သျှမ်းပြည်အတွင်း အလုပ်အကိုင်မတည်ငြိမ်မှု၊ မူးယစ်ဆေးဝါးသုံးစွဲမှုနှင့် အွန်လိုင်း လောင်းကစား ဂိမ်းများ ပျံ့နှံ့လာခြင်းတို့ကြောင့် ခိုးဆိုးလုယက်မှုများ ဆက်တိုက်ဖြစ်ပွားလာကြောင်း ဒေသခံများက ပြောသည်။
သျှမ်းပြည်အတွင်း ခိုးဆိုးလုယက်မှု ကျူးလွန်သူအများစုသည် အသက် ၂၀ မှ ၃၅ နှစ်ကြား လူငယ်၊လူလတ်ပိုင်းများဖြစ်ပြီး မူးယစ်ဆေးဝါးနှင့် အွန်လိုင်းလောင်းကစားများကြောင့် ငွေကြေး လိုအပ်ရာမှ ပြစ်မှုကျူးလွန်မှု ဖြစ်ပွားလာရကြောင်း အောင်ပန်းမြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“အလုပ်လုပ်နေတဲ့သူတွေက သူတို့ရဲ့ ပုံမှန်ဝင်ငွေနဲ့ ရပ်တည်နေကြပါတယ်။ ဒါပေမယ့် တချို့ကြတော့ အလုပ်မလုပ်ဘဲ အွန်လိုင်းဂိမ်းတွေဆော့တာ၊ မူးယစ်ဆေးဝါး သုံးစွဲတာတွေ များလာတယ်။ အဲ့ဒီရဲ့ နောက်ဆက်တွဲအနေနဲ့ ခိုးဆိုးလုယက်မှုတွေ ဆက်တိုက်ဖြစ်လာတာလို့ မြင်ပါတယ်။ အရင်တုန်းက ခိုးဆိုးတာက ရှိတော့ ရှိတယ်။ ခုလိုမများခဲ့ဘူး။” ဟု အောင်ပန်းမြို့ဒေသခံ အမျိုးသားတစ်ဦးက ပြောသည်။
ထို့အပြင် သျှမ်းပြည် အရှေ့ပိုင်း ကျိုင်းတုံမြို့နယ် နှင့် တာချီလိတ်မြို့နယ်တို့တွင်လည်း အလုပ်အကိုင်ရှားပါးလာခြင်း နှင့် မူးယစ်ဆေးဝါးသုံးစွဲမှုတို့ကြောင့် ခိုးဆိုးလုယက်မှုများ ပိုမိုဖြစ်ပွားလာကြောင်း ကျိုင်းတုံမြို့ဒေသခံ အမျိုးသားတစ်ဦးက ဆက်ပြောသည်။
“အရင်ကတော့ ဆိုင်ကယ်ခိုးတာလောက်ပဲ ရှိတယ်။ခုက မြို့လည်ခေါင်မှာ ဓားပြတိုက်တဲ့ အဆင့်ထိဖြစ်နေတာလေ။အရင်ကဆို မရှိသလောက် ရှားတဲ့ဖြစ်စဉ်တွေပါ။ အခုက လူလစ်ရင် အိမ်ထဲထိ ဝင်ခိုးမယ်၊ ပိုင်ရှင် တည့်တိုးရင် ဓားတွေ၊ တုတ်တွေနဲ့ ခြိမ်းခြောက်ပြီး ဓားပြတိုက်တဲ့ အခြေအနေအထိ ဖြစ်လာတယ်” ဟု ကျိုင်းတုံမြို့ဒေသခံ အမျိုးသားတစ်ဦးက ဆိုသည်။
