“ကနောင်စစ်ဆင်ရေး” တိုက်ပွဲအတွင်း စစ်ကောင်စီဘက်မှ အများအပြားသေဆုံး

ပြည်သူ့ကာကွယ်ရေးတပ်မတော် (မန္တလေး) နှင့် တအာင်း (ပလောင်) အမျိုးသားလွတ်မြောက်ရေးတပ်မတော် (TNLA) တို့ ပူးပေါင်းပြီး “ကနောင်စစ်ဆင်ရေး “ ဟု နာမည်ပေးထားသည့် တိုက်ပွဲအတွင်း စစ်ကောင်စီဘက်မှ အများအပြား သေဆုံးခဲ့ကြောင်း MDY PDF မှ ယမန်နေ့ (စက်တင်ဘာ ၁၁) ရက်တွင် ထုတ်ပြန်ထားသည်။

.

၂၀၂၃ ခုနှစ် ဇူလိုင်လ (၁၅) ရက်မှစပြီး ပထမဦးဆုံး တိုက်ပွဲအနေဖြင့် “ကနောင်စစ်ဆင်ရေး“ တွင် မတ္တရာမြို့နယ်ရှိ အင်ကြင်းမြိုင်လေကြောင်းရန်ကာကွယ်ရေးတပ် (၁၀၁၄) ကို ရှေ့တိုက်ဒုံးများဖြင့် ပစ်ခတ် တိုက်ခိုက်ခြင်း၊ မိုင်းဆွဲတိုက်ခိုက်ခဲ့ကြောင်း စစ်ကောင်စီဘက်မှ ဗိုလ်ကြီး (၁) ဦး အပါအဝင် တပ်သား (၁၉) ဦး သေဆုံးခဲ့ကြောင်း ရေးသားဖော်ပြထားသည်။

ထိုပထမဦးဆုံး တိုက်ပွဲအတွင်း၌ ပြည်သူ့ကာကွယ်ရေး တပ်မတော် (မန္တလေး) မှ ရဲဘော်တစ်ဦးလည်း သေဆုံးခဲ့သည်။

ထို့နောက် မန္တလေး သျှမ်းပြည် နောင်ချိုမြို့ နှင့် ပြင်ဦးလွင် – မိုးကုတ်လမ်းပိုင်းတွင် စစ်ကောင်စီတပ် နှင့် ပြည်သူ့ကာကွယ်ရေးတပ်မတော် (မန္တလေး) တို့အကြား ယခု စက်တင်ဘာလ ၁၀ ရက်အထိ တိုက်ပွဲဖြစ်ပွားခဲ့သည်။

တိုက်ပွဲသည် ၂ လ နီးပါးကြာအောင် ဖြစ်ပွားခဲ့ပြီးနောက် စစ်ကောင်စီဘက်မှ ဗိုလ်ကြီး၊ အရာရှိ၊ ဒု – စစ်ကြောင်းမှူး အပါအဝင် တပ်သား စုစုပေါင်း ဦးရေ ၈၀ ခန့် သေဆုံးခဲ့ပြီး၊ အများအပြား ထိခိုက်ဒဏ်ရာရရှိခဲ့ကြောင်း ရေးသားဖော်ပြထားသည်။

ထိုထဲတွင် ပြည်သူ့ကာကွယ်ရေးတပ်မတော် (မန္တလေး) ဘက်မှ ရဲဘော် ၂ ဦး သေဆုံးခဲ့သည်။

လက်ရှိအချိန်ထိ ပြည်သူ့ကာကွယ်ရေးတပ်မတော် (မန္တလေး) မှ ဆင်နွှဲလျက်ရှိသော “ ကနောင် စစ်ဆင်ရေး “ သည် ပြီးဆုံးခြင်းမရှိသေးဘဲ စစ်ကောင်စီတပ် နှင့် ထိပ်တိုက်ရင်ဆိုင်ထားကာ စစ်ရေးတင်းမာလျက်ရှိသည်။