ရက်ပေါင်း ၂၀ ကျော် စစ်ကောင်စီ ပိတ်ထားသည့် မိုင်းနောင် – လဲချား ကားလမ်းပိုင်း ယနေ့ ထိ မဖွင့်သေး

သျှမ်းပြည် လွိုင်လင်ခရိုင်အတွင်း စစ်ကောင်စီ ပိတ်ထားသည့် မိုင်းနောင် – လဲချားကို ဆက်သွယ်ထားသည့် လမ်းပိုင်းသည် ယနေ့အထိ မဖွင့်နိုင်သေးကြောင်း ဒေသခံများထံမှ သတင်းသိရသည်။

.

စစ်ကောင်စီ လက်အောက်ခံ မိုင်းနောင် အခြေစိုက် စကခ ၂ မှ ပိတ်ထားသည့် မိုင်းနောင် – လဲချားလမ်း ယနေ့ အထိ မဖွင့်သေးသည့်အတွက် ပြည်သူလူထု၏ သွားရေးလာရေး ခက်ခဲစေသည့်အပြင် ခရီးကြန့်ကြာမှုလည်း ဖြစ်စေကြောင်း ဒေသခံများက သျှမ်းသံတော်ဆင့်ကို ပြောသည်။

“စစ်ကောင်စီတွေ ပိတ်ထားတော့ လဲချားကနေ နမ့်စန်ဘက်ကို ဆန်သယ်သွားလို့လည်း မရဘူး၊ အဲ့ဘက်ကို သွားမရတော့ လဲချားဘက်ကို ပြန်လာပြီး ပင်လုံဘက်ကို သွားရတယ်။ ဒါကြောင့် မကြာသင့်ပဲ ကြာသွားတာပေါ့” ဟု ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

လဲချား – မိုင်းနောင် – မိုင်းရှူး ကားလမ်းသည် လဲချား မှ မိုင်းနောင်သို့ နာရီပေါင်း ၂ နာရီ ခရီးနှင့်၊ မိုင်းနောင် မှ မိုင်းရှူးသို့ ၁ နာရီ ခရီးရှိသည့်အတွက် စုစုပေါင်း ၃ နာရီဝန်းကျင်ခန့်သာ ကြာမြင့်ကြောင်းလည်း သိရသည်။

လက်ရှိအချိန်တွင် စစ်ကောင်စီ လမ်းပိတ်ထားသည့်အတွက် မိုင်းရှူးသို့ သွားလိုပါက နမ့်စန် – ခိုလမ် – ဝမ်စိမ်း စသဖြင့် ကွေ့ပတ်သွားရသည့်အတွက် ပိုမိုခက်ခဲကြောင်း ဒေသခံများက သျှမ်းသံတော်ဆင့်ကို ပြောသည်။

ပြီးခဲ့သည့် သြဂုတ်လ ၆ ရက်နေ့မှ စတင်ကာ အာဏာသိမ်း စစ်ကောင်စီ နှင့် ရှမ်းပြည် တိုးတက်ရေးပါတီ၊ ရှမ်းပြည် တပ်မတော် (SSPP/SSA) တို့အကြား တိုက်ပွဲပြင်းထန်စွာ ဖြစ်ပွားခဲ့ပြီးနောက်ပိုင်း စစ်ကောင်စီတပ်ဖွဲ့က ကျေးရွာအတွင်း ဝင်ရောက်နေရာယူကာ လမ်းများကိုလည်း ပိတ်လိုက်ခြင်းဖြစ်သည်ဟု SSPP/SSA ၏ မြေပြင် အရာရှိ တစ်ဦးက သျှမ်းသံတော်ဆင့်ကို ပြောသည်။

“မိုင်းနောင် – ကျေးသီး ဘက်မှာတော့ ကျနော်တို့နဲ့ စကစကြား စစ်ရေးတင်းမာမှု မရှိပါဘူး၊ စစ်ရေးတင်းမာမှု ရှိတဲ့ နေရာတွေက လဲချား တောင်ဘက် နဲ့ အရှေ့ဘက်တွေ ဖြစ်ကြတယ်၊ အခုလို လမ်းပိတ်ထားတာကလည်း လုံခြုံရေး ကိုအကြောင်းပြတယ်ဆိုပေမဲ့ အဓိက ကတော့ ကျနော်တို့ ဆီကို ရိက္ခာတွေ၊ အကူညီတွေ ရောက်လာမှာ စိုးရိမ်နေတာ” ဟု ဒေသအတွင်း လှုပ်ရှားသည့် SSPP/SSA ၏ မြေပြင် အရာရှိ တစ်ဦးက သျှမ်းသံတော်ဆင့်ကို ပြောသည်။

ယင်းကဲ့သို့ ကားလမ်းပိတ်ထားသည့်အတွက် ပြည်သူတို့၏ သွားရေးလာရေး နှင့် ဒေသအတွင်း ကုန်သွယ်ရေးပါ ထိခိုက်လာသည့်အတွက် လမ်းကြောင်းကို အမြန်ဆုံး ပြန်လည်ဖွင့်ပေးစေလိုကြောင်းလည်း ဒေသခံများက တောင်းဆိုနေကြသည်။

လဲချား – မိုင်းနောင် ကားလမ်းကြောင်းသည် မိုင်ပေါင်း ၈၁ မိုင် ရှည်လျားပြီး ၃ နာရီသာ မောင်းနှင်ရသည့် အတွက် လက်ရှိ အသုံးပြုရသည့် မိုင်းကိုင် – ကျေးသီး – မိုင်းနောင် – မိုင်းရှူး လမ်းကြောင်းသည် ၆ နာရီထက်မနည်း မောင်းနှင်ရသည့်အပြင် အချိန်ပို ကြန့်ကြာသည့် လမ်းကြောင်းဖြစ်သည်ဟု သိရသည်။