တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တပ်ဖွဲ့ စခန်းချ နေထိုင်သည့် သျှမ်းပြည် မူဆယ်ခရိုင်၊ မူဆယ်မြို့နယ်မှ စယ်လန့်ကျေးရွာအုပ်စုရှိ လွိုင်တေးမိန်းတောင်ပေါ်ကို စစ်ကောင်စီတပ်က ယနေ့ (သြဂုတ် ၂၉) ရက် မွန်းလွဲ ၄ နာရီဝန်းကျင်၌ ဂျက်လေယာဥ်ဖြင့် ဗုံးကြဲ တိုက်ခိုက်ခဲ့ကြောင်း စုံစမ်းသိရသည်။

.

ယနေ့ သြဂုတ်လ ၂၉ ရက် မွန်းလွဲပိုင်း ၄ နာရီဝန်းကျင်အချိန်တွင် အာဏာသိမ်း စစ်ကောင်စီ တပ်ဖွဲ့သည် စစ်လေယာဥ်တစ်စီးဖြင့် လွိုင်တေးမိန်းကို ဗုံး ၂ လုံးလာရောက် ကြဲချ တိုက်ခိုက်ခဲ့ကြောင်း ဒေသအတွင်း မျက်မြင်တွေ့ရသည့် အသက် ၂၀ ကျော် အမျိုးသား တစ်ဦးက သျှမ်းသံတော်ဆင့်ကိုပြောသည်။

“စစ်လေယာဥ် တစ်စီးက နမ့်ခမ်းဘက်ကနေ တက်လာပြီး လွိုင်တေးမိန်းဘက်ကို ဗုံးနှစ်လုံး ကြဲချသွားတယ်။ အဲ့ကနေ ဖြတ်သွားပြီး နောက်တစ်ခေါက် ပြန်လှည့်လာပြီး နောက်ထပ် ဗုံး ၂ လုံးကို ထပ်ကြဲချ သွားတယ်။ နှစ်ခေါက် ကြဲချတာပေါ့” ဟု မျက်မြင်တွေ့ရသည့် အသက် ၂၀ ကျော် အမျိုးသား တစ်ဦးက သျှမ်းသံတော်ဆင့်ကို ပြောသည်။

ယင်းကဲ့သို့ လေယာဥ်ဖြင့် ဗုံးကြဲတိုက်ခိုက်မှုကြောင့် ထိခိုက်ကျဆုံးမှု ရှိ/မရှိ နှင့် ပတ်သက်ပြီး သျှမ်းသံတော်ဆင့် အနေဖြင့် သီးခြား အတည်ပြုနိုင်ခြင်း မရှိသေးပေ။

ယမန်နေ့ သြဂုတ်လ ၂၈ ရက်နေ့မှ စတင်ကာ ယနေ့ ၂၉ ရက်နေ့ အထိ စစ်ကောင်စီတပ်မှ လွိုင်တေးမိန်းတောင် သို့ လက်နက်ကြီးဖြင့် အဆက်မပြတ် ပစ်ခတ်နေပြီး စစ်လေယာဥ်ဖြင့်ပါ လာရောက်တိုက်ခိုက်ခြင်းဖြစ်ကြောင်း သိရသည်။

လက်ရှိတွင် ဒေသခံများအနေဖြင့် အိမ်ပြင်မထွက်ရဲကြသလို လက်နက်ကြီး အိမ်ပေါ်ကျမည်ကို စိုးရိမ် ကြောက်လန့် နေရကြောင်းလည်း မူဆယ်မြို့ခံ အသက် (၅၀) ကျော် အမျိုးသမီး တစ်ဦးက သျှမ်းသံတော်ဆင့်ကို ပြောသည်။

“အိမ်ထဲကနေ အိမ်ပြင်တွေ မထွက်ရဲတော့ဘူး။ လေယာဥ်နဲ့ပါ လာတိုက်ခိုက်နေတော့ အိမ်ပေါ်ကို လက်နက်ကြီး ကျမလား၊ လေယာဥ်က အိမ်ပေါ်ကနေပဲ ဖြတ်သွားတော့ အဲ့ကနေ ဗုံးကြဲချမလားဆိုတာတွေကို ကြောက်ရတယ်၊ ရွာထဲကို TNLA ဝင်မနေရင် ပိုကောင်းမယ်။ အဲ့ လွိုင်တေးမိန်းတောင်ပေါ်ကနေလည်း ဆင်းလာပြီးတော့ တခြား နေရာမှာသာ ပစ်ခတ်ကြရင် ရွာကိုလည်း မထိတော့ဘူးပေါ့” ဟု အသက် (၅၀) ကျော် မူဆယ်မြို့နယ် ဒေသခံ အမျိုးသမီး တစ်ဦးက သျှမ်းသံတော်ဆင့်ကို ပြောသည်။

လက်ရှိအချိန်တွင် စစ်ကောင်စီတပ်မှ မူဆယ်မြို့နယ်၊ ဆုတောင်းတောင်မှ သော်လည်းကောင်း၊ ၁၀၅ မိုင်မှ သော်လည်းကောင်း လက်နက်ကြီးဖြင့် ပစ်ခတ်နေလျက်ရှိပြီး TNLA တပ်ဖွဲ့ကလည်း မူဆယ်မြို့နယ်၊ နောင်ဆိုင် ကျေးရွာမှ တစ်ဆင့် စယ်လန့်ကျေးရွာဘက်သို့ စစ်အင်အား ဖြည့်တင်းမှုများ ရှိနေကြောင်းလည်း သိရသည်။

TNLA နှင့် စစ်ကောင်စီတပ်တို့သည် ပြီးခဲ့သည့် ဇူလိုင်လ ကုန်ပိုင်းမှ စတင်ပြီး မူဆယ်မြို့နယ်အတွင်း စစ်ရေးတင်းမာမှု စတင်ခဲ့ရာ ယနေ့အချိန်ထိ တစ်လကျော်ကြာခဲ့ပြီ ဖြစ်သည်။