ထိုင်းနိုင်ငံရှိ လူဝင်မှု ကြီးကြပ်ရေးဌာနမှနေပြီး သက်ဆိုင်ရာ အဖွဲ့အစည်းများနှင့် ပူးပေါင်းပြီး ထိုင်းနိုင်ငံတွင်းသို့ တရားမဝင် ဝင်ရောက်နေထိုင်သူများကို စစ်ဆေးသွားမည်ဟု သိရှိရသည်။
.
အဆိုပါ စစ်ဆေးမှုတွင် စက်တင်ဘာ ၆ ရက်မှ ၁၅ ရက်ထိ ထိုင်းနိုင်ငံတွင်းသို့ တရားမဝင် ဝင်ရောက်နေထိုင်သည့်သူများ၊ ခိုးဆိုးလုယက်သူများ၊ တရားမဝင် အလုပ်လုပ်ကိုင်သူများ၊ ဗီဇာ သက်တမ်းများ၊ ဗီဇာနှင့် ကိုက်ညီမှုမရှိဘဲ အလုပ်လုပ်နေသူများကို တင်းကြပ်စွာ စစ်ဆေးသွားမည်ဟု Chiangmai Immigration က ထုတ်ပြန်ထားသည်။
ထိုင်းနိုင်ငံမြောက်ပိုင်းရှိ သက်ဆိုင်ရာ ခရိုင်တာဝန်ရှိသူများ တွေ့ဆုံဆွေးနွေးမှု ပြုလုပ်ပြီး ကွင်းဆင်းစစ်ဆေးရန် သဘောတူညီမှု ရရှိခဲ့သည်။ အလားတူ ချင်းမိုင်ခရိုင်တွင်လည်း တာဝန်ရှိသူ (၈၀) ခန့် ကွင်းဆင်းပြီး မြို့နယ်အလိုက် ကျေးရွာတွေမှာ စစ်ဆေးသွားမည်ဟု ထုတ်ပြန်ထားသည်။
စစ်ဆေးရာတွင် ပညာရေးကျောင်း၊ အလုပ်ရုံနေရာ၊ ဖောင်ဒေးရှင်းနေရာ နှင့် အသင်းအဖွဲ့နေရာ များလည်း စစ်ဆေးသွားမည်ဟု သိရသည်။
ထိုင်းနိုင်ငံအတွင်း တရားမဝင် ပြုလုပ်သည့် အွန်လိုင်း Call Center ၊ အွန်လိုင်း လိမ်လည်မှုများကို သက်ဆိုင်ရာ အာဏာပိုင်များ ထိရောက်စွာ အရေးယူ စစ်ဆေးသွားမည်ဟုလည်း သိရသည်။
စစ်တပ် အာဏာသိမ်းပြီးနောက်ပိုင်း ထိုင်းနိုင်ငံအတွင်းသို့ မြန်မာရွှေ့ပြောင်းအလုပ်သမား အများအပြား ဝင်ရောက်လာခဲ့ကြောင်း ထိုင်းနိုင်ငံ ချင်းမိုင်ခရိုင် မြန်မာရွှေ့ပြောင်းအလုပ်သမားအရေး ကူညီဆောင်ရွက် သူတစ်ဦး က သျှမ်းသံတော်ဆင့် ကိုပြောသည်။
“ထိုင်းနိုင်ငံထဲ ဝင်လာတဲ့သူ တစ်ချို့က တရားဝင် နေထိုင်တာ ရှိသလို တစ်ချို့က တရားမဝင် နေထိုင်တာလည်း ရှိတယ်။ တစ်ချို့ကလည်း တရားဝင်နေထိုင်တာ ရှိပေမယ့် အသံကျယ်လောင်ပြောဆိုတာတွေ ဘေးပတ်ဝန်းကျင် အနှောက်အယှက် ပေးတာတွေ ရှိရင်လည်း အိမ်ရှင်တွေ စိတ်အနှောက်အယှက်ဖြစ်ပြီး ရဲစခန်းမှာ သွားတိုင်ကြားကြတာတွေလည်းရှိတယ်။ လိမ်လည်မှုတွေ များပြားလာတော့ အာဏာပိုင်တွေက တင်းကြပ်စွာ စစ်ဆေးသွားမှာပါ” ဟု ထိုင်းနိုင်ငံ ချင်းမိုင်ခရိုင် မြန်မာရွှေ့ပြောင်းအလုပ်သမားအရေး ကူညီဆောင်ရွက် သူတစ်ဦး က သျှမ်းသံတော်ဆင့် ကိုပြောသည်။
ထိုင်းနိုင်ငံတွင်းသို့ တရားဝင် ဝင်ရောက်နေထိုင်သည့် မြန်မာရွှေ့ပြောင်း အလုပ်သမားအပါအဝင် တရားမဝင်သည့် မြန်မာရွှေ့ပြောင်း အလုပ်သမားများ စုစုပေါင်း (၆) သိန်းနီးပါးခန့် ရှိကြောင်း စုံစမ်းသိရသည်။
