သျှမ်းပြည် ကျောက်မဲခရိုင်၊ သီပေါမြို့နယ်တွင် လက်နက်ကိုင် တပ်ဖွဲ့များကို အခွန်ပေးဆောင်ပြီး လောင်းကစားဝိုင်း ဖွင့်လှစ်နေသည့် အကြောင်း စုံစမ်းသိရသည်။

ပြီးခဲ့သည့် ဇူလိုင်လ ပထမပတ်မှ စတင်ပြီး ယနေ့ အချိန်အထိ သီပေါမြို့နယ် ပတိမ်တောင်ရပ်ကွက်တွင် လောင်းကစားဝိုင်းများသည် လက်နက်ကိုင် တပ်ဖွဲ့များထံ အခွန်ပေးဆောင်ပြီး ဖွင့်လှစ်နေလျက်ရှိကြောင်း ဒေသခံများက သျှမ်းသံတာ်ဆင့်ကို ပြောသည်။

“ရပ်ကွက်အတွင်းမှာ လောင်းကစားဝိုင်း နေ့တိုင်းရှိနေတာကို မမြင်ချင်တဲ့ ရက်ရှည်မဖွင့်ဖို့ ဘာညာ တချို့က သွားပြောတာပေါ့၊ ဒါပေမဲ့ သူတို့က တိုင်းရင်းသား လက်နက်ကိုင်တွေဆီလည်း အခွန်ဆောင်ပြီးပြီ၊ ရဲရော စရဖရော လာဆော့နေကြတာ၊ ဘာမှ မဖြစ်ဘူးတဲ့၊ အဲ့ကြောင့် ရပ်ကွက်သူ/သားတွေတော့ စိတ်ဆင်းရဲနေရတယ်” ဟု လုံခြုံရေး အရ အမည်မဖော်လိုသူ အသက် ၄၀ ကျော် အမျိုးသား တစ်ဦးက သျှမ်းသံတော်ဆင့်ကို ပြောသည်။

အဆိုပါ လောင်းကစားဝိုင်းပိုင်ရှင်သည် မည်သူဖြစ်ကြောင်း မသိရသော်လည်း ပိုင်ရှင်ဖြစ်သူက တအာင်း (ပလောင်) အမျိုးသား လွတ်မြောက်ရေးတပ်ဖွဲ့ TNLA ၊ ရှမ်းပြည်တိုးတက်ရေးပါတီ၊ ရှမ်းပြည် တပ်မတော် (SSPP/SSA) တို့ နှင့် ဒေသအတွင်းက အာဏာပိုင်များထံ အခွန် ပေးဆောင်ပြီး ဖွင့်လှစ်ထားခြင်း ဖြစ်ကြောင်း ဒေသခံများက ပြောသည်။

ယင်းလောင်းကစားဝိုင်းသည် နေ့ရော ညပါ ဖွင့်လှစ်ထားသည့် အတွက် အနီးပတ်ဝန်းကျင်ရှိ ဒေသခံများအတွက် အနှောင့်အယှက် ဖြစ်သည့် အပြင် လုံခြုံရေးအတွက်လည်း စိုးရိမ်ရကြောင်း အထက်ပါ အမျိုးသားက ဆက်ပြောသည်။

“နေ့ရော ညရော ဖွင့်ကြတာ၊ အသံတွေ ဆူညံတော့ အိပ်ရေးပျက်ရတယ်။ ပြီးတော့ လောင်းကစားဝိုင်းရှိရင် လူဆိုး သူခိုးတွေလည်း ရှိတတ်တော့ အိမ်ကို သူခိုးတက်မလား။ ဓားပြတိုက်မလား ဆိုတာမျိုးတွေ တွေးပူရတယ်၊ အမျိုးသား မရှိတဲ့ အိမ်တွေဆို ပိုဆိုးတာပေါ့။ အသက်ကြီးတဲ့ သူ တစ်ယောက်တည်းနဲ့လည်း အိမ်စောင့် မထားရဲဘူး” ဟု ၎င်းက ဆက်ဆိုထားသည်။

တအာင်းတပ်ဖွဲ့ TNLA နှင့် ရှမ်းပြည်တိုးတက်ရေး တပ်မတော် SSPP တို့သည် လောင်းကစားဝိုင်းများ ဖွင့်လှစ်ခြင်းကို တားမြစ်ကြောင်း ထုတ်ပြန်ပြောဆိုထားသော်လည်း လက်ရှိ ရပ်ကွက်အတွင်း ပေါ်တင်ဖွင့်လှစ် နေကြသည့် လောင်းကစားဝိုင်းကို အရေးယူဆောင်ရွက်ခြင်း မရှိကြောင်း ဒေသခံများ ဆက်ပြောသည်။

ပြီးခဲ့သည့် မတ်လ ၂၂ ရက်တွင် SSPP ၏ သတင်းစာမျက်နှာဖြစ်သည့် SSPP Info သတင်းစာမျက်မှ တဆင့် ၎င်းတို့ ထိန်းချုပ်သည့် နယ်မြေအတွင်း လောင်းကစားဝိုင်း ဖွင့်လှစ်ပါက ပိုင်ဆိုင်မှု သိမ်းဆည်းပြီး ဥပဒေအတိုင်း အရေးယူသွားမည်ဟုလည်း ထုတ်ပြန်ထားသည်။

ယင်းကဲ့သို့ ရပ်ကွက်အတွင်း လောင်းကစားဝိုင်းများ ပေါ်တင်ဖွင့်လှစ်ခွင့် ရရှိနေခြင်း နှင့် ပတ်သက်ပြီး မေးမြန်းရန် အတွက် (ပလောင်) အမျိုးသား လွတ်မြောရေးတပ်မတော် TNLA နှင့် ရှမ်းပြည် တိုးတက်ရေးပါတီ၊ ရှမ်းပြည် တပ်မတော် (SSPP/SSA) တို့၏ တာဝန်ရှိ ပြောရေးဆိုခွင့် အသီးသီးထံသို့ ဖုန်းဆက်သွယ်သော်လည်း ဖုန်းလက်ခံ ဖြေကြားခြင်း မရှိပေ။