“ဘယ်လိုပြောရမှန်းမသိတော့ဘူး….။ အရမ်းခံစားရလို့ “ ဆိုပြီး နန်းစိန်တယောက် ဝမ်းနည်းငိုယိုနေပြီး ရင်ဖွင့်လာသည်။

.

သူမဟာ သျှမ်းပြည် ပင်လောင်းမြို့မှာ နေထိုင်တဲ့ ကလေးမိခင်တစ်ဦးပါ။

ယမန်နေ့ (သြဂုတ် ၂၉) ရက် နံနက် ၁၀ နာရီဝန်းကျင်တွင် ပင်လောင်းမြို့မဈေးထဲသို့ မိခင်ဖြစ်သူ နန်းစိန်သည် အသက် (၂) နှစ်အရွယ် သမီးလေးကို ဖိနပ်ဝယ်ရန် လိုက်ပို့နေစဥ် မူးယစ်ဆေးသုံးစွဲပြီး ဆေးကြောင်နေသော အမျိုးသားတစ်ဦးက ထင်းခွဲဓားမကြီးကို ကိုင်ပြီး သမီးငယ်ခေါင်းကို ခုတ်လိုက်သည်။

ဓားခုတ်ခံရသည့် အသက် ၂ နှစ်အရွယ် သမီးငယ် နန်းခင်လပြည့်သည် မိခင် နန်းစိန် နှင့် ဖခင် ခွန်လွန်းစိန် တို့၏ သမီးတစ်ဦးဖြစ်သည့်အလျောက် မိဘ ၂ ပါးလုံးက ရူးမတတ် ယူကြုံးမရ ဖြစ်နေသည်။

သမီးလေး နန်းခင်လပြည့်သည် ကလေးငယ် ပီပီ လှပသည့် ဖိနပ်ကိုလိုချင်ခဲ့ပြီး မိဘများထံ ပူဆာခဲ့သည်မှာ ရက်အနည်းငယ်ရှိခဲ့ပြီး၊ ထို့ကြောင့် ထိုနေ့မှာ မိခင်ဖြစ်သူက ဖိနပ်ဆိုင်သို့ လိုက်ပို့ခဲ့ပြီး ယခုလို ဓားခုတ်ခံရမှု ဖြစ်သွားသည်။

“သမီးလေးက ဒီဖိနပ်ကို အရင်တခါကတည်းက လိုချင်တာ၊ သူ့ခြေထောက်နဲ့မတော်လို့ မဝယ်ခဲ့ရဘူး။ အခုကျတော့ ထပ်တောင်းဆိုတော့ သမီးက အရမ်းကြိုက်တယ်ဆိုပြီး ဝယ်ပေးလိုက်တာ” လို့ ဖခင်ဖြစ်သူ ခွန်လွန်းစိန် က ငိုသံကို ထိန်းချုပ်ထားပြီး တုန်ရီတဲ့လေသံဖြင့် ပြောသည်။

မိခင် နန်းစိန် တယောက် ဖိနပ်ဆိုင်အတွင်း ဖိနပ်ယူနေချိန် သမီး နန်းခင်လပြည့်က အဖိုးဖြစ်သူကို စျေးအတွင်း တွေ့ရှိသဖြင့် ပြေးသွားစဥ် မူးယစ်ဆေးကြောင်သူက ဓားမကြီးဖြင့် သမီးလေး၏ ခေါင်းကို အားရပါးရ ခုတ်လိုက်သည်။

“သမီးလေးက အဖိုးကို မြင်တော့ ပြေးသွားချိန်မှာ ဖြစ်တာ။ အကွာအဝေးက ဘယ်လောက်မှ မရှိဘူး။ ခေါင်းကို ခုတ်ခံရပြီး ကလေးက လှဲကျသွားတယ်” ဟု ခွန်လွန်းစိန်က ဝမ်းနည်းသည့် လေသံဖြင့်ပြောသည်။

သွေးအိုင်ထဲ လှဲကျနေသည့် သမီးငယ်ကို မြင်ရချိန် မိခင်ဖြစ်သူက လန့်ပြီးအော်ငိုကာ သူမ ဝတ်ထားသော အင်္ကျီကို ချက်ချင်းချွတ်ပြီး သွေးထွက်နေသည့် သမီးငယ်၏ ဦးခေါင်းကို အုပ်ကာ ဆေးရုံသို့ ဆိုင်ကယ်ဖြင့် အမြန်မောင်းသွားခဲ့သည်။

