သျှမ်းပြည် မူဆယ် – နမ့်ခမ်း ကြားရှိ ကားလမ်းမပေါ် ပြေးဆွဲနေသည့် ကုန်တင်ကားများကို တအာင်း (ပလောင်) အမျိုးသား လွတ်မြောက်ရေးတပ်မတော် (TNLA) က ဆက်ကြေး (အခွန်) အဆမတန် ကောက်ခံနေကြောင်း ကားသမားထံများမှ စုံစမ်းသိရသည်။
.
ယမန်နေ့ (သြဂုတ် ၂၇) ရက်တွင် မူဆယ် – နမ့်ခမ်းကြားရှိ နောင်ဆိုင်ရွာ ကားလမ်းမပေါ်၌ ဖြတ်သန်းသွားလာသည့် ကားများကို တစ်ကြိမ်လျှင် တစ်ခေါက်နှုန်းဖြင့် လိုင်းကားတစ်စီးကို မြန်မာကျပ်ငွေ ၅ သောင်းမှ ၁ သိန်း နှင့် ကုန်တင်ကား ( ၁၂ ဘီးကား) တစ်စီးလျှင် မြန်မာကျပ်ငွေ ၈ သိန်း အထိ ကောက်ခံနေကြောင်း ကြုံတွေ့ခဲ့ရသည့် ကားသမားတစ်ဦးက ပြောသည်။
“ရွှေတွေ ဝတ်ဖို့ မစဉ်းစားနဲ့ အင်္ကျီတောင် အကောင်းဝတ်လို့မရဘူး။ ညစ်တယ်။ ဒီလိုသာ ဆက်ဖြစ်ရင် ရေရှည်မှာမလွယ်တော့ဘူး။ ကားဂိတ်ကြေးမပါသေး၊ ဆီဈေးနဲ့ စားစရိတ်မပါသေး ကြာရင် တကယ်မခံနိုင်တော့ဘူး “ ဟု ၎င်းကားသမားတစ်ဦး ပြောသည်။
ကုန်တင်ကားများသည် တနှစ်လျှင် တကြိမ် ဘီးခွန်အတွက် အခွန်ဆောင်ရသည့်အပြင် တိုင်းရင်းသား လက်နက်ကိုင်တပ်ဖွဲ့များကိုပါ ဆက်ကြေး (အခွန်) ဆောင်နေရသည့်အတွက် တနေ့တခြား မြင့်တက်လာသည့် ကုန်ဈေးနှုန်းနှင့်အညီ ရသည့်ဝင်ငွေ မမျှတော့ကြောင်း ၎င်းက ဆက်ပြောသည်။
အလားတူ လိုင်းကားပြေးဆွဲနေသည့် မူဆယ်မြို့ဒေသခံတစ်ဦးက “အခုချိန်က ကုန်ဈေးတွေတက်တော့လေ ဆီပန့်တွေလည်း သိပ်မဖွင့်ဘူး။ မူဆယ်မြို့မှာဆို နှစ်ဆိုင်လောက်ပဲ ဖွင့်တော့တယ်။ အခုကဆက်ပြီး အခွန်တွေ ထပ်ကောက်တော့ ဒုက္ခအမျိုးမျိုး ကြုံနေရတာပေါ့ “ ဟု ၎င်းက ဆိုသည်။
ထို့အပြင် မူဆယ် – နမ့်ခမ်းကြားရှိ ကားလမ်းတလျောက်တွင် TNLA တပ်ဖွဲ့ အခွန်ကောက်ခံလာရာ ပြီးခဲ့သည့် နှစ်ဦးပိုင်းစ၍ လက်ရှိအချိန် (၅) လကျော်ကြာနေပြီဖြစ်ကြောင်း ဒေသခံများ၏ ပြောပြချက်အရ သိရသည်။
Leave a Comments