထိမြင့်တက်လာကြောင်း၊ မူးယစ်ဆေးဝါး ပပျောက်ရေးအတွက် ရောင်းချသူများကို လိုက်လံဖမ်းဆီး ဆောင်ရွက်သင့်ကြောင်း ပုံးအင်းဒေသခံ အမျိုးသမီးတစ်ဦးက ပြောသည်။
“ မူးယစ်ဆေးဝါးကို တကယ်တိုက်ဖျက်ချင်တယ်ဆိုရင်တော့ အရင်ဆုံး ရောင်းတဲ့သူကို ဖမ်းသင့်တယ်။ အခုက သုံးတဲ့သူကိုပဲ ဖမ်းနေတာ။ ရောင်းတဲ့သူကို မဖမ်းဘူးဆိုတော့ မူးယစ်ဆေးက ပပျောက်သွားမှာ မဟုတ်ဘူး။ ရှိလာအုံးမှာပဲ “ ဟု ၎င်း အမျိုးသမီးက ဆိုပြန်သည်။
အလားတူ ပြီးခဲ့သည့် သြဂုတ်လ ၁ ရက်တွင်လည်း ပုံးအင်းဒေသအတွင်း နေထိုင်သည့် ပြည်သူများထံ ရှေ့တန်းရောက် တပ်သားများ ထောက်ပံ့ကြေးဟုဆိုပြီး ပအိုဝ်းပြည်သူ့စစ် PNO မှ တအိမ်ကို ကျပ်ငွေ ၄၀၀၀ နှင့် ဆန် ၂ ပြည် ကောက်ခံခဲ့သည်။
