သျှမ်းပြည် မူဆယ်ခရိုင်၊ နမ့်ခမ်းမြို့နယ်တွင် အလုပ်သမားတစ်ဦးသည် အလုပ်ရှင် ဖြစ်သူကို သတ်ဖြတ်ပြီး ရွှေ၊ ငွေ ပစ္စည်းများစွာကို လုယက်ယူသွားသည့် ဖြစ်စဥ်ဖြစ်ပွားသွားကြောင်း စုံစမ်းသိရသည်။
.
ယမန်နေ့ (စက်တင်ဘာ ၂ ) ရက်တွင် နမ့်ခမ်းမြို့နယ်၊ အောင်မေတ္တာရပ်ကွက်တွင် ကုန်စုံဆိုင်ဖွင့်ထားသည့် ဦးအောင်သိန်း ဆိုသူကို အလုပ်သမားဖြစ်သူ က သတ်ဖြတ်ပြီး ရွှေငွေလုယူသွားခြင်းကို ခံရကြောင်း နီးစပ်သည့် အသက် ၃၀ ဝန်းကျင် အမျိုးသား တစ်ဦးက သျှမ်းသံတော်ဆင့်ကို ပြောသည်။
“သူအသတ်ခံရတာ ဒီနေ့ မနက်မှ သိကြတာ။ သူ့သားက သူ့ဆီ (ဦးအောင်သိန်း) ဆီလာတဲ့အချိန် ဆိုင်ဖွင့်တာ မတွေ့ရဘူး၊ ဖုန်းဆက်ကြည့်တော့လည်း မကိုင်ဘူး ဖြစ်နေလို့ တံခါးကို ဖျက်ပြီး ဝင်မှ သွေးအိုင်ထဲ သေနေတာ တွေ့ရတယ်၊ ကတ်ကြေးနဲ့ ထိုးသတ်သွားတယ်ထင်တယ်၊ သွေးပေနေတဲ့ ကတ်ကြေးလည်း အလောင်းနားမှာ တွေ့ရတယ်” ဟု သေဆုံးသူ နှင့် နီးစပ်သူ အမျိုးသား တစ်ဦးက သျှမ်းသံတော်ဆင့်ကို ပြောသည်။
ဦးအောင်သိန်း ဆိုသူသည် အလုပ်သမား နှင့် အတူတအိမ်တည်းနေထိုင်ပြီး၊ ၎င်းဆိုင်သည် နေအိမ်နှင့် တွဲလျက် ဖွင့်လှစ်ထားခြင်း ဖြစ်ပြီး လက်ရှိတွင် အလုပ်သမားဖြစ်သူလည်း ထွက်ပြေး လွတ်မြောက်နေကြောင်း သိရသည်။
အလောင်းကို တွေ့ရှိသည့် အချိန်၌ လည်ပင်း၊ ဦးခေါင်း နှင့် နောက်စေ့တို့တွင် ဒဏ်ရာများ တွေ့ရပြီး ရွှေ၊ ငွေပစ္စည်းများစွာလည်း ပျောက်ဆုံးနေလျက်ရှိကြောင်း သေဆုံးသူ နှင့် နီးစပ်သည့် အမျိုးသားက ဆက်ပြောသည်။
“ရွှေတွေ၊ ငွေတွေ အများကြီး ပျောက်သွားတယ်တဲ့၊ တိုင်ချက်ဖွင့်လား မဖွင့်လားတော့ မသိဘူး။ သူ့သားတွေလည်း အသုဘ ကိစ္စနဲ့ ရှုပ်နေကြတယ်။ ဒါကြောင့် ဆုံးရှုံးသွားတဲ့ ပမာဏတွေရဲ့ စာရင်း ကတော့ အတိအကျ မသိရသေးဘူး၊ များတာတော့ တကယ်များမှာ” ဟု ၎င်းက ပြောသည်။
လက်ရှိ ထွက်ပြေးလွတ်မြောက်နေသည့် အလုပ်သမားသည် အညာဒေသမှ လာရောက်အလုပ် လုပ်ကိုင်သူဟုသာ သိရကြောင်း နှင့် ကိုယ်ရေးရာဇဝင်များကို မိသားစုဝင်များက ဆက်လက် စုံစမ်းနေလျက် ရှိကြောင်းလည်း သိရသည်။
နမ့်ခမ်းမြို့နယ်သည် မြန်မာ – တရုတ်နယ်စပ်မြို့ဖြစ်ပြီး ခိုးဆိုးလုယက်မှုများ၊ တရားမဝင်လုပ်ငန်းများလည်း မကြာခဏ ဖြစ်ပွားလေ့ရှိသည့် ဒေသဖြစ်ကြောင်း ဒေသခံများထံမှ သိရသည်။
ထို့အပြင် လက်နက်ကိုင် တပ်ဖွဲ့များလည်း ပေါများသည့် ဒေသဖြစ်သည့်အတွက် စစ်ရေး ပဋိပက္ခများလည်း ပေါများသည့် ဒေသဖြစ်သည်။