သို့ပေမယ့် သမီးလေး နန်းခင်လပြည့်တယောက် ကံမကောင်းခဲ့ပေ။

“ စျေးနားက ဆိုင်ကယ်တစီးနဲ့ ဆေးရုံကို အမြန်မောင်းသွားတယ်။ ဆိုင်ကယ်ပေါ်မှာကတည်းက သမီးလေးက မျောနေပြီး ဆေးရုံရောက်တော့ အသက်မပါလာတော့ဘူး” ဟု ဖခင်ဖြစ်သူက တုန်ရီပြီး ငိုနေသည့်အသံဖြင့် ပြောပြသည်။

သမီးလေး နန်းခင်လပြည့်ကို ရက်စက်စွာ ဓားဖြင့်ခုတ်သွားသည့် အမျိုးသားကို ပြည်သူများနှင့် ရဲတပ်ဖွဲ့က ပူးပေါင်းပြီး ဖမ်းဆီးနိုင်ခဲ့သည်။

ထိုလူသတ်မှု ကျူးလွန်သည့် အမျိုးသားသည် စိတ်မနှံ့သူမဟုတ်ဘဲ မူးယစ်ဆေးဝါး အလွန်အကျွံသုံးစွဲပြီး သတိစိတ်လွတ်နေသူဖြစ်သည်။

“ စိတ်မနှံ့တာတော့ မဟုတ်ဘူး။ အသိစိတ်ရှိတယ်။ ဘူးခွံတွေ လိုက်ကောက်ပြီး ရောင်းရ၊ မရ သူသိတယ်လေ။ အဲ့လိုလိုက်ကောက်ပြီး ရောင်းလို့ရလာတဲ့ ပိုက်ဆံကို ဘိန်းရှူတာ နေမှာပေါ့။ ဆေးကြောင်တာ နေမှာပေါ့ “ ဟု လူသတ်ကျူးလွန်သူအကြောင်းကို ခွန်လွန်းစိန်က ပြောသည်။

စစ်တပ်က အာဏာသိမ်းပြီးနောက်ပိုင်း ပင်လောင်းမြို့နယ်တွင် မူးယစ်ဆေးဝါး သုံးစွဲသူများ အဆမတန် ပေါများလာပြီး လမ်းသွားလမ်းလာ မူးယစ်သုံးစွဲသူ အသိချင်းတွေ့ဆုံပါက “ မင်းဘယ်လောက်ဖိုး ယူမှာလဲ “ ဆိုပြီး မေးရဲလောက်သည့်အထိ ပေါ်ပေါ်ထင်ထင် ရောင်းချနေသည်။

ပင်လောင်းမြို့နယ်တွင် မူးယစ်ဆေးဝါးသုံးစွဲသူသည် အိမ်တိုင်းနီးပါးရှိပြီး၊ ၈၀ ရာခိုင်နှုန်းခန့် ပေါများလာကြောင်း ဒေသခံ အမျိုးသားများ၏ ပြောပြချက်အရ သိရသည်။

“၈၀ ရာခိုင်နှုန်း လောက်ရှိတယ်။ ရွာတိုင်း၊ အိမ်တိုင်း မှာ မူးယစ်ဆေးသုံးစွဲသူရှိတယ်။ လမ်းသွားနေရင် သူတို့အချင်းချင်း “မင်းဘယ်လောက်ဖိုး ယူမှာလဲ “ လှမ်းမေးတာတွေ ရှိတယ်။ အဲ့လောက်ထိတောင် ပေါ်ပေါ်ထင်ထင် ဖြစ်လာတာပေါ့ “ ဟု အသက် ၃၀ အရွယ် အမျိုးသားက လက်ရှိ ပင်လောင်းအခြေအနေ ကို ပြောသည်။

