သျှမ်းပြည် မူဆယ်မြို့နယ် စယ်လန့်ကျေးရွာအုပ်စုရှိ သာသနာ့နယ်မြေ ဖြစ်သည့် လွိုင်တေးမိန်း တောင်ပေါ် ဘုန်းကြီးကျောင်းသို့ လက်နက်ကြီးကျ မီးစွဲလောင်ကြောင်း သတင်းသိရသည်။
.
ယမန်နေ့ (သြဂုတ် ၂၈) ရက် နံနက် ၁၁ နာရီဝန်းကျင်မှ စတင်ကာ အာဏာသိမ်း စစ်ကောင်စီတပ်ဖွဲ့သည် လွိုင်တေးမိန်း တောင်သို့ လက်နက်ကြီးများဖြင့် အဆက်မပြတ် ပစ်ခတ်ခဲ့သည့် အတွက် တောင်ပေါ်ရှိ ဘုန်းကြီးကျောင်း မီးလောင်သွားကြောင်း ဒေသခံများက သျှမ်းသံတော်ဆင့်ကို ပြောသည်။
“စစ်ကောင်စီက လက်နက်ကြီးနဲ့ အဆက်မပြတ်ပစ်တာ။ ဆုတောင်းတောင်ကနေ ပစ်တယ်၊ ၁၀၅ မိုင်စခန်း ကနေလည်း ပစ်ကူတယ်။ လွိုင်တေးမိန်းတောင်ပေါ်က ဘုန်းကြီးကျောင်း ရှိတဲ့နေရာမှာ မီးခိုးတွေ ထွက်လာပြီး ဒီနေ့မနက်မှ ဘုန်းကြီးကျောင်းဆောင် မီးလောင်မှန်း သိရတာ” ဟု မူဆယ်မြို့ ဒေသခံ အသက် ၅၀ ကျော် အမျိုးသား တစ်ဦးက သျှမ်းသံတော်ဆင့်ကို ပြောသည်။
အဆိုပါ မီးလောင်သည့် လွိုင်တေးမိန်းတောင်ပေါ်မှ ဘုန်းကြီးကျောင်းဆောင်သည် ယခင် ဘုန်းကြီး သီတင်းသုံး နေထိုင်ခဲ့သည့် သစ်သားကျောင်းဆောင်ဟောင်းဖြစ်ပြီး နှစ်ပေါင်း ၁၈ နှစ်ကြာ တည်ဆောက်ထားသည့် ကျောင်းဆောင်ဖြစ်ကြောင်းလည်း သိရသည်။
လွိုင်တေးမိန်းတောင်ပေါ်၌ စခန်းချ နေထိုင်နေကြသည့် တအာင်း (ပလောင်) အမျိုးသား လွတ်မြောက်ရေး တပ်မတော် ကြောင့် စစ်ကောင်စီမှ လက်နက်ကြီးဖြင့် လှမ်းပစ်ကြောင်း ဒေသခံများက ပြောဆို သုံးသပ်ကြသည်။
“အဲ့တောင် (လွိုင်တေးမိန်း) မှာ TNLA က သွားနေနေတာလေ။ အရင် မြို့မပြည်သူ့စစ်နဲ့ တိုက်ပွဲပြီး ကတည်းက TNLA တွေက တောင်ပေါ်မှာ သွားပြီး နေရာယူထားတာ။ အဲ့ကြောင့် စစ်ကောင်စီက လက်နက်ကြီးနဲ့ လှမ်းပစ်ခဲ့ တာပေါ့။ အမှန်ဆို အဲ့ဒီတောင်ပေါ်က သာသနာ နယ်မြေဖြစ်တယ်။ ဘယ်လက်နက်ကိုင် တပ်ဖွဲ့မှ မနေသင့်ဘူး။ နေစရာအကြောင်းလည်း မရှိဘူး” ဟု ၎င်းအမျိုးသားက ဆက်ဆိုသည်။
လက်နက်ကြီးကျ မီးစွဲလောင်မှုကြောင့် ဆုံးရှုံးမှု တန်ဖိုး စုစုပေါင်းသည် ကျပ်သိန်းပေါင်း ၁၀၀ ကျော် ရှိနိုင်ကြောင်း နှင့် လက်ရှိ အချိန်အထိ နှစ်ဘက်စစ်ရေး တင်းမာနေဆဲ ဖြစ်ကြောင်း သိရသည်။
လက်ရှိအချိန်တွင် စစ်ကောင်စီတပ်မှ မူဆယ်မြို့နယ်၊ ဆုတောင်းတောင်မှ သော်လည်းကောင်း၊ ၁၀၅ မိုင်မှ သော်လည်းကောင်း လက်နက်ကြီးဖြင့် ပစ်ခတ်နေလျက်ရှိပြီး TNLA တပ်ဖွဲ့ကလည်း မူဆယ်မြို့နယ်၊ နောင်ဆိုင် ကျေးရွာမှ တစ်ဆင့် စယ်လန့်ကျေးရွာဘက်သို့ စစ်အင်အား ဖြည့်တင်းမှုများ ရှိနေကြောင်း အသက် ၂၀ ကျော် ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“မနေ့က တနေကုန် ညအထိ လက်နက်ကြီးနဲ့ ပစ်ကြတယ်။ ဒီနေ့လည်း မိုးမလင်းခင်ကတည်းက လက်နက်ကြီး နဲ့ လှမ်းပစ်နေတာ။ TNLA ဘက်ကလည်း နောင်ဆိုင်ဘက်ကနေ စယ်လန့်ရွာ၊ လွိုင်တေးမိန်းတောင်ခြေနားကို စစ်အင်အားတွေ ဖြည့်လာနေတာ အများကြီးပဲ၊ တိုက်ပွဲတွေ ပိုမိုပြင်းထန်လာမှာတော့ ကြောက်တယ်၊ ရွာသားတွေကပဲ တိုက်ပွဲကြား ပိတ်မိနေတာလေ” ဟု အသက် ၂၀ ကျော် ဒေသခံ အမျိုးသား တစ်ဦးက ပြောသည်။
ယင်းကဲ့သို့ လက်နက်ကိုင်တပ်ဖွဲ့များ၊ စစ်သားများ သာသနာ့နယ်မြေ အနီးပတ်ဝန်းကျင်တွင် တိုက်ပွဲပစ်ခတ်မှု ဖြစ်ပွားခြင်း ၊ ကျေးရွာအတွင်း လူထု နှင့် အတူ ရောနှော နေထိုင်ခြင်း တို့သည် ဂျီနီဗာ ကွန်ဗင်းရှင်း (Geneva Convention) ဥပဒေ နှင့် ဆန့်ကျင်သည့်အပြင် စစ်ရာဇဝတ်မှု မြောက်ကြောင်း လည်း သိရသည်။
