သျှမ်းပြည် မူဆယ်ခရိုင် ၊ မူဆယ်မြို့နယ်၊ တီးမကျေးရွာအုပ်စုမှ လုံကာကျေးရွာအတွင်းသို့ စစ်ကောင်စီဘက်မှ လက်နက်ကြီးများဖြင့် ပစ်ခတ်သည့်အတွက် လုံကာဒေသခံများ ရွာလုံးကျွတ်နီးပါး ထွက်ပြေး တိမ်းရှောင်နေရ ကြောင်းသိရသည်။

ပြီးခဲ့သည့် သြဂုတ်လ ၄ ရက် ညပိုင်းမှစတင်ပြီး စစ်ကောင်စီ တပ်ဖွဲ့သည် တီးမကျေးရွာအုပ်စု လုံကာ ကျေးရွာ နှင့် မိုင်းယကျေးရွာအုပ်စုမှ မန်ဖာကျေးရွာတွင်းသို့ လက်နက်ကြီးများဖြင့် ရမ်းသမ်းပစ်ခတ်သည့် အတွက် လုံကာကျေးရွာ နှင့် မန်ဖာကျေးရွာတို့သည် ရွာလုံးကျွတ် စစ်ရှောင်နေရကြောင်း ဒေသခံများက သျှမ်းသံတော်ဆင့်ကို ပြောသည်။

“စစ်ကောင်စီက ရွာထဲကို လက်နက်ကြီး နဲ့ ပစ်လို့ သူ့တို့ကြောက်လို့တဲ့ မန်ဖာရွာကဆိုရင် ညတွင်းချင်း ပြေးလာ ကြတာ၊ ထိခိုက်မှုတော့ မရှိဘူးပေါ့။ လုံကာကျေးရွာကလည်း ရွာလုံးကျွတ်နီးပါး ထွက်ပြေးလာပြီး တီးမကျေးရွာ ထဲက အမျိုးအိမ်နဲ့ ဘုန်းကြီးကျောင်းမှာ လာခိုလှုံနေကြတာ။ အခုချိန်ထိ မပြန်နိုင်ကြသေးဘူး” ဟု ဒေသခံတစ်ဦးက သျှမ်းသံတော်ဆင့်ကို ပြောသည်။

လက်ရှိတွင် အိမ်ထောင်စု လေးဆယ်ကျော်နှင့် လူဦးရေ ၁၀၀ ကျော်ရှိသည့် စစ်ရှောင်များသည် တီးမကျေးရွာ အတွင်း သို့ ခိုလှုံနေထိုင်လျက်ရှိပြီး စားသောက်ရေး နှင့် နေထိုင်မှုများကို ဒေသခံများက ကူညီပေးလျက်ရှိ ကြောင်း သိရသည်။

ထို့အပြင် စစ်ရှောင်များ တီးမကျေးရွာအတွင်း ရောက်ရှိလာပြီးသည့်နောက် အင်အား ၃၀ နီးပါးရှိသည့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) စစ်ကြောင်း တစ်ခုသည် တီးမကျေးရွာ တွင်းသို့ ရောက်ရှိလာပြီး အရပ်သားနေအိမ်များ၌ ဝင်ရောက်နေထိုင်လျက်ရှိသည်။

“TNLAအင်အားက ၃၀ လောက်ရှိတယ်၊ တီးမရွာထဲက အရပ်သားအိမ် ၆/၇ အိမ်လောက်မှာ ခွဲပြီးနေနေကြတာ၊ အိမ်ရှင်တွေက ခွင့်မပြုချင်ပေမဲ့ မတားရဲဘူး။ တစ်ဖက်ကလည်း စစ်ကောင်စီ ရွာထဲကို လက်နက်ကြီး ပစ်လာမှာ ကြောက်ရတယ်။ TNLA ကလည်း ဘာလို့ ရွာထဲဝင်ပြီး အရပ်သားအိမ်မှာ နေနေကြသလဲ မသိဘူး” ဟု ဒေသခံတစ်ကဦးက သျှမ်းသံတော်ဆင့်ကို ပြောသည်။

လုံကာကျေးရွာ နှင့် မန်ဖာကျေးရွာ တွင်းသို့ စစ်ကောင်စီ တပ်မှ လက်နက်ကြီး ပစ်ခတ်စဥ်တွင်လည်း TNLA တပ်သားများ ကျေးရွာအတွင်း ရှိနေသည့် သတင်းကြောင့်ဟု ဆိုကာ လက်ရှိ TNLA တပ်သားများ တီးမကျေးရွာ ရောက်ရှိသည့်အတွက် ဒေသခံများက စိုးရိမ်ကြောက်လန့်နေရကြောင်းလည်း သိရသည်။

ယင်းကဲ့သို့ အရပ်သားနေအိမ်ထဲ ဝင်ရောက်နေရာယူသည့် ကိစ္စ နှင့် စစ်ရေးအခြေအနေများနှင့် ပတ်သက်ပြီး တအာင်း (ပလောင်) အမျိုးသားလွတ်မြောက်ရေး တပ်မတော် (TNLA) ၏ ပြောရေးဆိုခွင့် နှင့် ပြန်ကြားရေး ဌာနထံသို့ ဖုန်းဖြင့် ဆက်သွယ်မေးမြန်းရာ ပြောရေးဆိုခွင့် အစည်းအဝေးတက်နေသေးသည့် အတွက် ဖြေကြားရန် အဆင်မပြေသေးကြောင်း သျှမ်းသံတော်ဆင့်ကို အကြောင်းပြန်သည်။