သျှမ်းပြည် လားရှိုးခရိုင်၊ လားရှိုးမြို့နယ် အမှတ် (၆) ရပ်ကွက်မှ သိန်းထိုက်ရုပ်ရှင်ရုံ အနီးရှိ Sunny Hotel တွင် ယနေ့ (သြဂုတ် ၆) ရက် နံနက် ၁၀ နာရီခွဲဝန်းကျင်၌ ဗုံးပေါက်ကွဲမှု ဖြစ်ပွားခဲ့ကြောင်း သိရသည်။

.

ယနေ့ သြဂုတ်လ ၆ ရက်နေ့ နံနက်ပိုင်း ၁၀ နာရီခွဲဝန်းကျင် အချိန်တွင် လားရှိုးမြို့ အမှတ် (၆) ရပ်ကွက်ရှိ Sunny Hotel တွင် ဗုံးပေါက်ကွဲသံ ကျယ်လောင်စွာ ကြားရပြီး မီးခိုးများလည်း ထွက်လာကြောင်း ဒေသခံများက သျှမ်းသံတော်ဆင့်ကို ပြောသည်။

“အသံက အကျယ်ကြီး ကြားလိုက်ရတယ်၊ မြေကြီးတောင် တုန်သွားတယ်၊ အဲ့နောက်မှာ Sunny Hotel ရှေ့က မီးခိုးတွေ ထွက်လာတာပဲ၊ မီးပါလောင်တာလား မသိဘူး၊ အခုတော့ အဲ့ဒီအရှေ့မှာ မီးသတ်ကား တွေ၊ ရဲကားတွေ ရောက်လာတာ တွေ့ရတယ်” ဟု ဒေသခံများက သျှမ်းသံတော်ဆင့်ကို ပြောသည်။

လက်ရှိတွင် ဗုံးပေါက်မှု ဖြစ်သည့် Sunny Hotel ရှေ့ ၌ လုံခြုံရေး အင်အားများစွာ ရောက်ရှိ လာသည့် အပြင် ရပ်ကွက် (၆) အတွင်းမှ လမ်းကြားများဖြစ်ကြသည့် သုခလမ်းသွယ် နှင့် ရွှေသံလွင်လမ်းသွယ်တို့ ကလည်း စစ်ကောင်စီအင်အားများ ပိတ်ထားကြောင်း သိရသည်။

ဗုံးပေါက်မှုဖြစ်သည့် နေရာသည် Sunny Hotel ၏ အပေါ်ဆုံးအထပ်တွင် ဖြစ်သည်ဟု သိရပြီး ထိခိုက်သေဆုံးမှုနှင့် ပျက်စီးမှုများကို သျှမ်းသံတော်ဆင့်မှ ဆက်လက် စုံစမ်းနေဆဲ ဖြစ်သည်။

“ဘယ်တပ်ဖွဲ့က လာထောင်သွားလဲ မသိဘူး၊ ပေါက်ကွဲမှုက ဟိုတယ်ရဲ့ အပေါ်ထပ်ဆုံးမှာ ဖြစ်တော့ ကျမတို့လည်း နားမလည်နိုင်ဘူး ဖြစ်နေတယ်၊ ပြီးတော့ လုံခြုံရေေးအတွက်လည်း ပိုပြီး စိုးရိမ်ရတာပေါ့” ဟု လားရှိုးမြို့ခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

Sunny Hotel သည် ပြီးခဲ့သည့် ဇူလိုင်လ အတွင်းမှာလည်း မပေါက်ကွဲသေးသည့် ဗုံးတစ်လုံး တွေ့ရှိခဲ့ကြောင်းလည်း သိရသည်။

အဆိုပါ ဗုံးထောင်မှုများသည် လက်နက်ကိုင် အဖွဲ့အစည်းများမှ ဆက်ကြေးကောက် တောင်းယူမှုအတွက် ခြိမ်းခြောက် လုပ်ဆောင်ခြင်း ဖြစ်နိုင်ကြောင်းလည်း သိရသည်။

စစ်တပ်အာဏာသိမ်းပြီးနောက်ပိုင်း လားရှိုးမြို့တွင်းတွင် ခိုးဆိုးလုယက်မှုများအပြင် တိုက်ပွဲများ၊ ဗုံးပေါက်ကွဲမှုများ၊ ပြန်ပေးဆွဲမှုများ မကြာခဏ ဖြစ်ပွားမှုကြောင့် ပြည်သူများသည် လုံခြုံမှုမရှိကာ စိုးရိမ်ကြောက်လန့်မှုနဲ့ နေထိုင်ရကြောင်း သိရသည်။