သျှမ်းပြည် ရပ်စောက်မြို့နယ် ယမ်းတွင်းငါးကြောင်ကျေးရွာအုပ်စုရှိ ဒေသခံများကို PDF နှင့် နိုင်ငံရေးအကြောင်း ဆက်စပ်ပတ်သက်မှုရှိသည်ဟုဆိုပြီး ပအိုဝ်းပြည်သူ့စစ် ( PNO) မှ ဖမ်းဆီးရိုက်နှိက်ကာ ငွေတောင်းခံမှု ပြုလုပ်နေကြောင်း စုံစမ်းသိရသည်။
စစ်ကောင်စီ လက်အောက်ခံ ပအိုဝ်းပြည်သူ့စစ် PNO သည် အင်အား ၂၀ ခန့်ရှိ စစ်ဝတ်စုံ နှင့် လက်နက်ကိုင်ဆောင်ထားပြီး ကျေးရွာအတွင်းရှိ လူငယ်များကို PDF နှင့် ဆက်စပ် ပတ်သက်မှုရှိသည်ဟု ဆို၍ ဖမ်းဆီး ရိုက်နှိက်မှု ပြုလုပ်နေကြောင်း အမည်မဖော်လိုသူ ဒေသခံတစ်ဦးမှ KhamHti Radio ကိုပြောပြချက်အရ ကိုးကားထားသည်။
“ PNO ပြည်သူ့စစ်လို့ ပြောရတာက PNO အဖွဲ့ထဲကို ဝင်ထားတဲ့ ပအိုဝ်း မဟုတ်တဲ့သူတွေပါ နေလို့ပါ။ တချို့ ကျေးရွာတွေမှာ PNO အဖွဲ့ထဲ ဝင်ထားတဲ့သူ တွေရှိပါတယ်။ သူတို့ကို ယူနီဖောင်း နဲ့ လက်နက် တပ်ဆင်ပေးထားတယ်။ အဲ့ဒီ လက်နက်အားကိုးနဲ့ပဲ မထင်ရင် မထင်သလို ကျေးရွာထဲကို လိုက်ဝင်ပြီး ကလေးတွေကို ဖမ်းဆီးရိုက်နှိက်တာမျိုးတွေ လုပ်တယ်။ အကြောင်းက ဖုန်းထဲမှာ နိုင်ငံရေး နဲ့ ပတ်သက်တဲ့ ပုံတွေတွေ့လိုတဲ့။ ပြီးတော့ လက်နက်တွေတွေ့လို့ပါဆိုပြီး ဖမ်းခေါ်သွားတာမျိုးလည်း ရှိတယ်။ သူတို့ဆီလိုက်သွားပြီးတော့ ညှိနိူင်းပြီး ပိုက်ဆံနဲ့ ပြန်ထုတ်ရတာပေါ့ “ ဟု ၎င်းက ပြောသည်။
ယင်းကဲ့သို့ PNO မှ ဖမ်းဆီးရိုက်နှိက်သည့် ကျေးရွာထဲ၌ တော်လှန်ရေး နှင့် ပတ်သက်ပြီး ပါဝင်သည့်သူများ မရှိသလောက် နည်းပါးနေပြီး အမြဲတမ်းလိုပင် မင်္ဂလာပွဲ၊ အလှူပွဲ၊ ဘောလုံးပွဲများ စည်ကားနေကြောင်း သိရသည်။
ထို့အပြင် ပအိုဝ်းပြည်သူ့စစ် PNO သည် ခေတ်ပျက်နေသည့် ကာလ၌ အခွင့်ကောင်းယူပြီး လက်နက် အားကိုးကာ ပြည်သူများကို အနိုင်ကျင့် ဗိုလ်ကျနေခြင်းဟာ အတော်ကိုရုပ်ဆိုး အကျည်းတန်ကြောင်း ဒေသခံများက ပြောဆိုသည်။
