မြန်မာပြည်နယ်စပ် သျှမ်းပြည်အတွင်း အများအပြားရှိသည့် အွန်လိုင်းရာဇာဝတ်မှုများကို နှိမ်နင်းရန် တရုတ်အစိုးရ က စစ်ကောင်စီကို တိုက်တွန်းပြောဆိုလိုက်သည်။
မြန်မာနိုင်ငံဆိုင်ရာ တရုတ်သံအမတ်ကြီး Mr.Chen Hai သည် စစ်ကောင်စီ၏ နိုင်ငံခြားရေးဝန်ကြီး ဦးသန်းဆွေ နှင့် ဇူလိုင် ၂၅ ရက်နေ့က နေပြည်တော်တွင် တွေ့ဆုံခဲ့ကြသည်။
ထိုတွေ့ဆုံချိန်တွင် တရုတ်သံအမတ်က မြန်မာနိုင်ငံမြောက်ပိုင်း အပါအဝင် မြန်မာနယ်စပ်ဒေသများတွင် အွန်လိုင်းရာဇာဝတ်မှုများ ဆက်လက်များပြားနေပြီး၊ တရုတ် – မြန်မာနှစ်နိုင်ငံ ပြည်သူများ၏ ကိုယ်ပိုင် အကျိုးစီးပွားများကို ဆိုးရွားစွာ ထိခိုက်နေသဖြင့် ဆက်သွယ်ရေး လိမ်လည်မှု ရာဇာဝတ်မှုများကို နှစ်နိုင်ငံ ပူးပေါင်းနှိမ်နင်းမည်ဟု ဆွေးနွေးခဲ့ကြသည်။
အဆိုပါ ရာဇာဝတ်မှုများ ပျံ့နှံ့နေမှုအတွက် တရုတ် – မြန်မာ နှစ်နိုင်ငံ၊ တရုတ် – မြန်မာ – ထိုင်း သုံးနိုင်ငံ ပူးပေါင်း တိုက်ဖျက် နှိမ်နင်းမှုများ ဆောင်ရွက်ခဲ့ရာ ရလဒ်ကောင်းများ ရရှိခဲ့ကြောင်း၊ ထို့အပြင် ဆက်သွယ်ရေးလိမ်ညာမှု ရာဇာဝတ်မှု ဆက်လက်ပျံ့နှံနေသဖြင့် အိမ်နီးချင်းများနှင့် ပူးပေါင်းနှိမ်နင်းမှု လုပ်သင့်ကြောင်း၊ ဆက်သွယ်ရေး လိမ်လည်မှု ခိုအောင်းနေသည့် နေရာများကို အစွမ်းကုန် နှိမ်နင်းပြီး ပိတ်မိနေသော တရုတ်နိုင်ငံသားများကို ကယ်တင်ကာ မြန်မာနိုင်ငံ ပြည်တွင်းရှိ ဆက်သွယ်ရေး လိမ်လည်မှု အွန်လိုင်းလောင်းကစားမှု အကြွင်းအကျန်များကို အမြစ်ဖြတ်ပစ်ရမည် ဖြစ်ကြောင်း တရုတ်သံရုံး ထုတ်ပြန်ချက်တွင် ရေးသားထားသည်။
အွန်လိုင်း လိမ်ညာမှု အများစုမှာ မြန်မာ – တရုတ်နယ်စပ် မူဆယ်မြို့နယ်၊ လောက်ကိုင်မြို့နယ်၊ မိုင်းပေါက်မြို့နယ် တို့အပြင် မြန်မာ – ထိုင်းနယ်စပ် တာချီလိတ်မြို့ နှင့် မြဝတီ ရွှေကုက္ကိုလ် တွင် တရားမဝင် ဖွင့်လှစ်နေကြောင်း သိရသည်။
စစ်အာဏာသိမ်းပြီးနောက်ပိုင်းမှာ နိုင်ငံရေး၊ စစ်ရေး ပဋိပက္ခတွေကြောင့် မြန်မာနိုင်ငံမှာ စီးပွားရေး တရိပ်ရိပ်ကျဆင်းလာပြီး အလုပ်လက်မဲ့ လူငယ်များလာကြသည်။
ထို့နောက် ငွေကြေး အဆမတန်ပေးသည့် အွန်လိုင်းလိမ်ညာမှုလုပ်ငန်းခွင်ကို လူငယ်များက ရောက်ရှိသွားကြောင်း၊ ထိုနေရာတွင် အလုပ်သွားလုပ်သည့် လူငယ်များသည် လူကုန်ကူးမှု ခံရပြီး ပြန်လွှတ်လာသည့် သူအများစုများရှိသည်။
“ဒီ လောက်ကိုင်၊ မိုင်းပေါက်ဘက် လူကုန်ကူးမှုခံနေရတာထဲမှာ ထိုင်းအမျိုးသမီးတွေလည်း ပါတယ်။ မနှစ်က ကျနော်တို့ အဖွဲ့က ထိုင်း ၃ ယောက်လောက် ကယ်တင်နိုင်ခဲ့ပါတယ်။” ဟု Alliance Anti Trafi (AAT) အဖွဲ့မှ စိုင်းဂွဏ်းက ပြောသည်။
လက်ရှိမှာလည်း လောက်ကိုင်မြို့နယ် အတွင်းသို့ ထိုင်းအမျိုးသမီး တစ်ဦး လူကုန်ကူးခံနေရကြောင်း၊ ထိုင်းအမျိုးသမီးကို ကယ်ထုတ်နိုင်ရန်အတွက် ထိုင်းအာဏာပိုင်များက ကြိုးစားနေဆဲ ဟု ထိုင်းအာဏာပိုင် တစ်ဦးက သျှမ်းသံတော်ဆင့်ကို ပြောသည်။
“ လောက်ကိုင်ဘက်ကို ဘယ်လိုရောက်သွားလဲမသိဘူး။ ကျနော်တို့ဆီကို Line ကနေ ဆက်သွယ်လာတယ်။ လောဆယ်တော့ ကျနော်တို့လည်း ကယ်ထုတ်နိုင်ဖို့ ကြိုးစားနေတယ်။ ကျနော်အထင် ဒီထက်များနိုင်တယ်” ဟု ထိုင်းအာဏာပိုင် တစ်ဦးက ဆိုသည်။
ထိုအွန်လိုင်းလိမ်လည်မှု လာရောက်ဖွင့်သူများသည် တရုတ်နိုင်ငံသားများဖြစ်ကြောင်း သိရသည်။
မြန်မာနိုင်ငံမြောက်ပိုင်း နှင့် မြန်မာနယ်စပ်တကြောရှိ အွန်လိုင်းလိမ်လည်မှု ရာဇာဝတ်မှုများတွင် မြန်မာစစ်ကောင်စီ အဖွဲ့ဝင်များ ပါဝင်ပတ်သက်မှုရှိနေကြောင်းလည်း ဒေသခံများပြောပြချက်အရ သိရသည်။
