သျှမ်းပြည် လားရှိုးမြို့နယ်တွင် ယနေ့ (သြဂုတ် ၉) ရက် မွန်းလွဲ ၂ နာရီခွဲ အချိန်မှစပြီး ပစ်ခတ်မှုများ ဆက်တိုက် ကြားနေရကြောင်း စုံစမ်းသိရသည်။
.
ယနေ့ သြဂုတ် ၉ ရက် မွန်းလွဲ ၂ နာရီခွဲ အချိန်မှစပြီး လားရှိုးမြို့ မန်ဂန်ရွာအနီးရှိ စစ်ကောင်စီ ၏ ခြေလျင်တပ်ရင်း (ခလရ ၆၈ တပ်ရင်း) မှ မိုင်းယော်ဘက်သို့ ပစ်ခတ်နေကြောင်း ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ ဒီနေ့ ဉပုလ်နေ့လေ လူကြီးတွေ လန့်နေမှာ ဘုန်းကြီးကျောင်းနားရှိတဲ့ တပ်က ပစ်နေတာ။ ဒီနေ့ တစ်နေ့လုံးနီးပါး အဲ့တပ်ကနေ လှမ်းလှမ်းထုနေတာ“ ဟု ၎င်း အမျိုးသမီး က ဆိုသည်။
အဆိုပါ ပစ်ခတ်မှု နှင့် ပတ်သက်ပြီး စစ်ကောင်စီသည် မည်သည့်နေရာကို ရည်ရွယ်၍ ပစ်ခတ်နေကြောင်း အသေးစိတ်ကိုတော့ မသိရှိရသေးပေ။
အလားတူ ဒေသခံ အမျိုးသားတစ်ဦးကလည်း “ လက်နက်ကြီး ပစ်နေတာပါ။ တာပုံဘက်က ၁၅ လုံးလောက်ရှိပြီ ကြားနေရတယ်။ အခုတော့ တိတ်သွားပြီ။ ဘယ်ကို ပစ်လို့ပစ်မှန်း မသိဘူး အသံကတော့ အကျယ်ကြီးပဲ “ ဟု ဆိုသည်။
ထို့အပြင် ပြီးခဲ့သည့် သြဂုတ် ၆ ရက် ညသန်းခေါင်ယံကျော် အချိန်တွင်လည်း လားရှိုးမြို့အတွင်း ဗုံးပေါက်ကွဲသံများ၊ ပစ်ခတ်သံများ ထပ်ဆင့် ဖြစ်ပေါ်ခဲ့ပြီး အမှတ် ၂ ရဲစခန်းအနီးရှိ ကာကွယ်ရေး လမ်းထိပ်တွင် အမည်မသိ လက်နက်ကိုင်တပ်ဖွဲ့မှ လာရောက်ပြီး သေနတ်တစ်ချက် ဖောက်ခဲ့ကြောင်း သိရသည်။
