သျှမ်းပြည် လားရှိုးမြို့နယ် မယ်ဟန်ကျေးရွာရှိ ဝေဠုဝန်ဘုန်းကြီးကျောင်းတွင် သီတင်းသုံးနေထိုင်ထားသည့် ကိုရင်လေးတစ်ပါး က စာမရသည်ဟု ပြောဆိုပြီး ဆရာတော်က ညိုမဲအောင် ရိုက်နှက်ခဲ့ကြောင်း စုံစမ်းသိရှိရသည်။
.
ပြီးခဲ့သည့် သြဂုတ်လ (၈) ရက်က အသက် (၉) နှစ်အရွယ် ကိုရင်လေး တစ်ပါး က စာမရသည်ဟု ပြောဆိုပြီး ကျောင်းထိုင် ဆရာတော် တစ်ပါးက ညှိမဲအောင် ရိုက်နှက်ခဲ့ကြောင်း သိရှိရသည်။
“ သူတို့ နေ့လည်စာ စားပြီးတော့ စာသင်နေတာတဲ့။ ( ၃) နာရီလောက်တော့ စာသွားအံတာတဲ့ ။ စာသွားအံ့တာ တစ်လုံးပဲ မရတာကို ရိုက်တာတဲ့။ ပြန်ဆိုခိုင်းတော့လည်းသူက ပြန်ဆိုနိုင်ပါတယ်။ ဒါမဲ့ သူက ရိုက်လိုက်တာ။ တုတ်တောင်ကျိုးတယ်တဲ့။ ကြက်မွှေးနဲ့ရိုက်တာ။ အခုတော့ အသားတွေ ညှိမဲနေတာပေါ့” ဟု ကိုရင်လေး၏ မိသားစုဝင် တစ်ဦး က သျှမ်းသံတော်ဆင့် ကိုပြောသည်။
ကိုရင်လေးကို ညိုမဲအောင် ရိုက်နှက်သည့်အပြင် ညမှာလည်း သောက်သုံးရေ သောက်ခွင့်မပေးခဲ့ကြောင်း သိရသည်။
“ရိုက်တဲ့ သူကတော့ ကျောင်းထိုင် ဆရာတော်ပဲ။ ကလေးရဲ့ အသားကတော့ ညိုမဲနေသေးတယ်ပေါ့။ အိမ်ကိုခေါ်လာပြီးတော့ မယ်ဟန်ဆေးခန်းကို နေ့တိုင်းသွားပြပေးတယ်။ ရိုက်ခံရတဲ့ ရက်မှာဆို စကားတောင် မပြောနိုင်ဘူး။ အဲ့နေ့မှာ သူ့ရဲ့ သူငယ်ချင်းတွေကိုလည်း သူ့ကို ရေမတိုက်ခိုင်းဘူးတဲ့။ တစ်ညလုံး ဘာမှ မပေးစားဘူးတဲ့။ ကလေးက ဖုန်းဆက်လာလို့မှ ကျနော်တို့က ပြန်သွားခေါ်ပြီးဆေးကုသပေးတာ” ဟု မိသားစုဝင် ကပြောသည်။
သြဂုတ် (၉) ရက်မှစပြီး ကိုရင်လေးကို ဆေးကုသမှု ပြုလုပ်ထားရပြီး ကျောင်းထိုင် ဆရာတော်မှ ဆေးဖိုးအတွက် ၉ သောင်းကျပ်သာ ကူညီပေးခဲ့ကြောင်း သိရှိရသည်။
လက်ရှိအချိန်ထိ ကိုရင်လေးသည် ဆေးခန်းကို နေ့စဉ်သွားပြနေရပြီး ကိုရင်လေးသည် ညိုမဲသည့် ဒဏ်ရာကြောင့် မှောက်အိပ်နေရကြောင်းလည်း သိရသည်။
“ ဆိုးဆိုးဝါးဝါးတော့ ဖြစ်သွားတာပေါ့။ မထိုင်နိုင်တော့ဘူး ဖြစ်သွားတယ်။ လမ်းလျှောက်နိုင်ပါတယ်။ လိုအပ်တဲ့ဟာတွေကိုတော့ အကုန်လုပ်ထားပေးပြီးပြီ။ အရမ်းစိုးရိမ်ရတဲ့ ထဲတော့မပါဘူး။ အတွင်းဒဏ်ရာတော့ ဘာမှ မရဘူး။ အပြင်ဒဏ်ရာမှာ သွေးနီဉတာ တော်တော်လေးဆိုးသွားတယ်။ ဆရာတို့ကတော့ ရောက်တဲ့နေ့ ကတည်းက ပိုးသတ်ဆေးတွေလည်း လိုတဲ့ဟာတွေ အယောင် ကျဆေးတွေလည်း အကုန်ပေးထားတော့ ကလေးကတော့ သွားလာတဲ့ အခါမှာ အရမ်းတော့ ဒုက္ခမရောက်ဘူးပေါ့။ ရောက်လာတဲ့ နေ့တုန်းကဆိုရင် ပလပ်တောင် မအိပ်နိုင်ဘူး။ အဲ့လို အိပ်ရင် နာတာပေါ့။ ပထမတစ်ရက်ကတော့ ဖျားတယ် ။ အခုတော့ မဖျားတော့ဘူး” ဟု ဆေးကုသမှု ပေးနေသည့် ဆရာဝန် တစ်ဦး ကပြောသည်။
ကိုရင်လေး မိဘများသည် ကျောင်းထိုင်ဆရာတော်ကို တရားစွဲဆိုဖို့အတွက် ကြောက်ရွံ့နေပြီးတော့ မကျေနပ်မှု ရှိသော်လည်း တိတ်ဆိတ်နေရတယ်လို့ နီးစပ်သူ မိသားစုက ပြောဆိုသည်။
“ အခုလို ရိုက်ပြီးတော့ ၉ သောင်းလာပေးတာတော့ ကျေနပ်လားလို့ပြောရင် ဘယ်ကျေနပ်မလဲ။ တကယ်လုပ်မယ် ဆိုရင်လည်း ကျနော်တို့က သာမာန် ပြည်သူဖြစ်တယ်။ သူတို့က ဘုန်းကြီးဖြစ်တယ်။ ကြောက်လည်း ကြောက်တာပေါ့။ သူဘာတစ်ခုခုလာလုပ်မှာတော့ ကြောက်တာမဟုတ်ဘူး။ သူတို့က ဗမာဖြစ်တယ်။ ကျနော်တို့ကလည်း သူတို့အကြောင်း အကုန်မသိဘူး” ဟု ၎င်းအမျိုးသားက ဆက်လက်ပြောဆိုထားသည်။
ကိုရင်လေးသည် အဆိုပါ ဝေဠုဝန်ကျောင်းတိုက်မှာ (၄) လတာ သီတင်သုံး နေထိုင်ခဲ့သည်။
ပြီးခဲ့သည့် ၂၀၂၁ ခုနှစ်တုန်းကလည်း သျှမ်းပြည် ကျေးသီးမြို့နယ် မိုင်းကောင်းကျေးရွာမှာ နွားနို့တစ်ဗူးကို ခိုးသောက်ခဲ့သည့် ကိုရင်လေးကိုလည်း ရိုက်နှက်ခံခဲ့ရပြီး သေဆုံးသွားခဲ့သည် အထိဖြစ်ခဲ့သည်။
