သျှမ်းပြည် ကွတ်ခိုင်မြို့နယ် တာမိုးညဲမြို့အတွင်း နေထိုင်သည့် လူငယ် ၂ ဦးကို ကိုးကန့်တပ်ဖွဲ့ MNDAA တပ်သားက နေအိမ်တံခါးလာခေါက်သည်ကို မဖွင့်ပေးသောကြောင့် သေနတ်ဖြင့် ပစ်သတ်လိုက်ကြောင်း စုံစမ်းသိရသည်။
.
ယမန်နေ့ သြဂုတ် ၃၀ ရက် ညအချိန်တွင် တာမိုးညဲမြို့အတွင်း နေထိုင်သည့် လူငယ် ၂ ဦးကို ကိုးကန့်တပ်ဖွဲ့ MNDAA တပ်သားက နေအိမ်တံခါးလာခေါက်သည်ကို တံခါး မဖွင့်ပေးသောကြောင့် သေနတ်ဖြင့် ပစ်ခတ်ခဲ့ပြီး ၁ ဦးသေဆုံး၍ ၁ ဦး ထိခိုက်ဒဏ်ရာရရှိခဲ့ကြောင်း အသက် ၅၀ ဝန်းကျင် ဒေသခံအမျိုးသား တစ်ဦးက ပြောသည်။
“သူတို့ ရွာထဲဝင်ပြီး လူလာဖမ်းတာ။ အဲ့ လူငယ် ၂ ယောက်ရှိတဲ့ အိမ်ကို တံခါးခေါက်တယ်။ တံခါးမဖွင့်ပေးလို့ဆိုပြီး ကိုးကန့်တပ်သားတွေက အိမ်ပြင်ကနေ သေနတ်နဲ့ ပစ်ထည့်လိုက်တာ။ တစ်ယောက် လည်ပင်းနားထိသွားလို့ ပွဲချင်းပြီးသွားတယ်။ တစ်ယောက်ကတော့ လက်ထိပြီး ကျိုးသွားတယ် “ ဟု ၎င်းဒေသခံ တစ်ဦးက ပြောသည်။
အဆိုပါ သေနတ်ပစ်ခတ်ခံရသည့် လူငယ် ၂ ဦးသည် သာမာန်အရပ်သား ဖြစ်သည်။
လူငယ်တစ်ဦး သေနတ်ပစ်ခတ်ပြီး သေဆုံးမှုနှင့် ပတ်သက်ပြီး ကိုးကန့်တပ်ဖွဲ့ MNDAA တပ်က အရေးယူဆောင်ရွက်ပေးခြင်းမရှိသေးကြောင်း သိရသည်။
Leave a Comments