သျှမ်းပြည် လားရှိုးမြို့ မြို့မဈေးအတွင်း ယနေ့ (ဇူလိုင် ၁၅) ရက် နံနက် ၈ နာရီဝန်းကျင်တွင် ဗုံးပေါက်ကွဲမှု ဖြစ်ပြီး ထိခိုက်ဒဏ်ရာ ရသူများ ရှိကြောင်း စုံစမ်းသိရသည်။
ယနေ့ (ဇူလိုင် ၁၅) ရက် နံနက်၈ နာရီဝန်းကျင်တွင် လားရှိုးမြို့ မြို့မဈေးအတွင်းရှိ ဇွဲထက်ရွှေဆိုင်၌ ဗုံးပေါက်ကွဲမှုဖြစ်ပြီး ဆိုင်ဝန်ထမ်းများ ထိခိုက်ဒဏ်ရာ ရရှိခဲ့ကြောင်း လားရှိုးမြို့ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“မြို့မဈေး ဇွဲထက်ရွှေဆိုင်မှာ ဗုံးပေါက်တာ။ သူတို့ ဆိုင်ရှေ့က ပေါက်ကွဲတာလို့ပဲ ပြောတယ်။ လူတွေတောင် သိပ်မရှိသေးဘူး။ ထိခိုက်ဒဏ်ရာ ရသူ ဝန်ထမ်းတွေတော့ ရှိတယ်။ ကားနဲ့လာတင်ခေါ်သွားတာ “ ဟု ၎င်းအမျိုးသမီးတစ်ဦးက ပြောသည်။
အဆိုပါ ဗုံးပေါက်ကွဲမှုကြောင့် မြို့မဈေးအတွင်းရှိ ဇွဲထက်ရွှေဆိုင် ရှေ့ ရပ်ထားသည့် ဆိုင်ကယ်တစ်စီးလည်း မီးလောင် ပျက်စီးသွားခဲ့ပြီး ပျက်စီးဆုံးရှုံးမှု အသေးစိတ်ကိုတော့ ဆက်လက်စုံစမ်းနေကြောင်း သိရသည်။
ထို့အပြင် ပြီးခဲ့သည့် ဇွန်လတွင်လည်း လားရှိုးမြို့ရှိ Fully Light Hotel မှ ဗုံးပေါက်ကွဲမှု နှစ်ကြိမ်၊ Golden Hill Hotel တွင် ဗုံးပေါက်ကွဲမှု တစ်ကြိမ် နှင့် အသောက စက်သုံးဆီပန့် ဆီဆိုင်တွင် ပေါက်ကွဲမှုတစ်ကြိမ် ဖြစ်ပွားခဲ့သည်။
Leave a Comments