သျှမ်းပြည် သိန္နီမြို့နယ်အတွင်း ပြည်သူအများ အသုံးပြုသည့် လမ်းကြောင်းကို စစ်ကောင်စီတပ်က မြေကော်ကားဖြင့် ဖျက်ဆီးလိုက်ကြောင်း စုံစမ်းသိရသည်။
.
ယမန်နေ့ (သြဂုတ် ၂၉) ရက် ညနေပိုင်း ၄ နာရီခွဲတွင် သိန္နီမြို့နယ် မိုင်းလီကျေးရွာအုပ်စုရှိ ပြည်သူလူထု အသုံးပြုသည့် လမ်းကြောင်းကို စစ်ကောင်စီတပ် စကခ ၁၆ မှ လူအင်အား ၁၅ ဦးခန့်သုံးပြီး မြေကော်ကားဖြင့် လမ်းကိုဖျက်ဆီးခဲ့ကြောင်း သိန္နီမြို့ဒေသခံ အမျိုးသားတစ်ဦး က သျှမ်းသံတော်ဆင့်ကို ပြောသည်။
“ စစ်ကောင်စီက မြေကော်ကားတွေနဲ့ တူးနေတာ။ ဒီလမ်းက ကျနော်တို့အမြဲတမ်း အသုံးပြုနေတဲ့ လမ်းဖြစ်တယ်။ မြို့ပေါ်ကို တိုက်ရိုက် သွားလာလို့ရတဲ့ လမ်းဖြစ်တော့ အခုကျနော်တို့ သွားလာလို့ မရတော့ဘူး။ သူတို့တူးထားတာ အနက်က လူနှစ်ယောက်စာ အရပ်လောက်ရှိတယ်။ အကျယ်က ၄ လံစာလောက် ရှိတယ် “ ဟု ၎င်း အမျိုးသားက ပြောသည်။
အဆိုပါ လမ်းကြောင်းကို စစ်ကောင်စီတပ်က မြေကော်ကားဖြင့် ဖျက်ဆီးခဲ့သည့်အတွက် စုစုပေါင်း ကျေးရွာ ၇ ရွာခန့်မှ အိမ်ခြေ ၂၀၀ က ပြည်သူများ ဖြတ်သန်းသွားလာ၍ မရခဲ့တော့ပေ။
အလားတူ သိန္နီမြို့ဒေသခံ အသက် ၃၀ နှစ်အရွယ် အမျိုးသားတဦးက “ ဘာကြောင့် အခုလိုမျိုး လမ်းတွေကို လာဖျက်ဆီးတာတော့ ကျနော်တို့လည်း သေချာမသိရဘူး။ အခုကျနော်တို့ ရိတ်သိမ်းထားတဲ့ ကောက်ပဲသီးနှံကို မြို့ပေါ်တင်ပို့ဖို့အတွက် အခက်ခဲ ရှိနေတယ်။ သွားလာလို့ မရတော့ဘူး “ ဟု ၎င်းက ဆိုသည်။
သိန္နီမြို့နယ်တွင် စစ်ကောင်စီတပ်အပြင် တိုင်းရင်းသားလက်နက်ကိုင်တပ်ဖွဲ့များ ဖြစ်သည့် ကိုးကန့်တပ်ဖွဲ့ (MNDAA) နှင့် တအာင်း (ပလောင်) အမျိုးသားလွတ်မြောက်ရေးတပ်မတော် (TNLA) က လှုပ်ရှားနေလျက်ရှိကြောင်း သိရသည်။
