သျှမ်းပြည် အရှေ့ပိုင်း မိုင်းပေါက်မြို့တွင် အလုပ်သွားလုပ်နေသည့် အသက် (၂၀) ဝန်းကျင်အရွယ် အမျိုးသမီးနှစ်ဦး ၃ လကျော်ကြာ ပျောက်ဆုံးနေကြောင်း သိရသည်။
အဆိုပါ အမျိုးသမီးနှစ်ဦးသည် မိုင်းပေါက်မြို့တွင် အိမ်ဖော်အလုပ်ကို ၂၀၂၅ခုနစ် သြဂုတ် လမှ စတင်လုပ်ဆောင်ခဲ့ပြီး ၃ လကျော်ကြာ အလုပ်လုပ်ခဲ့ရာ ၂၀၂၅ ခုနှစ် (နိုဝင်ဘာလ ၂၉ ရက်)မှစပြီး အဆက်အသွယ်ပျက်ကာ ယနေ့အချိန်ထိ ပျောက်ဆုံးနေကြောင်း နီးစပ်သည့်အမျိုးသမီး တစ်ဉီးက သျှမ်းသံတော်ဆင့်ကိုပြောသည်။
“ကျမကို အကူအညီတောင်းလို့ အလုပ်ရှာပေးတာ။ သူအလုပ်လုပ်တာ ၃ လလောက် လုပ်တယ်။ ပြီးတော့သူဌေးမက မောင်းထုတ်တာလို့အလုပ်ထွက်ပြီး ပျောက်သွားတာ။ ၃လ ကျော်လောက်ရှိပြီ။ အဆက်သွယ်လည်း မရဘူး။ ပြီးခဲ့တဲ့ ၁၁ လပိုင်းကတည်းက ပျောက်နေတာ။ နှစ်ယောက် ပျောက်သွားတာတစ်ယောက်ကတော့ သူ့ သူငယ်ချင်း”ဟု ၎င်းကပြောသည်။
လက်ရှိ ပျောက်ဆုံးနေသည့် အမျိုးသမီးသည် လားရှိုးမြို့နယ်တွင် နေထိုင်သူ အသက် ၁၉နှစ်အရွယ် နန်းအေယိင်း (နှင့် ၎င်း၏ သူငယ်ချင်းဖြစ်သည် အသက် (၂၀)အရွယ်ရှိ အင်းအင်း တိုဖြစ်သည်။
၎င်းတို့အလုပ်သွားလုပ်သည့်နေရာသည် “ဝ” အမျိုးသားသွေးစည်းညီညွတ်ရေး တပ်ဖွဲ့ “UWSA” ထိန်းချုပ်သည့် နယ်မြေဖြစ်သည်။
စစ်တပ် အာဏာသိမ်းပြီးနောက် မြန်မာနိုင်ငံအတွင်းရှိ လူငယ်များသည် ကျောင်းမတက်ရခြင်း၊ အလုပ်အကိုင်မရှိခြင်းကြောင့် နယ်စပ်ဒေသဖြစ်သည့် မူဆယ်၊ တာချီလိတ်နှင့် မိုင်းပေါက်မြို့ စသည့်မြို့များသို့ သွားရောက်အလုပ်လုပ်ကြသည်။
ထိုဒေသတွင်းမကြာခဏ လူကုန်ကူးခံရခြင်း၊ အွန်လိုင်းလောင်းကစား(ကျားဖြန့်)စသည့်နေရာသို့ အလိုတူတမျိုး အလိုမတူတမျိုး သွပ်သွင်းခံရသည့် အဖြစ်အပျက်များလည်း ရှိသည်။
လွန်ခဲ့သည့် ၂၀၂၃ခုနစ်တွင်လည်း အသက်မပြည့်သေးသည့် တန့်ယန်းမြို့မှ ကလေးငယ် (၃)ဉီး ကို မိုင်းပေါက်မြို့ထိ မြူဆွယ်ခေါ်ဆောင်သွားသည့် ဖြစ်စဥ်ရှိသကဲ့သို့ မိုင်းပေါက်မြို့ရှိ ဇီကျင့်ကုမ္ပဏီထံ သွားရောက်အလုပ်လုပ်သည့် ဇနီးမောင်နှံအပါအဝင် လူငယ် ၁၁ ဉီးလည်း လိမ်လည်ခံရပြီး အခန်းကျဉ်းထဲ ပိတ်လှောင်ခံရသည့် ဖြစ်စဉ်များလည်းရှိခဲ့ဖူးသည်။
Leave a Comments