သျှမ်းပြည် မူဆယ်ခရိုင်၊ မူဆယ်မြို့နယ်မှ သာသနာ့နယ်မြေဖြစ်သည့် လွိုင်တေးမိန်းတောင်ပေါ်သို့ စစ်ကောင်စီ တပ်ဖွဲ့က လက်နက်ကြီးဖြင့် တစ်ဖက်သတ် ပစ်နေကြောင်း သတင်းသိရသည်။
.
ယနေ့ (သြဂုတ် ၂၈) ရက် နံနက်ပိုင်း ၁၁ နာရီဝန်းကျင်မှ စတင်ကာ ဆုတောင်းတောင်အရှေ့ဘက် စခန်းချ တပ်စွဲ ထားသည့် စစ်ကောင်စီတပ်သည် စယ်လန့်ကျေးရွာအုပ်စုရှိ လွိုင်တေးမိန်းတောင်ပေါ်သို့ လက်နက်ကြီးဖြင့် ပစ်ခတ်နေကြောင်း ဒေသခံများက သျှမ်းသံတော်ဆင့်ကို ပြောသည်။
“လွိုင်တေးမိန်းက သာသနာ့ နယ်မြေဖြစ်တယ်၊ ဘယ်သူတွေပဲ တိုက်ပွဲဖြစ်နေပါစေ ဒီလို သာသနာပိုင်နယ်မြေမှာ ဖြစ်တာမျိုးတော့ မလုပ်သင့်ဘူး မြင်မိတာပဲ၊ ဆုတောင်းတောင်ကနေ လွိုင်တေးမိန်းဘက်ကို လက်နက်ကြီးတွေ ပစ်နေတာ ၁၀ ချက်ထက် မနည်းတော့ဘူး။ တောင်ပေါ်မှာရှိတဲ့ ဘုန်းကြီးကျောင်းဆောင်လည်း ထိတာထင်တယ်။ မီးခိုးတွေ လှမ်းမြင်နေရတယ်” ဟု မူဆယ်မြို့ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
လက်ရှိတွင် လက်နက်ကြီးသံများ ဆက်လက် ကြားနေရသေးသည့်အပြင် အဆိုပါ လွိုင်တေးမိန်းတောင်တက် လှမ်းတစ်လျှောက်ကိုလည်း TNLA တပ်ဖွဲ့က မိုင်းထောင်ထားသည့်အတွက် တောင်ပေါ် ထိခိုက်ပျက်စီးမှု များကို အတည်မပြုနိုင်သေးကြောင်း ဒေသခံများက သျှမ်းသံတော်ဆင့်ကို ဆက်ပြောသည်။
ပြီးခဲ့သည့် ဇူလိုင်လနှောင်းပိုင်း စစ်ကောင်စီ ပူးပေါင်းတပ်ဖွဲ့ မြို့မ ပြည်သူ့စစ်တပ်ဖွဲ့ နှင့် စယ်လန့်ကျေးရွာအတွင်း ထိတွေ့တိုက်ပွဲ ဖြစ်ခဲ့အပြီး တအာင်း (ပလောင်) အမျိုးသား တပ်မတော် (TNLA) က လွိုင်တေးမိန်း တောင်ခြေ နှင့် တောင်ပေါ်နေရာသို့ တပ်စွဲနေရာယူထားကြောင်းလည်း မူဆယ်မြို့ ဒေသခံ လူငယ် တစ်ဦးက သျှမ်းသံတော်ဆင့်ကို ပြောသည်။
“TNLA တပ်သားတွေက ကျောက်ခဲတွေကို ကျောက်သယ်ကားအပြာနဲ့ လွိုင်တေးမိန်းတောင်ပေါ် သယ်သွားတာ မြင်ရတယ်။ သူတို့က တောင်ပေါ်မှာ တပ်စခန်း တည်ဆောက်နေတာလို့လည်း သတင်းကြားမိတယ်။ အခုလည်း သူတို့တောင်ပေါ်မှာ ရှိလို့ စကစက ပစ်တာ။ ဘာလို့ သာသနာ့နယ်မြေမှာ လာပစ်နေကြတာလဲ၊ လွိုင်တေးမိန်း တောင်ပေါ်မှာ TNLA ဘာလို့ လာနေနေတာလဲ နားမလည်ဘူး” ဟု ဒေသခံ လူငယ် တစ်ဦးက သျှမ်းသံတော်ဆင့်ကို ပြောသည်။
ထိုသာသနာ့နယ်မြေအတွင်း စစ်ရေး ပဋိပက္ခများ ရှိနေခြင်း နှင့် ပတ်သက်ပြီး မဖြစ်သင့်ကြောင်း နှင့် စစ်ရေး စစ်ရာဥပဒေများအရ ကျူးလွန်မှုဖြစ်နေကြောင်းလည်း ဒေသခံများက ပြောဆို သုံးသပ်နေကြသည်။
ထို့အပြင် ယမန်နေ့ သြဂုတ်လ ၂၇ ရက်နေ့ မွန်းလွဲပိုင်း ၂ နာရီဝန်းကျင်အချိန်တွင် မူဆယ်မြို့နယ်၊ နမ့်အွမ်ကျေးရွာအတွင်းသို့ စစ်ကောင်စီတပ်မှ လက်နက်ကြီးဖြင့် ရမ်းသမ်းပစ်ခတ်လိုက်သည့်အတွက် အရပ်သားနေအိမ်တစ်လုံးကို လက်နက်ကြီး ထိမှန်ခဲ့ကြောင်း သိရသည်။
အာဏာသိမ်း စစ်ကောင်စီ တပ်ဖွဲ့ နှင့် TNLA တပ်တို့သည် ပြီးခဲ့သည့် ဇူလိုင်လအတွင်း ထိတွေ့တိုက်ပွဲ ပြင်းထန်ခဲ့ပြီး ယနေ့ အချိန်အထိ စစ်ရေးတင်းမာမှု ရှိနေဆဲဖြစ်ကြောင်း ဒေသတွင်း သတင်းရင်းမြစ်များထံမှ သိရသည်။
ယင်းကဲ့သို့ နှစ်ဖက် တပ်ဖွဲ့ စစ်ရေးတင်းမာမှုများ ရှိနေသော်လည်း TNLA တပ်ဖွဲ့သည် မူဆယ်ခရိုင်အတွင်း အခွန်ကောက် ပိုက်ဆံ တောင်းယူသည့် လှုပ်ရှားမှုများ အဆက်မပြတ် ရှိနေသည့်အတွက် လမ်းသွားလမ်းလာ နှင့် ဒေသခံများအတွက် စီးပွားရေး၊ ကုန်သွယ်ရေးများ ထိခိုက်လာကြောင်းလည်း သိရသည်။
