သျှမ်းပြည် တောင်ကြီးခရိုင် ဟိုပုံးမြို့နယ်အတွင်း အာဏာသိမ်း စစ်ကောင်စီ နှင့် ပူးပေါင်းလုပ်ဆောင်နေကြသည့် ပအိုဝ်းအမျိုးသား တပ်မတော် (PNO/PNA) က နေ့စဥ်နီးပါး ရွာသားများကို ဝင်ဖမ်းနေကြောင်း စုံစမ်းသိရသည်။

.

ဟိုပုံးမြို့နယ် နမ့်ပါချီးကျေးရွာအုပ်စု၊ မောက်မွန်အုပ်စု နှင့် နောင်ဒေးအုပ်စုတို့မှ ဒေသခံများကို မူးယစ်ဆေးဝါး အကြောင်းပြကာ နေ့စဥ်နီးပါးဝင်ရောက် ဖမ်းဆီးနေကြောင်း ဒေသခံများထံမှ သတင်း သိရသည်။

“မူးယစ်ဆေးဝါးကို အကြောင်းပြပြီး တစ်ရွာဝင် တစ်ရွာထွက် လူတွေကို လိုက်လိုက်ဖမ်းတာ၊ တချို့က မူးယစ်ဆေး တကယ်သုံးတယ်၊ တချို့က မသုံးဘူး၊ ဒါပေမဲ့ သူတို့ဖမ်းချင်တဲ့သူကို ဖမ်းခေါ်သွားတာ၊ အဲ့လိုတွေ ဖမ်းသွားပြီး ပိုက်ဆံပြန်တောင်း၊ ပြန်ပေးဆွဲတဲ့ သဘောမျိုး ဖြစ်နေတယ်” ဟု ဟိုပုံးမြို့နယ် ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

မူးယစ်ဆေးဝါး အကြောင်းပြချက်ဖြင့် ဖမ်းဆီးခံရသူများကို ပိုက်ဆံဖြင့် ပြန်ရွေးကြရန် မိသားစုများကို ပြောဆိုပြီး ပိုက်ဆံမပေးနိုင်သူများကို တုတ်ဖြင့် ရိုက်ကာ တစ်ပတ်အတွင်း ပြန်လွတ်ပေးကြောင်း သိရသည်။

ထို့အပြင် မူးယစ်ဆေးဝါး အကြောင်းပြချက်ဖြင့် ဖမ်းဆီးခံရသူများကို PNO ဖွဲ့စည်းသည့် ပြည်သူ့စစ် စစ်သင်တန်းတက်ရမည်ဟုလည်း ခြိမ်းခြောက် ပြောဆိုမှုရှိသည့်အတွက် မိသားစုဝင်များက ပိုက်ဆံ ချေးငှားပြီး လူကိုပြန်ရွေးရကြောင်းလည်း အထက်ပါ ပုဂ္ဂိုလ်က ဆက်ပြောသည်။

“ဖမ်းခံရတဲ့ သူတွေကလည်း အမျိုးသားတွေချည်းပဲ ဖြစ်တယ်ဆိုတော့ မိသားစုအတွက် လုပ်အားလည်း ဖြစ်တာလေ၊ ဒါကြောင့် သူတို့ဖမ်းခံရတာနဲ့ ပြန်ရွေးဖို့ ပိုက်ဆံကို မရမက ချေးငှားရှာပြီး ပေးကြရတယ်၊ တချို့က သိန်း ၂၀ – ၃၀ ကို တောင်းတောင်းပန်ပန်နဲ့ ၇ – ၈ သိန်း လောက်ပေးရတာလည်း ရှိတယ်” ဟု ၎င်းက ဆက်ဆိုသည်။

မူးယစ်ဆေးဝါး အကြောင်းပြချက်ဖြင့် ရွာသားများကို ဖမ်းဆီးပြီး ပိုက်ဆံဖြင့် ပြန်ရွေးစေသည့် PNO လုပ်ရပ်သည် မူးယစ်ဆေးဝါးကို ဖျက်ပေးခြင်း မဟုတ်သည့်အပြင် ပြည်သူများကို တမင်သက်သက် ဒုက္ခပေးရာ ရောက်နေကြောင်းလည်း ဒေသခံများက ပြောဆို ဝေဖန်နေကြသည်။

သြဂုတ်လဆန်းပိုင်းမှာလည်း ပုံးအင်းဒေသတွင်း နေထိုင်သည့် ပြည်သူများထံ ပအိုဝ်းပြည်သူ့စစ် (PNO) တပ်က ရှေ့တန်းရောက် တပ်သားများအတွက် တစ်အိမ်ကို ကျပ်ငွေ ၄၀၀၀ နှင့် ဆန် ၂ ပြည် လာရောက် တောင်းခံခဲ့ကြောင်းလည်း သိရသည်။

ထို့အပြင် ၂၀၂၂ မေလ ၂၃ ရက်တွင်လည်း ဆီဆိုင်မြို့နယ်အတွင်းရှိ ကျေးရွာနေ ပြည်သူများကို PNO မှ အစည်းအဝေး ခေါ်ပြီး တစ်အိမ်ကို ကျပ်ငွေ ၃ သောင်း နှင့် ဆန်တစ်ပြည် ထည့်ပေးရန် နှင့် ကျေးရွာ တစ်ခုလျှင် အမျိုးသား လူငယ် အယောက် ၂၀ ပေးရန် စေခိုင်းညွှန်ကြားမှုများ ပြုလုပ်ခဲ့ဖူးသည်။