သျှမ်းပြည် လားရှိုးမြို့ ရပ်ကွက် ၅ အတွင်းရှိ ဝမ်ကောင်းဘုန်းကြီးကျောင်း၏ အနောက်ဘက်မှ နေအိမ်တစ်လုံးသည် လျှပ်စစ်ဝါယာရှော့ဖြစ်ပွားရာမှ တစ်ဆင့် မီးလောင်မှု ဖြစ်ပွားခဲ့ကြောင်း စုံစမ်းသိရသည်။
.
ယမန်နေ့ သြဂုတ် ၃ ရက် ညနေပိုင်း ၅ နာရီအချိန်တွင် လားရှိုးမြို့ ရပ်ကွက် ၅ အတွင်းရှိ ဝမ်ကောင်းဘုန်းကြီးကျောင်း၏ အနောက်ဘက်မှ နေအိမ်တစ်လုံးသည် လျှပ်စစ်ဝါယာရှော့ ဖြစ်ပွားရာမှ တစ်ဆင့် မီးလောင်ကျွမ်းမှုဖြစ်ပြီး တစ်အိမ်လုံး မီးလောင်ပျက်စီးသွားခဲ့ကြောင်း ၎င်းကို သွားရောက်ကူညီခဲ့သည့် လူမှုကူညီရေးအသင်းထံမှ သိရသည်။
“ မနေ့ ညနေပိုင်းလောက် ဖြစ်ပွားတာ။ ကျနော်ကြားတာတော့ လျှပ်စစ်ဝါယာရှော့ ဖြစ်တာကနေ မီးလောင်သွားတယ်လို့တော့ ကြားတယ်။ ပျက်စီးဆုံးရှုံးမှု အသေးစိတ်တော့ မသိရဘူး။ သူ့အိမ်တစ်အိမ်လုံးတော့ ပြောင်သွားတယ်။ အိမ်ပိုင်ရှင်ကတော့ မရှိဘူး၊ လူထိခိုက်ဒဏ်ရာတော့ မရှိဘူး “ ဟု ၎င်း လူမှုကူညီအသင်းမှ တာဝန်ခံတစ်ဦးက ပြောသည်။
အဆိုပါ မီးလောင်မှုကြောင့် နေအိမ်တစ်ခုလုံး မီးလောင်ပျက်စီးသွားခဲ့ပြီး ပျက်စီးမှု တန်ဖိုး၏ အသေးစိတ်ကို မသိရကြောင်း ၎င်းကဆိုသည်။
မီးလောင်မှုကြောင့် အနီးပတ်ဝန်းကျင်ရှိ နေအိမ်မှ ပစ္စည်းများ ရွှေ့ပြောင်းခဲ့ရသလို မီးလောင်ကျွမ်းနေသည့် နေအိမ်ကိုလည်း ၁ နာရီကြာအောင် မီးငြိမ်းသတ်နိုင်ခဲ့ကြောင်း သိရသည်။
အလားတူ ဇူလိုင်လ ၂၁ ရက်တွင် ပင်လုံမြို့ ဝမ်နောင်ကျေးရွာရှိ ဆောက်လက်စ ဘုန်းကြီးကျောင်းတစ်ခုလည်း မီးလောင်မှု ဖြစ်ပွားခဲ့ပြီး ကျောင်းဆောင် ၁ ဆောင်လုံး မီးလောင်ပျက်စီး ဆုံးရှုံးခဲ့ရာ ပျက်စီးမှုတန်ဖိုး ကျပ်သန်း ၃၀၀ ခန့် ရှိကြောင်း သိရသည်။