ပင်လောင်းမြို့နယ်သည် ပအိုဝ်းပြည်သူ့စစ် PNO ထိန်းချုပ်သည့် နယ်မြေဖြစ်ပြီး၊ PNO သည် မူးယစ်ဆေး သုံးစွဲသူများကို ဖမ်းဆီးပြီး ငွေဖြင့် လာရောက်ထုတ်ခိုင်းခြင်း၊ ငွေမပေးနိုင်လျှင် ရိုက်နှက်ပြီး ပြန်လွှတ်ပေးခဲ့ သော်လည်း မူးယစ်ဆေးရောင်းဝယ်သူများကို တကြိမ်တခါမျှ ဖမ်းဆီးခြင်း မရှိခဲ့ပေ။

ထို့ကြောင့် ပင်လောင်းမြို့နယ်တွင် မူးယစ်ဆေးဝါး ပပျောက်သွားမည် မဟုတ်ဘဲ ဆက်ပြီး ပိုများလာနိုင်မည် ဟု ပင်လောင်းဒေသခံ ခွန်အုံးက မှတ်ချက်ပြုလိုက်သည်။

“ဆေးသမားတွေကို PNO က ဖမ်းတယ်။ ရောင်းသူတော့ မဖမ်းဘူး။ သူတို့မိရင် ရိုက်တယ် ငွေကျပ်သိန်း ၂၀ နဲ့ ပြန်ရွေးခိုင်းတယ် ။ ငွေမပေးနိုင်ရင်လည်း ရှိတာရောင်း ချေးငှား ပြန်ရွေးခိုင်းတယ်။ ရောင်းသူမဖမ်းတာဟာ PNO က တမြင်မူးယစ်ဆေးသမားကို မွေးနေတာပဲ” ဟု ခွန်အုံးက ထောက်ပြပြောဆိုသည်။

မူးယစ်ဆေးသားကောင် တယောက်၏ လက်ချက်ကြောင့် အသက်ဆုံးရှုံးခဲ့ရသည့် နန်းခင်လပြည့် အတွက် မိသားစုဝင်များက အသက်ပျောက်ဆွမ်း ကို ယနေ့ (သြဂုတ် ၃၀) ရက်တွင် ပြုလုပ်သည်။
ပင်လောင်းမြို့နယ်အတွင်း မူးယစ်ဆေးသမားများ ကင်းစင်စေပြီး၊ သမီးလေး နန်းခင်လပြည့် လို ထပ်မဖြစ်လာရန် အတွက် ဒေသခံ အားလုံးအနေဖြင့် မူးယစ်ဆေးပပျောက်ရန် အထူးလုပ်ဆောင်သင့်ကြောင်း ခွန်လွန်းစိန် က ပြောသည်။

နိုင်ငံရေး ရှုပ်ထွေးနေချိန် မူးယစ်ဆေးဝါး ပပျောက်ရန် သက်ဆိုင်ရာအာဏာပိုင်က စိတ်ဝင်စားမှုနည်းပါးပြီး၊ အာဏာပိုင်များက မူးယစ်ဆေးဝါး များပြားလာအောင် တမြင်ဖန်တီးနေကြသည့် ပုံစံမျိုးဖြစ်နေသည်။

ထို့ကြောင့် မူးယစ်ဆေးသမားတယောက်ကြောင့် အသတ်ခံလိုက်ရသည့် သမီးလေး အတွက် တာဝန်ယူမှု၊ တာဝန်ခံမှုကို မည်သည့်အဖွဲ့အစည်း အာဏာပိုင်မှ တာဝန်ယူပေးမည် မဟုတ်ကြောင်း၊ မူးယစ်ဆေးဟူသမျှကို ပြည်သူများအနေဖြင့် ကိုယ်ထူကိုယ်ထ တိုက်ဖျက်ရန်လိုအပ်သည်။

“ဒီဟာနဲ့ ပတ်သက်ပြီး ကျနော်တို့ကတော့ ဘယ်သူ့ကိုမှ အပြစ်မတင်ပါဘူး။ တာဝန်ယူမှု၊ တာဝန်ခံမှု အဲ့ဒါတွေက ဘာမှ မမျှော်လင့်ပါဘူး။ သူ့အပြစ်နဲ့သူ သွားမှာပါ ဒီလောက်ပါပဲ။ ဒါကတော့ မူးယစ်ဆေးဝါးကြောင့်ပါပဲ “ ဖခင် ခွန်လွန်းစိန် က စကားပြောဆိုရန် အင်အားချိနဲ့စွာဖြင့် ပြောသည်။