သျှမ်း – ကရင်နီ (ကယား) ပြည် နယ်စပ်ဒေသ လွိုင်ကော် – မိုးဗြဲ ကားလမ်းမကြီးပေါ်ရှိ ကျေးရွာတွင် တိုက်ပွဲဖြစ်ပွားပြီး စစ်ရေးတင်းမာနေလျက်ရှိသောကြောင့် ပြည်သူများအနေဖြင့် မသွားလာရန် ကရင်နီ အမျိုးသား ကာကွယ်ရေးတပ် KNDF B-02 ၏ ထုတ်ပြန်သတိပေးချက်အရ သိရသည်။

.

ပြီးခဲ့သည့် သြဂုတ် ၄ ရက်မှစ၍ လွိုင်ကော် – မိုးဗြဲ ကားလမ်းမကြီးပေါ်ရှိ ကျေးရွာအချို့တွင် စစ်ကောင်စီတပ်များ လှုပ်ရှားမှု ပြုလုပ်ခဲ့ပြီးနောက် သြဂုတ် ၆ ရက်မှစတင်ကာ ကရင်နီ ပူးပေါင်းတပ်တို့နှင့် ထိတွေ့တိုက်ပွဲ ဖြစ်ပွားခဲ့ကြောင်း ထုတ်ပြန်ချက်တွင် ရေးသားဖော်ပြထားသည်။

လက်ရှိမှာ စစ်ရေးတင်းမာလျက်ရှိနေသောကြောင့် အချိန်မရွေး တိုက်ပွဲများ ပြင်းထန်လာနိုင်သဖြင့် လွိုင်ကော် – မိုးဗြဲ လမ်းမကြီး အသုံးမပြုသေးရန်နှင့် မိဘပြည်သူများအနေဖြင့် စစ်ရေးပြင်းထန်သည့် နယ်မြေဒေသအတွင်း သတိထားပြီး ရှောင်ရှားသွားလာရန် သတိပေးထားသည်။

“စစ်ကောင်စီ ဖက်ကတော့ အခုချိန်ထိ စစ်ရေး လှုပ်ရှားနေတာရှိတယ်။ တိုက်ပွဲကတော့ ဖြစ်လာနိုင်ချေရှိတယ်။ ပြည်သူတွေအနေနဲ့ မသွားလာဖို့တော့ သတိပေးချင်တာပေါ့။ အဓိကတော့ စစ်ရေး ပြင်းထန်နေတဲ့ နယ်မြေဒေသမှာ အသွားအလာ မလုပ်ဖို့ပြောချင်ပါတယ် “ ဟု ပြည်သူ့ကာကွယ်ရေးတပ်မှ ရဲဘော်သတင်းရင်းမြစ် တစ်ဦးက ပြောသည်။

အလားတူ ဇူလိုင် ၂၀ ရက်မှ ၂၈ ရက်အထိ လွိုင်ကော် – မိုးဗြဲ လမ်းမကြီး တစ်လျောက်တွင် စစ်ကောင်စီ စစ်ကြောင်းထိုးခြင်း၊ အင်အားဖြည့်တင်းခြင်းကြောင့် ကရင်နီပူးပေါင်းတပ် နှင့် ထိတွေ့တိုက်ပွဲ ဖြစ်ပွားခဲ့ကြောင်း သိရသည်။

အဆိုပါ တိုက်ပွဲကြောင့် စစ်ကောင်စီဖက်မှ MA-1 (၅) လက်၊ MA-2 စက်ကလေး (၁) လက်၊ MA-3 (၂) လက်နှင့်အတူ ခဲယမ်းမီးကျောက်များ၊ အသုံးအဆောင်ပစ္စည်းများ သိမ်းဆည်းရရှိခဲ့သလို စစ်သုံး ကားတစ်စီးကိုလည်း ဖျက်စီးနိုင်ခဲ့ကြောင်း ရေးသားဖော်ပြထားသည်။

ထို့အပြင် စစ်ကောင်စီသည် ကရင်နီ (ကယား) ပြည်ကို စစ်အင်အားဖြည့်တင်းရန်အတွက် ဖယ်ခုံ – မိုးဗြဲ – လွိုင်ကော် လမ်းမကြီးကို အသုံးပြု၍ စစ်ယာဉ်တန်းကားများအပြင် အရပ်သားကားများပါ အသုံးပြုကာ ဝင်ရောက်ခဲ့သဖြင့် ကရင်နီပူးပေါင်းတပ်များမှ ကြားတိုက်ခိုက်ခဲ့ရာ ထိတွေ့တိုက်ပွဲသည် နေ့စဉ်နီးပါး ဖြစ်ပွားနေကြောင်း သိရသည်။