သျှမ်းပြည် မူဆယ်မြို့နယ်အတွင်းတွင် မိုးသည်းထန်စွာ ရွာသွန်းမှုကြောင့် နေအိမ်ဝန်းများအထိ ရေဝင်ရောက်နေကြောင်း သိရသည်။
.
ယမန်နေ့ (စက်တင်ဘာ ၁၂) ရက် နံနက်ပိုင်း ၂ နာရီဝန်းကျင်မှ စတင်ကာ မိုးသည်းထန်စွာရွာသွန်းမှုကြောင့် မူဆယ်မြို့ပေါ် ရပ်ကွက်များ ဖြစ်ကြသည့် ကောင်းမူးတုံရပ်ကွက်၊ ဟိုမွန် ရပ်ကွက်တို့၌ ချောင်းရေလျှံမှု ဖြစ်ပွားပြီး နေအိမ်များ အတွင်း ရေဝင်ရောက်ခဲ့ကြောင်း ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“ရပ်ကွက်ထဲက အမှိုက်တွေက ရေစီးကြောင်းနဲ့ အတူပါလာပြီးတော့ ချောင်းနားမှာ လာပိတ်နေကြတာပေါ့၊ အဲ့ဒါကြောင့် ချောင်းရေလည်း ကောင်းကောင်း မစီးနိုင်ဘဲ ရေတွေလျှံကုန်တာ၊ အိမ်တွေထဲလည်း ရေဝင်တယ်၊ တချို့ အိမ်သုံးပစ္စည်းတွေတောင် ရေစီးနဲ့အတူ မျှောပါသွားကြတယ်” ဟု မူဆယ်မြို့ခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
ယင်းကဲ့သို့ မူဆယ်မြို့ပေါ် ရပ်ကွက်များ ရေကြီး ရေလျှံမှု ဖြစ်နေစဥ်တွင် ဟိုမွန်ရပ်ကွက်မှ CRV အမျိုးအစား ကား တစ်စီး၊ ဆိုင်ကယ် နှစ်စီးလည်း ခိုးခံလိုက်ရကြောင်း အခိုးခံရသည့် ကားပိုင်ရှင် အမျိုးသမီးက သျှမ်းသံတော်ဆင့်ကို ပြောသည်။
“မနက် ၃ နာရီလောက်မှာ မိုးတွေသည်းကြီးမဲကြီး ရွာနေချိန် ရေတွေလည်း အိမ်တွေထဲ စဝင်လာတဲ့ အချိန်ဆိုတော့ ပတ်ဝန်းကျင်ကို သတိမထားမိဘူး၊ ပစ္စည်းတွေပဲ ရွှေ့နေကြတာပေ့ါ။ မိုးလင်းတော့ ကားက မရှိတော့ဘူး၊ သော့ကြီးကြီး နဲ့ ခတ်ထားတဲ့ တံခါးကို ဘယ်လိုဖြတ်ဝင်ပြီး ယူသွားလဲ မသိဘူး” ဟု ကားအခိုးခံရသည့် အမျိုးသမီးက သျှမ်းသံတော်ဆင့်ကို ပြောသည်။
ဆိုင်ကယ် နှစ်စီးသည်လည်း အိမ်ရှေ့ ခြံဝန်းအတွင်း သော့ခတ်ထားခဲ့သော်လည်း ခိုးယူခြင်း ခံရကြောင်း အထက်ပါ အမျိုးသမီးက ဆက်လက်ပြောဆိုထားသည်။
အလားတူပင် စက်တင်ဘာလ (၁၂) ရက်နေ့တစ်နေ့တည်း၌ မူဆယ်ခရိုင်၊ ပန်ဆိုင်းမြို့နှင့် ကျင်ဆန်ကျော့ကြားရှိ နမ့်ကွေးချောင်း ရေလျှံမှု ဖြစ်သည့်အတွက် လမ်းများလည်း ခေတ္တပိတ်ထားရသည့် အပြင် အနီးပတ်ဝန်းကျင်ရှိ နေအိမ်များထဲ ရေဝင်ခဲ့ကြောင်းလည်း သိရသည်။
ပြီးခဲ့သည့် သြဂုတ်လ ၉ ရက်တွင်လည်း မူဆယ်မြို့နယ် ပန်ခမ်းကျေးရွာမှာ မိုးသည်းထန်စွာ ရွာသွန်းမှုကြောင့် လူနေအိမ်ထိ ရေများဝင်ကာ ရေကြီးရေလျှံမှု ဖြစ်ပွားခဲ့သည်။
သြဂုတ်လဆန်းပိုင်းမှ စတင်ပြီး မိုးအဆက်မပြတ် ရွာသွန်းမှုကြောင့် သျှမ်းပြည်အပါအဝင် တခြားပြည်နယ်များလည်း ရေကြီးရေလျှံမှုဖြစ်ပွားပြီး ကားလမ်းပိုင်း ပြတ်တောက်သွားသည်အထိ ဖြစ်ပွားခဲ့သည်။
