သျှမ်းပြည် လွိုင်လင်မြို့နယ် ပင်လုံမြို့ ဝမ်နောင်ကျေးရွာရှိ ဆောက်လက်စ ဘုန်းကြီးကျောင်း ယနေ့ (ဇူလိုင် ၂၁) ရက် နံနက်ပိုင်းတွင် မီးလောင်မှု ဖြစ်ပွားခဲ့ကြောင်း စုံစမ်းသိရသည်။
ဖြစ်စဉ်မှာ ယနေ့ (ဇူလိုင် ၂၁) ရက် နံနက်အစောပိုင်း အချိန်၌ ပင်လုံမြို့နယ် ဝမ်နောင်ကျေးရွာရှိ ဆောက်လက်စ ဘုန်းကြီးကျောင်းဆောင်သည် မီးလောင်မှု ဖြစ်ပွားပြီး ကျောင်းဆောင် ၁ ဆောင်လုံး မီးလောင် ပျက်စီးဆုံးရှုံးမှုရှိပြီး ဆုံးရှုံးမှု တန်ဖိုး ကျပ်သိန်း ၃၀၀ ခန့် ရှိကြောင်း ဒေသခံတစ်ဦးက သျှမ်းသံတော်ဆင့် ကိုပြောသည်။
“ ဦးဇင်းက ဘုရားရှိခိုးနေတုန်း ကျောင်းမှာ မီးလောင်နေတာတွေ့တော့ ကျနော်ဆီကို ဖုန်းဆက် အကြောင်းကြားလာတာ။ တိုင်ခြေတစ်လုံး ရဲ့ အောက်ကနေစပြီး တိုင်ထိပ်ပြီး မီးစလောင်တာ။ တိုင်ရဲ့ အောက်မှာက သစ်သား အမှိုက်စ တွေ ရှိတယ်လေ။ ထင်တာတော့ ဆေးလိပ်သောက်ပြီး မီးကို သေချာမငြိမ်းခဲ့လို့ အဲ့သစ်သား အမှိုက်စကနေပြီး မီးလောင်တာပဲလို့ ထင်တာပဲ “ ဟု ၎င်းက ပြောသည်။
အဆိုပါ မီးလောင်မှုကြောင့် ဆောက်လက်စ ကျောင်းဆောင် ၁ ဆောင်လုံး မီးလောင်ပျက်စီးဆုံးရှုံး သွားခဲ့ကြောင်း သိရသည်။
လက်ရှိ ဆောက်လက်စ ကျောင်းဆောင်အသစ်သည် ပြီးခဲ့သည့် ၂၀၁၉ ခုနှစ်မှစ၍ ဆောက်လုပ်ခဲ့ရာ ၅ နှစ်ခန့် ကာလအတွင်း ၈၅ ရာခိုင်နှုန်း ဆောက်လုပ် ပြီးစီးခဲ့ပြီဖြစ်ကြောင်း သိရသည်။
“ကျောင်းကတော့ ဆောက်လုပ်နေတာ ကြာပါပြီ။ ၄ နှစ်ကျော် ၅ နှစ်လောက် ရှိနေပြီ။ ဆောက်နေတာ အတော်လေးကို ပြီးနေပြီ။ ၈၅ ရာခိုင်နှုန်းလောက် ဆောက်လုပ်ပြီးစီးပြီး ၁၅ ရာခိုင်နှုန်းလောက်တာ ကျန်တယ်။ အခုတော့ ဒီလိုဖြစ်လာတာ ခေါင်းရှုပ်တာပေါ့။ ၄ ပုံ ၁ ပုံမှာသာ ပြန်ယူလို့ရတယ် “ ဟု ၎င်းက ထပ်လောင်း ပြောသည်။
ထို့အပြင် မီးလောင်မှုကြောင့် ပျက်စီးသွားခဲ့သည့် ကျောင်းဆောင်များကို ပြန်လည်ပြုပြင်ရန် လက်ရှိမှာ ငွေရေးကြေးရေး အခက်ခဲရှိနေကြောင်း သိရသည်။
အလားတူ ဖေဖော်ဝါရီ ၁၃ ရက်တွင်လည်း သီပေါမြို့နယ် စံဖိတ်ကျေးရွာ ဘုန်းကြီးကျောင်း မီးလောင်မှု ဖြစ်ပွားခဲ့ရာ ကိုရင်တစ်ပါး မီးထဲပါသွားပြီး ပျံလွန်တော်သွားခဲ့ဖူးကြောင်း သိရသည်။
