သျှမ်းပြည် မူဆယ်မြို့နယ် စယ်လန့်ကျေးရွာအုပ်စုရှိ လွိုင်တေးမိန်းတောင်ပေါ်တွင် စစ်ကောင်စီတပ်က ဂျက်လေယာဉ်ဖြင့် နှစ်ကြိမ်ထက်မနည်း လာရောက် ပျံဝဲသွားကြောင်း စုံစမ်းသိရသည်။
.
ယနေ့ (သြဂုတ် ၃၁ ရက်) နေ့လယ်ပိုင်း ၃ နာရီကျော်အချိန်တွင် စယ်လန့်ကျေးရွာအုပ်စုရှိ လွိုင်တေးမိန်းတောင်ပေါ်ဘုရားတွင် စစ်ကောင်စီတပ်က ဂျက်လေယာဉ်ဖြင့် နှစ်ကြိမ်ထက်မနည်း လာရောက်ပျံဝဲသွားကြောင်း စယ်လန့်ဒေသခံ အမျိုးသားတစ်ဦးက ပြောသည်။
“လွိုင်တေးမိန်းကို လာပစ်တာတော့ မဟုတ်ဘူး။ နမ့်ဖက်ကာ ဆွမ်လုံဘက်မှာ သွားပစ်ပြီး ပြန်လာတာ။ နှစ်ကြိမ် လာဝဲသွားတယ်“ ဟု ၎င်း ဒေသခံတစ်ဦးက ပြောသည်။
ပြီးခဲ့သည့် (သြဂုတ် ၂၉ ရက်) မွန်းလွဲ ၄ နာရီဝန်းကျင်တွင် စစ်ကောင်စီတပ်သည် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တပ်ဖွဲ့ စခန်းချနေထိုင်သည့် လွိုင်တေးမိန်းတောင်ပေါ်ကို ဗုံး ၂ လုံးကြဲချခဲ့သည်။
အဆိုပါ စစ်ကောင်စီတပ်မှ လေယာဉ်ပျံဝဲခြင်းနှင့် ပတ်သက်ပြီး စယ်လန့်ကျေးရွာနေ ပြည်သူများက လူနေအိမ်ပေါ် ဗုံးကြဲချမည်ကို စိုးရိမ်နေကြောင်း စယ်လန့်ဒေသခံ အမျိုးသမီးတစ်ဦးက ပြောသည်။
“ ဒီရက်ပိုင်း အိမ်ထဲကနေ အိမ်ပြင်ကို မထွက်ရဲဘူး။ လက်နက်ကိုင်တွေက အပြိုင်အဆိုင် အင်အားဖြည့်နေတာ။ လေယာဉ်နဲ့ ဗုံးလာကြဲမှာကိုဘဲ ကြောက်တယ်။ နေအိမ်ပေါ် လက်နက်ကြီးတွေ ကျပေါက်ကွဲမှာဘဲ စိုးရိမ်တယ် “ ဟု ၎င်း အမျိုးသမီးတစ်ဦးက ပြောသည်။
TNLA နှင့် စစ်ကောင်စီတပ်တို့သည် ပြီးခဲ့သည့် ဇူလိုင်လ ကုန်ပိုင်းမှ စတင်ပြီး မူဆယ်မြို့နယ်အတွင်း စစ်ရေးတင်းမာမှု စတင်ခဲ့ရာ ယနေ့အချိန်ထိ တစ်လကျော်ကြာခဲ့ပြီ ဖြစ်သည်။
Leave a Comments