သျှမ်းပြည် နောင်ချိုမြို့အဝင် အိုရီယမ်တယ်တိုးဂိတ်အနီးတွင် ကျပ်သိန်း ၁၂၀၀ တန်ဖိုးရှိ စိတ်ကြွဆေးပြားများကို သိမ်းဆည်းရမိကြောင်း သတင်းရရှိသည်။
ဇူလိုင် ၁၉ ရက် နံနက် ၈ နာရီခွဲတွင် နောင်ချိုမြို့အဝင် အိုရီယမ်တယ်တိုးဂိတ်အနီး ကွတ်ခိုင်မြို့ဘက်မှ မန္တလေးမြို့ဘက်သို့ သွားမည့် မော်တော်ကားတစ်စီးကို စစ်ဆေးရှာဖွေရာ ကာလပေါက်စျေး ကျပ်သိန်း ၁၂၀၀ တန်ဖိုးရှိ စိတ်ကြွရူးသွပ်ဆေးပြား၊ မြန်မာငွေကျပ် ၃ သိန်း နှင့် လက်ကိုင်ဖုန်း ၄ လုံး တို့ကို သိမ်းဆည်းရမိသည်။
အဆိုပါ စိတ်ကြွဆေးပြားကို သယ်ဆောင်လာသည့် ယာဥ်မောင် စိုင်းသန်းထွေးလေး နှင့် ယာဥ်နောက်လိုက်ပါသူ ကျော်ဇေယျ (ခ) ရွှေကူး တို့ကို လက်ရှိမှာ နောင်ချိုမြို့မရဲစခန်းတွင် မူးယစ်ဆေးဝါး နှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေအရ အမှုဖွင့် အရေးယူထားပြီး ကွင်းဆက်များကို ဖော်ထုတ်လျက်ရှိကြောင်း CCDAC က ဖော်ပြထားသည်။
အလားတူ ဇူလိုင် ၁၉ ရက် နေ့လည် ၁၁ နာရီခွဲတွင်လည်း တာချီလိတ်မြို့နယ် ဖန်မင်ကျေးရွာနေ ချိုင်းလုံ ငှားရမ်းနေထိုင်သည့် နေအိမ်ကို သက်ဆိုင်ရာမှ ဝင်ရောက်ရှာဖွေရာ ကာလပေါက်စျေး ကျပ်သိန်း ၁၃၅၂ သိန်းရှိ စိတ်ကြွဆေးကို ဖမ်းဆီးရမိခဲ့သည်။
ထိုသို့ သွားရောက်ဖမ်းဆီးချိန်တွင် အိမ်ငှားနေထိုင်သည့် ချိုင်းလုံကို မတွေ့ရှိရဘဲ မနန်ဆောင်ရစ်စကွန်မာလိထောင်း (၃၄) နှစ် ကို တွေ့ရှိကာ ဖမ်းဆီးခဲ့ပြီး ၎င်းကို ဟောင်လိတ်နယ်မြေရဲစခန်းတွင် မူးယစ်ဆေးဝါး နှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေအရ အမှုဖွင့် အရေးယူထားရှိပြီး ကွင်းဆက်များ ဖော်ထုတ်လျက်ရှိကြောင်း CCDAC က ရေးသားထားသည်။
