သျှမ်းပြည် လဲချားမြို့နယ်အတွင်း စစ်ကောင်စီတပ် နှင့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် SSPP/ SSA တို့ တိုက်ပွဲဖြစ်ပွားမှုကြောင့် ပြည်သူများ မြို့ပေါ်သို့ ထွက်ပြေးတိမ်းရှောင်ရကြောင်း စုံစမ်း သိရသည်။
.
ယနေ့ သြဂုတ် ၆ ရက် နံနက် ၆ နာရီကျော် အချိန်တွင် လဲချားမြို့နယ် ဟိုင်းဆိုင်အုပ်စု နှင့် မန်ဆေအုပ်စုအတွင်း စစ်ကောင်စီတပ် နှင့် SSPP/ SSA တို့အကြား တိုက်ပွဲ ပြင်းထန်စွာ ဖြစ်ပွားမှုကြောင့် ကျေးရွာရှိ ပြည်သူများသည် လဲချားမြို့ပေါ်ရှိ ဆွေမျိုးများ အသိမိတ်ဆွေ နေအိမ်များထံ ထွက်ပြေးတိမ်းရှောင်နေရကြောင်း ထွက်ပြေးတိမ်းရှောင်သူ ဒေသခံအမျိုးသမီးတစ်ဦးက ပြောသည်။
“ကျမ တို့တော့ လဲချားမြို့မှာရှိတဲ့ ဆွေမျိုးဆီကို ပြေးလာရတာပေါ့။ တချို့ ဆိုင်ကယ်၊ ထော်လာဂျီ မရှိတဲ့သူတွေ တော့ ရွာမှာ ကျန်နေသေးတယ်။ ဒီလိုမျိုး တိုက်ပွဲဖြစ်တာ တစ်ခါမှ မကြုံဖူးတော့ တချို့လည်း ခြေတွေ၊ လက်တွေ တုန်ပြီး မပြေးနိုင်တဲ့ သူလည်းရှိတယ်။ တချို့ သွေးတိုးသမားဖြစ်တဲ့သူတွေလည်း မပြေးနိုင်ဘဲ ရွာမှာကျန် နေသေးတယ် “ ဟု ၎င်း အမျိုးသမီးတစ်ဦးက ပြောသည်။
အဆိုပါ တိုက်ပွဲဖြစ်ပွားမှုကြောင့် ဟိုင်းဆိုင်အုပ်စု နှင့် မန်ဆေအုပ်စုရှိ ကျေးရွာနေ ပြည်သူများသည် မြို့ပေါ်ရှိ ဆွေမျိုး၊ မိတ်ဆွေထံ ထွက်ပြေးတိမ်းရှောင်နေရကြောင်း သိရသော်လည်း ထွက်ပြေးတိမ်းရှောင်ရသည့် လူဦးရေစာရင်းကိုတော့ မရှိရသေးပေ။
ရှမ်းပြည်တိုးတက်ရေးပါတီ၊ ရှမ်းပြည်တပ်မတော် SSPP/ SSA ၏ ထုတ်ပြန်ချက်အရ ဟိုင်းဆိုင်အုပ်စု ခိုင်းဖက်နမ် နမ့်ပေါက်ကျေးရွာ အနီးရှိ SSPP/SSA ၏ တပ်စခန်းကို အာဏာသိမ်း စစ်ကောင်စီတပ်မှ အင်အား ၇၀ ဖြင့် စတင်ထိုးစစ်ဆင်တိုက်ခိုက်ခဲ့၍ နှစ်ဖက် ထိတွေ့တိုက်ပွဲ ဖြစ်ပွားခဲ့ကြောင်း ဆိုသည်။
အလားတူ လဲချားမြို့နယ် မန်ဆေအုပ်စု မက်လန်းရွာအတွင်း တပ်ဆွဲထားသည့် စစ်ကောင်စီတပ် ခမရ (၅၇၃) ကို ပြန်လည် ခုံခံစစ်ဆင်ခဲ့သည့်အတွက် နှစ်ဖက်ထိတွေ့တိုက်ပွဲများ ပိုမို ပြင်းထန်နေလျက်ရှိကြောင်း ထုတ်ပြန်ချက်၌ ရေးသားဖော်ပြထားသည်။
ထို့အပြင် တိုက်ပွဲသည် စစ်ကောင်စီဘက်မှ SSPP ၏ တပ်စခန်း ၁၀ နေရာကို အကြိမ်ကြိမ်ဆုတ်ခွာခိုင်းခဲ့ရာ SSPP အနေဖြင့် ဌာနချုပ် လုံခြုံရေးအတွက် တပ်မဆုတ်ပေးနိုင်ခဲ့သဖြင့် စစ်ကောင်စီဘက်မှ လာရောက်တိုက်ခိုက်ခဲ့ကြောင်း သိရသည်။
