စစ်ကောင်စီသည် ဇူလိုင်လကုန် ၂ သောင်းတန် အသစ်ကို ထုတ်ဝေသွားမည်ဟု ကြေညာပြီးနောက်ပိုင်း သျှမ်းပြည်အတွင်း ဆေးဆိုင်၊ ကုန်စုံဆိုင်အချို့က အရောင်း၊ အဝယ် ရပ်တန့်ထားကြောင်း စုံစမ်း သိရှိရသည်။
လက်ရှိ သျှမ်းပြည် တောင်ကြီးမြို့နယ်အတွင်း ဆေးကုမ္ပဏီ ၊ အချိုရည်ကုမ္ပဏီ ၊ ကုန်စုံဆိုင်များ ကုန်တင်ပို့မှုမရှိတော့ဘဲ ဆိုင်များလည်း အရောင်းအဝယ် ရပ်တန့်ထားကြောင်း သိရသည်။
“ဆေးကုမ္ပဏီတစ်ချို့ အရောင်းဝယ်တွေ အားလုံး ရပ်ထားလိုက်ကြပြီ။ ဆိုင်ကတော့ ဖွင့်ထားတယ်။ ဒါပေမဲ့ မရောင်းပေးကြတော့ဘူး။ အချိုရည်ကုမ္ပဏီတွေလည်း ရောင်းဝယ်တာ ပိတ်ထားလိုက်ပြီ။ တစ်ချို့ကတော့ လက်ကျန်တွေကို အကုန်ရောင်းနေကြတာလည်း ရှိတယ်။ ကုန်အသစ်တော့ မတင်သွင်းကြတော့ဘူး” ဟု တောင်ကြီးမြို့ ဒေသခံ အမျိုးသမီးတစ်ဦးက ပြောသည်။
ထိုအပြင် တောင်ကြီးမြို့နယ်ထဲတွင်လည်း ကားရောင်းဝယ်ရေးများလည်း ရပ်ထားကြောင်းသိရသည်။
အလားတူ လားရှိုးမြို့နယ်တွင်လည်း ကုန်စုံဆိုင်တစ်ချို့က ဖွင့်ထားသော်လည်း ရောင်းဝယ်ပေးခြင်း မရှိကြောင်း သိရသည်။
“လားရှိုးမှာလည်း ဆိုင်တွေတော့ ဖွင့်ထားပါတယ်။ ဒါပေမဲ့ မရောင်းပေးချင်ကြဘူးတဲ့။ ဒီတိုင်း ဗန်းပြပြီးတော့ ဖွင့်ထားတာ။ ၂ သောင်းတန် ထွက်လာတော့မယ်ဆိုတော့ မရောင်းပေးကြတာထင်တယ်။ ပြီးတော့ တစ်ချို့ဆိုင်တွေဆိုကုန်ဈေးနှုန်းတွေက တက်နေပြီ” ဟု လားရှိုးမြို့ ဒေသခံအမျိုးသမီးက ပြောသည်။
အဆိုပါ ဆိုင်ကို ဗန်းပြဖွင့်ထားပေးခြင်းသည် စစ်ကောင်စီက လာရောက်ဖမ်းဆီးမှုကို စိုးရိမ်သောကြောင့် ဖွင့်ထားကြောင်း တောင်ကြီးမြို့ အဝတ်ထည်ရောင်းသည့် ဆိုင်ရှင်တစ်ဦးက ပြောသည်။
“ကျမတို့ကတော့ ရောင်းပေးပါတယ်။ ဈေးကတော့ တည်ငြိမ်မနေဘူး။ ဈေးပြန်တက်တယ်။ တစ်ချို့ဆိုင်တွေကတော့ ဖွင့်တယ်။ မရောင်းပေးဘူး။ ဒီတိုင်းပဲ ဖွင့်ထားတယ်။ စစ်ကောင်စီက လာဖမ်းမှာဆိုးလို့ သူတို့က ဒီတိုင်းဗန်းပြဖွင့်ထားတာ။ မဖွင့်တဲ့ဆိုင်များရင် သူတို့လာဖမ်းမှာလည်း ကြောက်ရတယ်လေ” ဟု ၎င်းက ပြောသည်။
စစ်ကောင်စီက ကျပ်ငွေ ၂ သောင်းတန်အသစ် ထုတ်ဝေလာသည့်အတွက်ကြောင့် ငွေဖောင်းပွလာနိုင်ကြောင်း အမျိုးသား ညီညွတ်ရေးအစိုးရ NUG က သုံးသပ်ပြောဆိုထားသည်။
ထိုအပြင် စစ်ကောင်စီကို နိုင်ငံတကာက အရေးယူ ပိတ်ဆို့လာသည့်အတွက်ကြောင့် ဝင်ငွေရရှိမှု နည်းလာသည့်အတွက်ကြောင့် ၂ သောင်းတန်အသစ်ကို ထုတ်ဝေလာခဲ့ကြောင်း သိရသည်။
အဆိုပါ ၂ သောင်းတန်အသစ်ကို ဇူလိုင်လကုန်တွင် အကန့်သတ်ဖြင့် ဖြန့်ဝေသွားမည်ဖြစ်ကြောင်း စစ်ကောင်စီ ဗဟိုဘဏ်က ယမန်နေ့ ဇူလိုင် ၂၃ ရက်တွင် ထုတ်ပြန်ထားသည်။
