သျှမ်းပြည် လားရှိုးမြို့တွင် ယခု သီတင်းပတ်အတွင်း လုပ်ငန်းရှင် ၄ ဦး ပြန်ပြေးဆွဲခံရပြီး ပိုက်ဆံ ကျပ်သိန်း ထောင်နှင့်ချီ ပေးဆောင်နိုင်ခဲ့ပြီး ၂ ဦး ပြန်လွှတ်မြောက်လာခဲ့ကြောင်း စုံစမ်း သိရသည်။

လက်ရှိ ဇူလိုင် သီတင်းပတ်အတွင်း၌ လားရှိုးမြို့ရှိ လုပ်ငန်းရှင် ၄ ဦးကို အမည်မသိ အဖွဲ့အစည်းတစ်ခုမှ ပြန်ပေးဆွဲသွားခဲ့ပြီး တစ်ဦးကို ပိုက်ဆံ ကျပ်သိန်းပေါင်း ထောင်နှင့်ချီ တောင်းခံကာ ပိုက်ဆံပေးနိုင်ခဲ့သည့် သားအဖ ၂ ဦး ပြန်လွတ်မြောက်လာခဲ့ကြောင်း အမည်မဖော်လိုသူ လားရှိုးမြို့ဒေသခံ တစ်ဦးက ပြောသည်။

“တချို့ပြောတာတော့ သိန်းပေါင်း သောင်းနှင့်ချီ ပေးရတယ်ပြောတယ်။ ၂၀,၀၀၀ ပေးရတယ် ပြောတယ်။ သိန်းပေါင်း ၆,၀၀၀ ပေးရတယ်လို့ ကြားတယ်။ အမျိုးမျိုးပဲ ကြားနေရတယ်။ ဘယ်လောက်ပေးရလဲ အတိအကျတော့ မသိရဘူး။ ပြန်ပေးဆွဲခံရတဲ့ ၄ ယောက်ထဲက သားအဖ နှစ်ယောက်တော့ ပြန်လွတ်လာတယ်။ ကျန်တဲ့ နှစ်ယောက်ကတော့ ပြန်လွတ်လာတာ မကြားသေးဘူး “ ဟု ၎င်းက ပြောသည်။

အဆိုပါ ပြန်ပေးဆွဲခံရသည့်သူ ၄ ဦးထဲမှ သားအဖဖြစ်သူ အမျိုးသား ၂ ဦးသည် ပိုက်ဆံ ကျပ်သိန်းပေါင်း ထောင် နှင့်ချီပေးဆောင်ခဲ့၍ ပြန်လွတ်မြောက်လာခဲ့ကြောင်း သိရသော်လည်း ပေးခဲ့ရသည့် ကျပ်ငွေ အတိအကျကိုတော့ မသိရှိရသေးပေ။

ထို့အပြင် ပြန်ပေးဆွဲခံရသည့် လုပ်ငန်းရှင်များသည် လားရှိုးမြို့တွင် သူဌေးသူကြွယ်များ ဖြစ်ကြပြီး အခွန်ဆောင် ကိစ္စနှင့် ပတ်သက်၍ မပေးဆောင်နိုင်ခဲ့သောကြောင့် အခုလို ပြန်ပေးဆွဲခံရခြင်း ဖြစ်နိုင်ကြောင်း လားရှိုးမြို့ ဒေသခံတစ်ဦးက ထပ်လောင်းပြောသည်။

“ အခု လားရှိုးမြို့က အရင်ကနဲ့ မတူတော့ဘူး။ ဗုံးတွေကွဲလိုက်၊ တိုက်ပွဲဖြစ်လိုက်နဲ့ ပြည်သူတွေလည်း ဒုက္ခတော်တော်ရောက်နေပြီ။ များသောအားဖြင့် ပြန်ပေးဆွဲခံရသူတွေက လုပ်ငန်းရှင် သူဌေးတွေ ဖြစ်တယ်။ သူတို့ အခွန်မဆောင်လို့လားပဲ အခုလို ပြန်ပေးဆွဲပြီး ပိုက်ဆံတောင်းခံရတော့ မပြောတတ်ဘူး။ ကျနော်တို့လည်း ဒါတွေကြားနေရတာ၊ မြင်နေရတာ နဲ့ အပြင်သွားဖို့တောင် အတော်ကိုကြောက်နေတယ်။ လုံခြုံရေးက လုံးဝမရှိတော့တာ “ ဟု ပြောသည်။

စစ်တပ်အာဏာသိမ်းပြီးနောက်ပိုင်း လားရှိုးမြို့တွင် ခိုးဆိုးလုယက်၊ သူခိုး၊ ဓားပြတိုက်အပြင် တိုက်ပွဲများ၊ ဗုံးပေါက်ကွဲမှုများ၊ ပြန်ပေးဆွဲမှုများ မကြာခဏဖြစ်ပွားမှုကြောင့် ပြည်သူများသည် လုံခြုံမှုမရှိကာ စိုးရိမ်ကြောက်လန့်မှုနဲ့ နေထိုင်ရကြောင်း သိရသည်။

အလားတူ လားရှိုးမြို့တွင် စစ်ကောင်စီအပါအဝင် ပြည်သူ့စစ်နှင့် တိုင်းရင်းသား လက်နက်ကိုင်များ ဖြစ်ကြသည့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် SSPP/SSA ၊ ကိုးကန့်တပ်ဖွဲ့ MNDAA နှင့် တအာင်း (ပလောင်) အမျိုးသားလွတ်မြောက်ရေးတပ်မတော် TNLA တို့က သွားလာလှုပ်ရှား နေလျက်ရှိကြောင်း သိရသည်။