သျှမ်းပြည် မူဆယ်ခရိုင်၊ စယ်လန့်ကျေးရွာအနီးရှိ နမ့်မွမ်းတံတားအနီးတွင် အာဏာသိမ်း စစ်ကောင်စီ တပ်ဖွဲ့ နှင့် တအာင်း (ပလောင်) အမျိုးသား လွတ်မြောက်ရေး တပ်မတော် TNLA တို့က ထိတွေ့တိုက်ပွဲ ဖြစ်ပွားနေကြောင်း စုံစမ်းသိရသည်။
ယနေ့ (ဇူလိုင်လ ၂၃ ) ရက် ညနေပိုင်း ၅ နာရီဝန်းကျင်တွင် စယ်လန့်ကျေးရွာ ၊ နမ့်မွန်းတံတား အနီးတွင် TNLA နှင့် စစ်ကောင်စီတပ်ဖွဲ့တို့ ထိတွေ့မှုဖြစ်ပွားပြီး လက်နက်ကြီး လက်နက်ငယ် အသုံးပြုမှု ရှိနေကြောင်း ဒေသခံများက သျှမ်းသံတော်ဆင့်ကို ပြောသည်။
“စက်သေနတ်သံတွေရော၊ ဗုံးသံတွေပါ ကြားရတယ်။ လှမ်းမြင်ရသလောက်က အငွေ့တွေလည်း မိုးပေါ်ထွက် လာတယ်။ ပစ်နေကြတာက ၁၀ မိနစ်ကျော်ကြာတယ်။ စကစ နဲ့ TNLA တပ်တွေ ထိတွေ့မှု ဖြစ်တာတဲ့” ဟု အမည်မဖော်လိုသူ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
ယင်းကဲ့သို့ ထိတွေ့ ပစ်ခတ်မှုဖြစ်ပွားလာပြီး နောက်ပိုင်း ဗုံးပေါက်ကွဲသံ ၃ ချက် ဆက်တိုက်လည်း ထပ်မံထွက် ပေါ်လာကြောင်း ဒေသခံများက ဆက်ပြောသည်။
ယင်းကဲ့သို့ တိုက်ပွဲဖြစ်ပွားမှုကြောင့် လက်ရှိတွင် ကားလမ်းလည်း ပိတ်ထားရပြီး လမ်းဘေး၌ ကားသမားများက ယာဥ်ရပ်နား ထားရကြောင်းလည်း ဒေသအတွင်း ကားသမား တစ်ဦးက သျှမ်းသံတော်ဆင့်ကို ပြောသည်။
“ကားတွေလည်း မထွက်နိုင်သေးဘူး၊ လမ်းဘေးမှာ ကားရပ်ပြီး အခြေအနေတွေကို စောင့်ကြည့်နေရသေးတယ်။ အဲ့ဖက် ဖြတ်သွားမယ်ဆိုရင် ပလောင်တပ်ရော၊ စစ်ကောင်စီတပ်ရော ကြုံရနိုင်တယ်”ဟု အထက်ပါ ကားသမားက သျှမ်းသံတော်ဆင့်ကို ပြောသည်။
ထိတွေ့တိုက်ပွဲ ဖြစ်ပွားခြင်း နှင့် ပတ်သက်ပြီး အသေးစိတ် အချက်အလက် နှင့် နှစ်ဖက် တပ်ဖွဲ့၏ ထိခိုက်ကျဆုံးမှုကို သျှမ်းသံတော်ဆင့်မှ ဆက်လက် စုံစမ်းမေးမြန်းနေဆဲ ဖြစ်သည်။
အဆိုပါ နမ့်မွမ်းတံတားသည် TNLA တပ်ဖွဲ့မှ အခွန်ကောက်ရန် လာစောင့်သည့် နေရာဖြစ်ပြီး နေ့စဥ်ရက်ဆက် ကောက်ယူတောင်းခံမှုကြောင့် ဒေသခံများ သွားရေးလာရေးအတွက်လည်း ခက်ခဲကြောင်းလည်း သိရသည်။
ထို ထိတွေ့တိုက်ပွဲ ဖြစ်ပွားရာ အနီးတစ်ဝိုက်တွင် စစ်ကောင်စီတပ်ဖွဲ့ နှင့် TNLA တပ်ဖွဲ့ အပြင်၊ ရှမ်းပြည်တိုးတက်ရေးပါတီ၊ ရှမ်းပြည်တပ်မတော် SSPP/SSA ၊ ကချင်လွတ်လပ်ရေးတပ်မတော် KIA တို့ကလည်း သွားလာ လှုပ်ရှားလေ့ရှိကြောင်း စုံစမ်း သိရသည်။
စစ်ကောင်စီ တပ်ဖွဲ့ နှင့် TNLA တပ်ဖွဲ့သည် ပြီးခဲ့သည့် ဇူလိုင်လ ၁၀ ရက်နေ့တွင် ကျောက်မဲခရိုင်၊ မိုင်းငေါ့မြို့နယ် (ခွဲ) အတွင်း ထိတွေ့တိုက်ပွဲဖြစ်ပွားခဲ့ပြီး ၎င်းတို့ တိုက်ပွဲအပြီး၌ ဒေသခံ နှစ်ဦးကလည်း မိုင်းနင်းမိ ထိခိုက် ဒဏ်ရာရသွားခဲ့သည်။
