သျှမ်းပြည် လားရှိုးမြို့တွင် တစ်ရက်အတွင်း ယာဉ်တိုက်မှု ၃ ကြိမ်ဆက်တိုက် ဖြစ်ပွားခဲ့ပြီး လူ ၆ ဦး ထိခိုက်ဒဏ်ရာရရှိခဲ့ကြောင်း စုံစမ်းသိရသည်။
.
ယမန်နေ့ (သြဂုတ် ၁၈ ) ရက် ၁၁ နာရီဝန်းကျင်မှစပြီး လားရှိုး – သိန္နီပြည်ထောင်စု ကားလမ်းမကြီး နမ့်တွန်းရွာ ၁၆ မိုင် အဆင်းတွင် ကားနှစ်စီး ခေါင်းချင်းဆိုင် တိုက်မိပြီး အမျိုးသား ၁ ဦး နှင့် အမျိုးသမီး ၂ ဦး ထိခိုက်ဒဏ်ရာ ရခဲ့သည်။
အလားတူ လားရှိုးမြို့ လေယာဉ်ကွင်းလမ်းတွင် ကားတစ်စီး နှင့် ဆိုင်ကယ် ထပ်မံတိုက်မိပြီး ဆိုင်ကယ်ပေါ်မှ အမျိုးသား ၂ ဦး ပြင်းထန်စွာ ထိခိုက်ဒဏ်ရာ ရခဲ့သည့်အပြင် ဆိုင်ကယ်တစ်စီး ထပ်မံတိမ်းမှောက်မှု ဖြစ်ပြီး အမျိုးသား ၁ ဦး ထိခိုက်ဒဏ်ရာ ရရှိခဲ့ကြောင်း ၎င်းကို သွားရောက်ကူညီခဲ့သည့် လူမှုကူညီရေးအသင်းများထံမှ သိရသည်။
အဆိုပါ ယာဉ်တိုက်မှု နှင့် ပတ်သက်ပြီး ဒေသခံတစ်ဦးက “လားရှိုးမှာ ကားတွေ၊ ဆိုင်ကယ်တွေ များလာတော့ ဖြစ်သလို မောင်းတယ်။ ယာဉ်စည်းကမ်း၊ လမ်းစည်းကမ်း မလိုက်နာတော့ နေ့တိုင်းလိုလို ယာဉ်တိုက်မှု ဖြစ်နေတာ “ ဟု ၎င်းက ပြောသည်။
လက်ရှိမှာ ယာဉ်တိုက်မှုကြောင့် ထိခိုက်ဒဏ်ရာ ရသူများကို လားရှိုးပြည်သူ့ဆေးရုံကြီးသို့ ပို့ဆောင်ပေး၍ ဆေးဝါးကုသမှု ခံယူနေရသလို ပြင်းထန်စွာ ထိခိုက်ဒဏ်ရာ ရသူတချို့ကို ခွဲစိတ်ကုသဆောင်သို့ ပို့ဆောင်ခဲ့ရကြောင်း သိရသည်။
ထို့အပြင် စစ်တပ်က အာဏာသိမ်းပြီးနောက်ပိုင်း လားရှိုးမြို့တွင် ရွှေ့ပြောင်းအလုပ်သမားများ၊ လူနေမှုများ တိုးမြင့်လာသောကြောင့် ယာဉ်စည်းကမ်း၊ လမ်းစည်းကမ်း လိုက်နာဆောင်ရွက်ခြင်း မရှိတော့ကြောင်း သိရသည်။
ယင်းကဲ့သို့ လိုက်နာဆောင်ရွက်သူ နည်းပါးလာခြင်းကြောင့် ယာဉ်ထိန်းရဲများအနေဖြင့် ယာဉ်စည်းကမ်း၊ လမ်းစည်းကမ်း အသိပညာပေး ဟောပြောပွဲ ပြုလုပ်ခဲ့သော်လည်း ထိရောက်စွာမရှိကာ လမ်းမပေါ် ပိုက်ဆံကောက်ခံနေလျက်ရှိကြောင်း ဒေသခံ တစ်ဦးက ထပ်လောင်းပြောသည်။
“ဟောပြောပွဲတော့ လုပ်ခဲ့တယ်။ အခုက စည်းကမ်း မလိုက်နာရင် ဒဏ်ငွေ ရိုက်တာပေါ့။ ယာဉ်တိုက်မှု ဖြစ်လာရင် ယာဉ်ထိန်းရဲတွေက အမှုစစ်ဆေးပြီး ပိုက်ဆံကောက်တယ်။ လမ်းမှာလည်း စစ်ဆေးရေး စောင့်ပြီး ပိုက်ဆံကောက်တယ် “ ဟု ၎င်းက ပြောသည်။
ပြီးခဲ့သည့် သြဂုတ် ၁ ရက်မှ ၁၉ ရက်အထိ လားရှိုးမြို့တွင် ယာဉ်တိုက်မှု စုစုပေါင်း ၇ ကြိမ် ဖြစ်ပွားပြီး အမျိုးသား ၁၀ ဦး အမျိုးသမီး ၄ ဦး ထိခိုက်ဒဏ်ရာ ရရှိခဲ့သည်။
