မြန်မာ – တရုတ်နယ်စပ် မူဆယ်မြို့ရှိ ဂိတ်တွင် တစ်ခါသုံးကတ် ပြုလုပ်သူများအတွက် တစ်ရက်လျှင် တိုကင်နံပတ် ၂၀၀ အထိသာ ပြုလုပ်ပေးနေကြောင်း စုံစမ်းသိရသည်။
.
တရုတ်ပြည်ဝင်ဖို့ နှစ်နိုင်ငံ ဝင်ထွက်ခွင့် တစ်ခါသုံးကတ် TBP ကို မူဆယ်မြို့ရှိ နန်းတော်ဂိတ် နှင့် ဆင်ဖြူဂိတ်တွင် ပြုလုပ်သူ များပြားလာသည့်အတွက် တစ်ရက်လျှင် တိုကင်နံပတ် ၂၀၀ အထိသာ ပြုလုပ်ပေးတော့မည်ဖြစ်ကြောင်း မူဆယ်မြို့ဒေသခံ အမျိုးသားတစ်ဦးကပြောသည်။
“လွန်ခဲ့တဲ့ ၂ ရက်၊ ၃ ရက်လောက်ကစပြီး တိုကင်နံပတ်ပဲ လုပ်ပေးတော့တယ်။ ဂိတ်မှာလုပ်မယ့် လူတွေကအရမ်းများလို့လေ။ တစ်နေ့ကို တိုကင်နံပတ် ၁ ကနေ ၂၀၀ အထိပဲ လက်ခံပြီး လုပ်ပေးတော့တယ် “ ဟု ၎င်းအမျိုးသားတစ်ဦးက ပြောသည်။
အဆိုပါ တိုကင်နံပတ်ရရန်အတွက် တာဝန်ရှိသူ လ.ဝ.က ထံ ကျပ်ငွေ ၁ သောင်းမှ ၁ သိန်းကျော်အထိ ပေးပြီး နေရာဝယ်ယူရကြောင်း သိရသည်။
“ နံနက် ၂ နာရီကတည်းက ထပြီးတော့ သွားတန်းစီရတာ။ နေ့လယ် ၂ နာရီမှဝင်ရတယ်။ အဲ့ဒါတောင် နေရာကို ကျပ် ၁ သောင်းပေးပြီး ဝယ်ရသေးတယ်။ ရှေ့ကို ရောက်ချင်သလောက် လ.ဝ.က ကိုပိုက်ဆံပေးပြီး ဝယ်ရတာ “ ဟု သွားရောက်တန်းစီခဲ့သည့် ဒေသခံ အမျိုးသားတစ်ဦးက ပြောသည်။
ကိုဗစ် – ၁၉ ရောဂါဖြစ်ပွားမှုကြောင့် ပိတ်ထားသည့် တရုတ်နယ်စပ်ဂိတ်များကို ပြီးခဲ့သည့် စက်တင်ဘာလ ၄ ရက်မှ ၁၂ ရက်အထိ ပြန်လည်ဖွင့်လှစ်ခဲ့ရာ တစ်ခါသုံးကတ် TBP သွားရောက်လုပ်ကိုင်သူများ နေ့စဉ်နီးပါး စည်ကားနေလျက်ရှိသည်။
ထိုသို့ သွားရောက်လုပ်ကိုင်သူများသည် တရုတ်ပြည်အတွင်း သွားရောက်လုပ်ကိုင်သူများ ဖြစ်ကြသည်။