Thursday, June 20, 2024

ရွာငံမြို့နယ် PDF နှင့် စစ်ကောင်စီ တိုက်ပွဲဖြစ်ပွား ထိခိုက်ဒဏ်ရာ ရမှုရှိနေ

Must read

သျှမ်းပြည် တောင်ကြီးခရိုင် ရွာငံမြို့နယ်အတွင်း၌ အာဏာသိမ်း စစ်ကောင်စီတပ် နှင့် ပြည်သူ့ကာကွယ်ရေး ပူးပေါင်းတပ်ဖွဲ့ (PDF) တို့ တိုက်ပွဲဖြစ်ပွားရာ ထိခိုက်ဒဏ်ရာ ရရှိမှုများလည်း ရှိနေကြောင်း သိရသည်။

.

ပြီးခဲ့သည့် စက်တင်ဘာလ ၆ ရက် မွန်းလွဲပိုင်း ၂ နာရီဝန်းကျင်တွင် ရွာငံမြို့နယ်၊ ကျောက်ပချုပ်ကျေးရွာအနီး၌ စစ်ကောင်စီ နှင့် ပြည်သူ့ကာကွယ်ရေး ပူးပေါင်းတပ်တို့ ထိတွေ့တိုက်ပွဲ ဖြစ်ပွားခဲ့ခြင်း ဖြစ်ကြောင်း PDF  နှင့် နီးစပ်သူ အမျိုးသား တစ်ဦးက သျှမ်းသံတော်ဆင့် ကိုပြောသည်။

“ဒီနားတစ်ဝိုက်မှာ နှစ်ဖက်တပ်ဖွဲ့ စစ်ရေးတင်းမာမှု ရှိနေတာကတော့ ပြီးခဲ့တဲ့ လကတည်းကပါ။ မနေ့က ပစ်ခတ်မှုကတော့ နာရီဝက်လောက်ကြာတယ်၊ ထိခိုက်ကျဆုံး မှုတွေလည်း ရှိတယ်၊ သတင်းထုတ်ပြန် လာတာတော့ မတွေ့ရသေးဘူး”  ဟု PDF နှင့် နီးစပ်သူက သျှမ်းသံတော်ဆင့်ကို ပြောသည်။

ပြီးခဲ့သည့် သြဂုတ်လ တတိယပတ်အတွင်း၌ သာစည်မြို့နယ်ဘက်မှ စစ်ကြောင်း ချီတက်လာသည့် စစ်ကောင်စီ စစ်ကြောင်းသည်  ရွာငံမြို့နယ်၊ ကျောက်ပချုပ်ကျေးရွာအနီး PDF နှင့် ထိတွေ့တိုက်ပွဲ ဖြစ်ပွားခဲ့ပြီး အရပ်သားနေအိမ်ကို စစ်ကောင်စီ မီးရှို့ ဖျက်ဆီးခဲ့ကြောင်းလည်း သိရသည်။

နှစ်ဖက် တိုက်ပွဲကြား အရပ်သားနေအိမ် မီးရှို့ခံရသည့် အပြင် ဒေသခံ (၁၀၀) ကျော်လည်း တောထဲ သို့ ခေတ္တစစ်ရှောင်ထွက်ပြေးရကြောင်းလည်း ဖြစ်စဥ်ကို သိရှိရသူ ရွာငံဒေသခံ အမျိုးသား တစ်ဦးက ပြောသည်။

“မီးရှို့ခံရတဲ့ အရပ်သား အိမ် (၂) လုံးထက် မနည်းဘူးတဲ့၊ အဲ့ဘက်က ခေါင်လည်းခေါင်၊ မြို့နဲ့လည်း ဝေးတော့ သတင်းတွေက တက်မလာဘူး၊ ကျောက်ပချုပ်ရွာခံတွေဆို တိုက်ပွဲဖြစ်လို့ တောထဲ စစ်ရှောင်သွားရတယ်၊ ခုတော့ ပြန်ရောက်လာကြပြီ၊ မနေ့က တိုက်ပွဲမှာ ထပ်ပြေးကြရသေးလားတော့ မသိဘူး” ဟု ဖြစ်စဥ်ကို သိရှိရသူ ရွာငံဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

စစ်ကောင်စီ တပ်ဖွဲ့သည် ရွာငံမြို့နယ်အတွင်း၌ ဓနုပြည်သူ့လွတ်မြောက်ရေးတပ်ဦး (Danu People’s Liberation Front) လှုပ်ရှားနေသည့် စွပ်စွဲချက်ဖြင့် စစ်ကြောင်းထိုးကာ မြေပြင် စစ်ဆေးရေး နှင့် စစ်အင်အားဖြည့်တင်းမှု လုပ်ဆောင်နေကြောင်းလည်း သိရသည်။

ဓနုပြည်သူ့လွတ်မြောက်ရေးတပ်ဦး (DPLF) ကို စစ်အာဏာရှင် စနစ်ကျဆုံး၍ စစ်မှန်သော ဖက်ဒရယ် ဒီမိုကရေစီပြည်ထောင်စု ပေါ်ပေါက်ရေးအတွက် ဓနုလူငယ်များ နှင့် ဒေသတွင်းရှိ ပြည်သူ့ကာကွယ်တပ်ဖွဲ့များ စုပေါင်းဖော်ဆောင်သွားမည် ဟုဆိုပြီး ပြီးခဲ့သည့် ဇူလိုင်လ ၂၉ ရက်တွင် ထုတ်ပြန်လာ ခြင်းဖြစ်သည်။

စစ်တပ်မှ အာဏာသိမ်းပြီးနောက်ပိုင်း သျှမ်းပြည်တွင်း ၂၀၂၃ ခုနှစ် ဇွန်လအထိ စစ်တပ် နှင့် လက်အောက်ခံအဖွဲ့များ က ဒေသခံ ပြည်သူ့နေအိမ် စုစုပေါင်း (၁၈၇) အိမ်ကို မီးရှို့ဖျက်ဆီးခဲ့ပြီး ထိုအထဲမှ ရွာငံမြို့နယ်ရှိ ဒေသခံ နေအိမ် (၂၀) ဖျက်ဆီးခဲ့ကြောင်း Data for Myanmar က ဇွန်လအတွင်းတွင် ထုတ်ပြန်ထားသည်။

Leave a Comments

- Advertisement -spot_img

Latest article