သျှမ်းပြည် လွိုင်လင်ခရိုင် ၊ လဲချားမြို့နယ်အတွင်း ဖြစ်ပွားသည့် ရှမ်းပြည် တိုးတက်ရေး ပါတီ၊ ရှမ်းပြည် တပ်မတော် (SSPP/SSA) နှင့် စစ်ကောင်စီတို့ ယနေ့ (ဩဂုတ် ၆)ရက် ထိတွေ့တိုက်ပွဲအတွင်း စစ်ကောင်စီဘက်မှ ထိခိုက်သေဆုံးမှုရှိကြောင်း သတင်းရရှိသည်။
ယနေ့( သြဂုတ် ၆ )ရက် နံနက် ၆နာရီမှစတင်လိုက်သည့်တိုက်ပွဲသည် နှစ်ဖက် တပ်ဖွဲ့၏ ထိတွေ့တိုက်ပွဲများသည် တစ်နေရာတည်း မဟုတ်သည့်အတွက် စစ်ကောင်စီ ဘက်မှ ထိခိုက်ကျဆုံးမှု ၂၀ ထက်မနည်း ရှိနိုင်ကြောင်း SSPP/SSA ၏ မြေပြင် အရာရှိက သျှမ်းသံတော်ဆင့်ကို ဆက်ပြောသည်။
“ဒီနေ့တိုက်ပွဲက သုံး / လေးနေရာလောက် ဖြစ်ခဲ့ပါတယ်။ ကျနော်တို့ရဲ့ သက်ဆိုင်ရာ မြေပြင် တာဝန်ရှိသူတွေရဲ့ အစီရင်ခံစာအရ ဒီနေ့ စစ်ကောင်စီကျတာ ၂၀ ထက်နည်းမှာ မဟုတ်ဘူး၊ ကျနော်တို့ဘက်ကတော့ တစ်ယောက်ကျသွားတယ်၊ ခိုင်းဖက်နမ်နားက တပ်စခန်းကို သူတို့ဘက်က စလာချောင်းပစ် ဝင်လာတဲ့အချိန်မှာထိသွားတာ” ဟု သျှမ်းသံတော်ဆင့်ကို ဆက်ပြောသည်။
ယနေ့ (သြဂုတ် ၆)ရက် တွင် လဲချားမြို့နယ် မက်လန်းကျေးရွာအနီး ဖြစ်ပွားသည့်တိုက်ပွဲသည် နံနက် ၆ နာရီဝန်းကျင်မှ ၈ နာရီဝန်းကျင်အထိ တစ်ကြိမ် ၊ ၁၀ နာရီဝန်းကျင်တွင် တစ်ကြိမ် ၊ ၁၂ နာရီဝန်းကျင်မှ မွန်းလွဲပိုင်း ၂ နာရီဝန်းကျင်အထိတွင် တစ်ကြိမ် စုစုပေါင်း ၃ ကြိမ် တိုက်ပွဲဖြစ်ခဲ့ ကြောင်းလည်း သိရသည်။
လက်ရှိတွင် မြေပြင်အခြေအနေအရ ပစ်ခတ်သံများ ငြိမ်သက်နေသော်လည်း စစ်ရေးတင်းမာသည့် အနေအထား ရှိနေကြောင်း သိရသည်။
ယင်းထိတွေ့တိုက်ပွဲတွင် စစ်ကောင်စီဘက်မှ လက်နက်ကြီးများဖြင့် ပစ်ကူခဲ့သော်လည်း စစ်ကောင်စီဘက်မှ ကျဆုံး နှင့် ထိခိုက်ဒဏ်ရာများသည့်အပြင် စစ်သုံ့ပန်းအဖြစ် တပ်သား ၂ ဦး၊ သေနတ် ၂ လက်၊ စစ်ကားတစ်စီးတို့ကို SSPP မှ သိမ်းပိုက်နိုင်ခဲ့ကြောင်း SSPP/SSA မြေပြင် အရာရှိ တစ်ဦးက သျှမ်းသံတော်ဆင့်ကို ပြောသည်။
“ဟုတ်ပါတယ်။ သူတို့ဘက်ကအကျအရှုံးများတယ်။ ၂ ဦးကို ကျနော်တို့ဖမ်းမိထားတယ်၊ ပြီးတော့ သေနတ် ၂ လက်၊ ကားတစ်စီးကို ကျနော်တို့ သိမ်းပိုက်နိုင်ခဲ့တယ် ။ အခု သူတို့ (စကစ) နမ့်တိန်းတံတားနားကတပ်သားတွေ မရှိတော့ဘူး၊ လက်ရှိက စစ်ရေးတင်းမာတဲ့ အနေအထားရှိနေတယ်” ဟု SSPP/SSA မြေပြင် အရာရှိက သျှမ်းသံတော်ဆင့်ကို ပြောသည်။
အဆိုပါ ထိတွေ့တိုက်ပွဲများကြောင့် ဒေသခံများသည် လဲချားမြို့ပေါ်ရှိ ဆွေမျိုး အသိအိမ် များထံသို့ စစ်ရှောင်ထွက်ပြေးကြရပြီး၊ အချို့က ဘုန်းတော်ကြီးကျောင်းများ တွင် ခိုလှုံနေထိုင်ကြရကြောင်းလည်းသိရသည်။
Leave a Comments