သျှမ်းပြည် လားရှိုးမြို့ အမှတ် ၂ ရဲစခန်းအနီးရှိ ကာကွယ်ရေးလမ်းထိပ်တွင် ယနေ့ (သြဂုတ် ၇) ရက် နံနက် ၁ နာရီတွင် သေနတ်ဖောက်သံများ ထပ်မံကြားနေရကြောင်း စုံစမ်းသိရသည်။
ယနေ့ ( သြဂုတ် ၇) ရက် နံနက် ၁ နာရီဝန်းကျင်တွင် လားရှိုးမြို့ အမှတ် (၂) ရဲစခန်းအနီးရှိ ကာကွယ်ရေး လမ်းထိပ်တွင် အမည်မသိ လက်နက်ကိုင်တပ်ဖွဲ့မှ လာရောက်ပြီး သေနတ် တစ်ချက်ဖောက်ခဲ့ကြောင်း လားရှိုးမြို့ ဒေသခံတစ်ဦးကသျှမ်းသံတော်ဆင့်ကို ပြောသည်။
“ ဒီနေ့ နံနက် ၁ နာရီလောက်က လာပစ်သွားတာ။ ကာကွယ်ရေးလမ်းထိပ်မှာ လာပစ်သွားတာ သေနတ်တစ်ချက် ကြားရတယ်။ ဘယ်သူ့ကိုလာပစ်တာတော့ မသိဘူး“ ဟု ၎င်း ဒေသခံတစ်ဦးက ပြောသည်။
အဆိုပါ သေနတ်ဖောက်သံ ကြားရသည့် နေရာတွင် လားရှိုးမြို့ အခြေစိုက် အရှေ့မြောက်ပိုင်းတိုင်း စစ်ဌာနချုပ် ရမခ စစ်တိုင်းရုံးနှင့် နီးစပ်ကြောင်းလည်း သိရသည်။
အလားတူ ယမန်နေ့ သြဂုတ် ၆ ရက် ညသန်းခေါင်ကျော် အချိန်တွင်လည်း လားရှိုးမြို့အတွင်း ဗုံးပေါက်ကွဲသံများ၊ ပစ်ခတ်သံများ ထပ်ဆင့် ကြားနေရကြောင်း လားရှိုးမြို့ဒေသခံ အမျိုးသားတစ်ဦးက ပြောသည်။
“ သူတို့က ဘယ်သူ့ကိုပစ်မှန်း မသိဘူး။ ပစ်တော့ ပစ်နေတာပဲ ထိခိုက်မှုတော့ မကြားသေးဘူး။ အသံပဲ ကြားနေရတယ်။ တစ်မြို့လုံးနီးပါးလိုပဲ ပစ်ခတ်မှုတွေဖြစ်နေသလို ကြားနေရတယ် “ ဟု ၎င်းက အမျိုးသားတစ်ဦးက ပြောသည်။
စစ်တပ်ကအာဏာသိမ်းပြီးနောက်ပိုင်း လားရှိုးမြို့တွင် ဗုံးပေါက်ကွဲမှုများ၊ တိုက်ပွဲဖြစ်ပွားမှုများ မကြာခဏ ဖြစ်ပွားနေလျက်ရှိပြီး တစ်ဖက်မှာ ကုန်ဈေးနှုန်း အဆမတန် မြင့်တက်လာမှုကြောင့် ပြည်သူများသည် စစ်ရေး၊ နိုင်ငံရေးကြားထဲ၌ စားဝတ်နေရေး လည်ပတ်နိုင်အောင် ရုန်းကန်နေရကြောင်း ဒေသခံထံမှ သိရသည်။
“ လားရှိုးမြို့မှာတော့ နေရာတိုင်းလိုလို ဖြစ်နေတာပေါ့လေ။ ကိုယ်ကအပြင်တွေ သွားရတောင်မှ သိပ်ပြီး မလုံခြုံသလို၊ မြို့ပြင်ထွက်လိုက်ပြီဆိုရင် ကြောမလှုံသလို ကိုယ့်ကိုယ်အဲ့လိုတောင် ဖြစ်နေတာ။ ဒါမျိုးတွေ စိတ်မချရတဲ့အပိုင်းပေါ့လေ။ အခုဟာဈေးနှုန်းတွေက အကုန်တက်တော့ ကျနော်တို့ ပြည်သူတွေ ဘယ်လို လုပ်စားရမလဲ၊ ရပ်တည်မှုကဘယ်လိုရှိလဲ၊ မိသားစုများတဲ့သူဆို ပိုဆိုးတယ်။ ကုန်ဈေးနှုန်းတက်တာ တမျိုး၊ နိုင်ငံရေးကတမျိုးနဲ့ ရှေ့လျောက်ကျနော်တို့ ပြည်သူတွေတော့ မလွယ်ဘူး “ ဟု ၎င်းအမျိုးသားက ထပ်လောင်းပြောသည်။
ထို့အပြင် ယမန်နေ့ သြဂုတ် ၆ ရက် လားရှိုးမြို့နယ် အမှတ် (၆) ရပ်ကွက်ရှိ သိန်းထိုက်ရုပ်ရှင်ရုံ အနီး Sunny Hotel တွင်လည်း ဗုံးပေါက်ကွဲမှု ဖြစ်ပြီး လူတစ်ဦး ထိခိုက်ဒဏ်ရာ ရရှိခဲ့သည်။
