သျှမ်းပြည် မူဆယ်မြို့ စက်မှုဇုံနယ်မြေရှိ ထွယ်ပန်းခြံအကျော် အနီးနေထိုင်သည့် နေအိမ်တစ်လုံးထဲ၌ အမျိုးသမီးတစ်ဦး ရိုက်ခံရပြီး သေဆုံးသွားခဲ့ကြောင်း စုံစမ်းသိရသည်။

ယမန်နေ့ (ဇူလိုင် ၁၂) ရက် ညနေပိုင်း ၆ နာရီဝန်းကျင်တွင် မူဆယ်မြို့ စက်မှုဇုံနယ်မြေရှိ ထွယ်ပန်းခြံအကျော် အနီးနေထိုင်သည့် နေအိမ်တစ်လုံးထဲ၌ အသက် ၃၀ နှစ်အရွယ် အမျိုးသမီးတစ်ဦးသည် ဦးခေါင်းအရိုက်ခံရပြီး သေဆုံးသွားခဲ့ကြောင်း ၎င်းကို သွားရောက်ကူညီခဲ့သည့် နှလုံးလှလူမှုကူညီရေးအသင်းမှ သိရသည်။

“ သူ့ရဲ့ မိဘက ရဲကို အကြောင်းကြားပြီး ရဲကမှ ကျနော်တို့ကို အကြောင်းကြားလို့ သွားသယ်တာပါ။ ဒဏ်ရာက ဦးခေါင်းမှာပဲ ရိုက်ခံထားရတာ တွေ့တယ်။ အဲ့နားမှာက လက်ကိုင်နဲ့ ပါတဲ့ သံပိုက်တစ်ခု ပိန်နေတာလည်း တွေ့ရတယ်။ အဲ့ဒါနဲ့ ရိုက်သွားတာလို့ပဲ ထင်တယ်“ ဟု လူမှုကူညီရေးအသင်းမှ တာဝန်ခံတစ်ဦးက ပြောသည်။

အဆိုပါ ရိုက်နှိက်ခံရသည့် အမျိုးသမီးတစ်ဦးကို နှလုံးလှ လူမူကူညီရေးအသင်းမှ သွားရောက်ကူညီပေးခဲ့ပြီး မူဆယ်မြို့နယ် ပြည်သူ့ဆေးရုံကြီးသို့ ပို့ဆောင်ပေးခဲ့ရကြောင်း သိရသည်။

ထိုအမှုနှင့်ပတ်သက်ပြီး သံသယရှိသူ ၎င်းအမျိုးသမီး၏ ခင်ပွန်းကိုလည်း ရဲတပ်ဖွဲ့မှ ဖမ်းဆီးခေါ်ဆောင်သွားပြီး စစ်ဆေးခြင်း ပြုလုပ်နေကြောင်း သိရသည်။

“အခုချိန်မှာတော့ ကိုယ့်သတိ ၀ိရီယ နဲ့ သွားလာလှုပ်ရှားရမှာပေါ့။ ဒီလို ညကြီးညအခါ ထွက်ရင် အဲ့လိုမျိုး သီးသန့်တစ်ယောက်တည်း ထွက်ရမယ်ဆိုရင် မသွားနဲ့ပေါ့။ အဖော်ခေါ်ပြီးမှ သွားကြဖို့၊ အဖော်မပါဘဲ တစ်ယောက်တည်း မသွားနဲ့ပေါ့။ မသွားသင့်တဲ့နေရာ၊ လူပြတ်တဲ့နေရာသို့ဆို မသွားတာ အကောင်းဆုံးပဲ။ အခုက ဆိုင်ကယ်အသစ်လေးစီးပြီဆိုရင် ဆိုင်ကယ်လုခံနေရတာ “ ဟု မူဆယ်မြို့ ဒေသခံတစ်ဦးက ထပ်လောင်းပြောသည်။

စစ်တပ်က အာဏာသိမ်းပြီးနောက်ပိုင်း သျှမ်းပြည်တွင် ခိုးဆိုးလုယက်၊ သူခိုး၊ ဓားပြတိုက်သူ များလာနေသလို မူဆယ်မြို့အပြင် လားရှိုးမြို့တွင်လည်း တစ်လအတွင်း ဓားခုတ်မှု၊ ရိုက်နှိက်မှုကြောင့် ပြည်သူ ၂ ဦး ထိခိုက်ဒဏ်ရာရရှိနေကြောင်း သိရသည်။