အဆိုပါ နေအိမ်များအတွင်း ဝင်ရောက်ခိုးယူခြင်း၊ ပိုင်ရှင်များကို လက်နက်ဖြင့် ခြိမ်းခြောက် လုယက်ခြင်းများ ပိုမိုဖြစ်ပွားလာနေပြီး CCTV မှတ်တမ်းများတွင်လည်း လူ ၂ ဦးမှ ၄ ဦးခန့် အုပ်စုဖွဲ့ ကျူးလွန်သည့် ဖြစ်စဉ်များကို တွေ့ရှိရကြောင်း ၎င်းကပြောသည်။
အလားတူ မူဆယ်မြို့နယ်တွင်လည်း အွန်လိုင်းလောင်းကစားဂိမ်းများ၊ ပြင်ပလောင်းကစားများနှင့် မူးယစ်ဆေးဝါးပြဿနာတို့ကြောင့် ခိုးဆိုးလုယက်ခြင်း နှင့် ဓားပြတိုက်မှု မြင့်တက်လာရကြောင်း မူဆယ်မြို့နယ်ဒေသခံ အမျိုးသားတစ်ဦးက ဆက်ပြောသည်။
“ပုံမှန်အလုပ်လုပ်နေတဲ့သူတွေကတော့ စားဝတ်နေရေးအတွက် ရုန်းကန်နေကြတာ။ဒါပေမယ့် အွန်လိုင်းလောင်းကစားတွေ ဆော့လာကြတာ မူးယစ်တွေသုံးလာတဲ့နောက် ခိုးဆိုးလုယက်တာတွေနဲံ ဓားပြတိုက်တာတွေဖြစ်လာကြတယ်။ ကျနော်တို့ ဖမ်းမိတဲ့သူတွေဆိုရင် အသက် ၂၀ ကနေ ၃၅ ကြား အများဆုံးပဲ” ဟု မူဆယ်မြို့နယ်ဒေသခံ အမျိုးသားတစ်ဦးက ပြောသည်။
သျှမ်းပြည် ပြည်သူများ၏ လုံခြုံရေး စိုးရိမ်မှု မြင့်တက်လာသဖြင့် ညပိုင်းအချိန်များတွင် သွားလာသူများ လျော့နည်းလာကြောင်း ဒေသခံများက ပြောသည်။
“အခုဆို ည ၇ နာရီနောက်ပိုင်း အသွားအလာ နည်းလာတယ်။ ည ၈ နာရီကျော်ရင် လူသွားလူလာ သိသိသာသာ နည်းသွားပြီ။ လုံခြုံရေးအတွက် စိုးရိမ်ရတဲ့ အခြေအနေ ဖြစ်လာတယ်” ဟု မူဆယ်မြို့ခံအမျိုးသားတစ်ဉီးက ဆိုသည်။
စစ်ကောင်စီ အာဏာသိမ်းပြီးနောက် ၂၀၂၁ ခုနှစ်နောက်ပိုင်းမှစပြီး မြန်မာတဝှမ်းတွင် စီးပွားရေးအခက်အခဲများ နှင့် အတူ တဖြည်းဖြည်း မြင့်တက်လာခဲ့ပြီး လက်ရှိတွင် ဒေသအချို့၌ ပြည်သူများ၏ လုံခြုံရေးစိုးရိမ်မှုကို မြင့်တက်စေသည့် အခြေအနေအထိ ဖြစ်ပေါ်လာနေကြောင်း ဒေသခံများကပြောသည်။
သျှမ်းပြည် ဒေသအချို့တွင် စစ်တပ်နှင့် သက်ဆိုင်ရာတာဝန်ရှိသူများ လုံခြုံရေးယူထားသော်လည်း ထိရောက်စွာကိုင်သွယ်နိုင်ခြင်းမရှိသည့်အပြင် တရားဥပဒေ စိုးမိုးမှုကင်းမဲ့နေပြီး ခိုးခြင်း၊ လုယက်ခြင်း၊ ဓားပြတိုက်ခြင်း နှင့် ပြန်ပေးဆွဲသည်အထိ ရာဇဝတ်မှု ကျူးလွန်ခြင်းများပြားလာခဲ့သည်။
Leave a Comments