သျှမ်း – ကရင်နီ (ကယား) ပြည်နယ်စပ် သံတောင်ကြီးမြို့နယ် ယာဒိုကျေးရွာတွင် တိုက်ပွဲပြင်းထန် နေလျက်ရှိပြီး၊ ဒေသခံ ၂ ထောင်နီးပါး တောထဲသို့ ထွက်ပြေး တိမ်းရှောင်နေရကြောင်း စုံစမ်း သိရသည်။
ပြီးခဲ့သည့် ဇူလိုင်လ ပထမ အပတ်မှစ၍ ယာဒိုကျေးရွာအတွင်း စစ်ကြောင်းထိုးလာသော စစ်ကောင်စီတပ် နှင့် ပြည်သူ့ကာကွယ်ရေးတပ် PDF ပူးပေါင်းတပ်ဖွဲ့တို့ အကြား တိုက်ပွဲ စတင်ဖြစ်ပွားခဲ့ရာ တစ်ပတ်ကျော် ကြာပြီး ဖြစ်သော်လည်း တိုက်ပွဲသည် လက်ရှိ အချိန်ထိ ပြင်းထန်နေလျက်ရှိသည်။
ယမန်နေ့ ဇူလိုင် ၁၈ ရက် နံနက် ၅ နာရီဝန်းကျင်မှစပြီး တိုက်ပွဲ ပြင်းထန်နေလျက်ရှိသည့် ယာဒိုကျေးရွာကို စစ်ကောင်စီမှ တိုက်လေယာဉ်ဖြင့် ထပ်မံ ဗုံးကြဲတိုက်ခိုက်ခဲ့၍ အရပ်သား နေအိမ်များလည်း ထိခိုက်ပျက်စီးမှုများ ရှိခဲ့ကြောင်း ကရင်နီ ဒီမိုကရက်တစ်တပ်ဦး KDF မှ တာဝန်ခံ မစုစုက ပြောသည်။
“အဲ့မှာ တိုက်ပွဲဖြစ်တာကတော့ တစ်ပတ်ထဲ ရောက်နေပြီ။ တိုက်ပွဲပြင်းထန်တာတော့ ၄ – ၅ ရက်လောက်ရှိပြီ။ မနေ့ကတော့ ပိုဆိုးတာပေါ့။ လေကြောင်းတွေ နဲ့ မနားတမ်းကို ကြဲတာ။ ယာဒိုမှာက သူတို့ စစ်ကြောင်းထိုးလာတာလေ၊ ဒီဖက်ကို လာဖို့အတွက် စစ်ကြောင်းထိုးတာ။ စစ်ကြောင်းဝင်တာ PDF တွေက လက်မခံဘဲ ဖြတ်တိုက်တာပေါ့ “ ဟု မစုစုက ပြောသည်။
အဆိုပါ တိုက်ပွဲပြင်းထန်မှုကြောင့် ယာဒိုကျေးရွာ နှင့် သောခိုကျေးရွာရှိ ပြည်သူဦးရေ နှစ်ထောင်နီးပါး ရှိကာ ရွာလုံးကျွတ် ထွက်ပြေးတိမ်းရှောင်နေရကြောင်း သိရသည်။
လက်ရှိ နေရပ်စွန့်ပြီး ထွက်ပြေးတိမ်းရှောင်နေရသည့် စစ်ဘေးရှောင်များသည် ကြိုတင်ပြင်ဆင်နိုင်ခြင်း မရှိသောကြောင့် စားနပ်ရိက္ခာ၊ မိုးကာ နှင့် ဆေးဝါး အရေးပေါ် လိုအပ်နေကြောင်း သိရသည်။
“အဲ့ဖက်ရွာကျောတွေမှာ အခုက အကုန်လုံး ဖြစ်နေတော့ ရှောင်နေရာလည်း သိပ်မရှိတော့ဘူး။ စစ်ရှောင်တွေ အနေ နဲ့ အခု လောလောလပ်လပ်မှာ အရမ်းကြီးကို အခက်ခဲ ဖြစ်နေတဲ့ အနေအထား။ အခုက မိုးတွင်းကာလကြီး ဖြစ်နေတာလေ။ ကြိုတင် ပြင်ဆင်ထားတာလည်း ဘာမှမရှိဘူး။ တချို့ ရွာတွေမှာတော့ စစ်မီး တောက်လောင် လာလို့ရှိရင် မိုးကာတွေ ဘာတွေ စုဆောင်းပြီး ကြိုတင်ပြင်ဆင် ထားတာရှိတယ်။ အခု လောလောဆယ် ရှောင်နေရတဲ့ရွာတွေတော့ ဘာမှကို မရှိတဲ့အတွက် တောထဲမှာ ဒီအတိုင်း ဝင်နေရတဲ့ အနေအထားမျိုး ဖြစ်နေတယ် “ ဟု မစုစုက ထပ်လောင်းပြောသည်။
အလားတူ တိုက်ပွဲပြင်းထန်စွာ ဖြစ်ပွားနေသည့် နယ်မြေဒေသ နှင့် ကျေးရွာများ၌ ပိတ်မိနေသည့် ပြည်သူများ ရှိနေပြီး စစ်ဘေးရှောင် ကူညီရေးများ ဝင်ရောက် ကယ်ထုတ်နေဆဲဖြစ်ကြောင်း သိရသည်။
