သျှမ်းပြည် မူဆယ်မြို့နယ် အတွင်း အာဏာသိမ်း စစ်ကောင်စီ တပ်ဖွဲ့ နှင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တို့ဖြစ်ပွားသည့် တိုက်ပွဲကြား အရပ်သားများထိခိုက်မှုရှိနေကြောင်းစုံစမ်းသိရသည်။

အာဏာသိမ်း စစ်ကောင်စီနှင့် ပြည်သူ့စစ်ပူးပေါင်းအင်အား ၁၀၀ ကျော်ပါသည့် စစ်ကား ၁၀ စီးကို TNLA တပ်ဖွဲ့ က မူဆယ်နှင့် ၁၀၅မိုင် ကုန်သွယ်ရေးဇုန်ကြား အောက်တုန့်ခန် ကျေးရွာအနီး ယနေ့ (သြဂုတ် ၂)ရက် နေ့လည် ပိုင်းတွင် တိုက်ပွဲဖြစ်ပွားခဲ့ရာ ပြည်သူ့စစ်တပ်သား ၂ဦး သေဆုံးခဲ့ကြောင်း သိရသည်။

ထိုမိုင်းဆွဲတိုက်ခိုက်ခံရအပြီး မူဆယ်မြို့ ၁၀၅မိုင် ကုန်သွယ်ရေးဇုန်တွင် တပ်စွဲထားသည့် အမြောက်တပ်မှ လက်နက်ကြီးများဖြင့် ပစ်ခတ်ခဲ့မှုကြောင့် မူဆယ်- ၁၀၅မိုင် ကုန်သွယ်ရေးဇုံကြားရှိ နေအိမ်တလုံး ထိမှန်ခဲ့ပြီး အမျိုးသမီး တဦး လက်နက်ကြီး စထိမှန်ခဲ့ကာ မူဆယ်ပြည်သူ့ဆေးရုံသို့ ပို့ဆောင်ခဲ့ကြောင်း မူဆယ်မြို့ ဒေသခံ သတင်းရင်းမြစ် တစ်ဦးက သျှမ်းသံတော်ဆင့်ကို ပြောသည်။

လက်ရှိတွင် ကျေးရွာအတွင်း ဒေသခံများတချို့လည်း မူဆယ်မြို့ပေါ် နှင့် နမ့်အွမ် ကချင်နှစ်ခြင်း ခရစ်ယာန်ကျောင်းဝန်းသို့ ထွက်ပြေးတိမ်းရှောင်သွားကြောင်းလည်း သိရသည်။

အာဏာသိမ်း စစ်ကောင်စီ နှင့် ပြည်သူ့စစ်တပ်များ မိုင်းဆွဲတိုက်ခိုက်ခံရသည့်နေရာသည် မူဆယ်မြို့ ၁၀၅မိုင် ကုန်သွယ်ရေးဇုံ မှ တရုတ်-မြန်မာနယ်စပ် ကျင်စန်းကျော့ဂိတ်သို့ သွားသည့် လမ်းမကြီး ဖြစ်သည်။

အလားတူပင် ယနေ့ (သြဂုတ် ၂)ရက် နံနက်ပိုင်း တွင် မူဆယ်မြို့နယ် စယ်လန့်ကျေးရွာ အုပ်စု လွိုင်တေးမိန်းတောင်ခြေအနီး စစ်ကောင်စီ နှင့် TNLA တို့ တိုက်ပွဲ ထပ်မံဖြစ်ပွားရာ မူဆယ်မြို့ ထဲရှိ စစ်ကောင်စီတပ် နှင့် ဟိုမွန်ရပ်ကွက်မှ ဆုတောင်းတောင်ရှိ စစ်ကောင်စီတပ်တို့မှ လက်နက်ကြီး များဖြင့် ပစ်ကူခဲ့သည်။

ထို့အပြင် လက်နက်ကြီးပစ်ခတ်မှုကြောင့် စယ်လန့်ကျေးရွာ ဈေးအနီးရှိ နေအိမ်တစ်လုံး ရှေ့တွင် လက်နက်ကြီး ကျရောက်ပေါက်ကွဲ ပြီး အမျိုးသမီး တစ်ဦးနှင့် ကလေးငယ်တစ်ဦးကို လက်နက်ကြီးစ ထိမှန်ခဲ့ကြောင်း ဒေသခံများ သျှမ်းသံတော်ဆင့်ကို ပြောသည်။

“စယ်လန့်ထဲကို လက်နက်ကြီး နှစ်လုံးကျတာ၊ တစ်လုံးက ခြံဝန်းထဲပဲ ပေါက်ကွဲတာ ထိခိုက်ပျက်စီးမှု မရှိဘူး၊ နောက်တစ်လုံးကတော့ အိမ်ရှေ့မှာပေါက်ကွဲပြီး ကလေးငယ် ၁ ဦးနဲ့ အမျိုးသမီးတစ်ဦးကို လက်နက်ကြီးစတွေ ထိမှန်သွားတယ်၊ ဒဏ်ရာတွေတော့ မပြင်းဘူး” ဟု စယ်လန့်ဒေသခံများက သျှမ်းသံတော်ဆင့်ကို ပြောသည်။

လက်ရှိ စယ်လန့်ကျေးရွာအုပ်စု တောင်ရပ်ကွက်မှ ဒေသခံများ အချို့သည် လွိုင်တေးမိန်း ကမ္မဌာန်း ကျောင်းတိုက်သို့ စစ်ရှောင်ထွက်ပြေး နေထိုင်ကြရကြောင်းလည်း သတင်းသိရသည်။

ယနေ့ စစ်ကောင်စီတပ်ဖွဲ့ နှင့် TNLA တိုက်ပွဲကြား ထိခိုက်ကျဆုံးမှုများကို သျှမ်းသံတော်ဆင့်ကို သီးခြား အတည်ပြုနိုင်ခြင်း မရှိသေးပေ။

ယနေ့ (သြဂုတ် ၂)ရက် နံနက်ပိုင်းမှ စတင်ပြီး ယခု သတင်းရေးသားသည့် ည ၉နာရီကျော်ထိ လက်နက်ကြီးသံများ ကြားနေရကြောင်း မူဆယ်မြို့ပေါ်ဒေသခံများ ကပြောသည်။

“ လက်နက်ကြီးသံတွေကတော့ တနေကုန်ပဲ။ အသံတွေကလည်း အကျယ်ကြီးပဲ။ တိုက်ပွဲက ဒီထက် ဆိုးလာနိုင်တဲ့အနေအထားပဲ။ အပြင်ထွက်သွား၊လာတာတော့ သတိထားရမယ်” လို့ မူဆယ်မြို့ ဒေသခံ အမျိုးသမီး တစ်ဦးက ပြောသည်။

အာဏာသိမ်း စစ်ကောင်စီ တပ်ဖွဲ့ နှင့် တအာင်း (ပလောင်) TNLA တပ်ဖွဲ့တို့သည် ပြီးခဲ့သည့် ဇူလိုင်လ ၂၃ ရက်မှ စတင်ကာ မူဆယ်မြို့နယ်အတွင်း ထိတွေ့တိုက်ပွဲ ပြင်းထန်လာခဲ့ ခြင်း ဖြစ်သည်။