သျှမ်းပြည် တောင်ကြီးမြို့တွင် နေအိမ်မှ ဆိုင်ကယ်ဖြင့် အပြင်သွားရာက ၆ ရက်ကြာ ပျောက်ဆုံးခဲ့သည့် အထက်တန်း ကျောင်းသား ရုပ်အလောင်းသာ ပြန်တွေ့၍ တုန်လှုပ်ရကြောင်း မြို့ခံများက ယနေ့ ဒီဇင်ဘာလ ၃၁ ရက်တွင် ပြောသည်။

တောင်ကြီးမြို့၊ ဘုရားဖြူရပ်ကွက်နေ၊ အထက (၄) တွင် Grade – 10 တက်ရောက်နေသည့် အသက် (၁၆)နှစ်အရွယ် မောင်အနဂ္ဂရဲထက် သည် ဒီဇင်ဘာလ ၂၄ ရက်နေ့၊ ညနေပိုင်း နေအိမ်မှ ဆိုင်ကယ်ဖြင့် ထွက်သွားပြီးနောက် ပျောက်ဆုံးခဲ့ခြင်း ဖြစ်သည်။

“မနေ့က (ဒီဇင်ဘာလ ၃၀ ရက်) ဘုရားဖြူ အပေါ်ဂျောက်ထဲ အလောင်း ပြန်တွ့တယ်။ ဆိုင်ကယ် အလုခံရတာလား ဘာလား ဆိုတာကတော့ မပြောတတ်ဘူး။ နာရေး ဖြစ်နေတော့ မ‌ပြောတတ်သေးဘူး” ဟု မိသားစုနှင့် နီးစပ်သူ တဦးက ဆိုသည်။

ရုပ်အလောင်းသာ တွေ့ရပြီး ဆိုင်ကယ် မတွေ့ရသဖြင့် လူသတ်၍ ဆိုင်ကယ် လုယက်မှု ဖြစ်နိုင်သဖြင့် တုန်လှုပ်ရကြောင်း မြို့ခံများက မှတ်ချက်ပြုသည်။

မောင်အနဂ္ဂရဲထက် ၏ နာရေးကို ယနေ့ ဒီဇင်ဘာလ ၃၁ ရက် နေ့လယ်ပိုင်းတွင် တောင်ကြီးမြို့၊ သင်္ခါရ သုသာန်၌ ပြုလုပ်မည်ဟု မိသားစုဝင်များက အသိပေးထားသည်။

စစ်ကောင်စီနှင့် ပအိုဝ်း ပြည်သူ့စစ် ကြီးစိုးရာ တောင်ကြီးမြို့ပေါ်တွင် လက်ရှိ တရားဥပဒေ စိုးမိုးမှု ကင်းမဲ့နေပြီး ခိုးမှု၊ လုယက်မှုများ နေ့စဥ် ဖြစ်ပေါ်နေသည်ဟု မြို့ခံများက ဆိုသည်။

ယမန်နှစ် ၂၀၂၄ သြဂုတ်လ ၂၆ ရက် ကလည်း တောင်ကြီးမြို့မှ PNO ပြည်သူ့စစ် ထိန်းချုပ်ရာ ဟိုပုံးမြို့နယ် အတွင်း ခရီးသွားရာ မိုင်းပျဉ်းကျေးရွာအုပ်စု ဖာလိုင်းရွာ အနီးတဝိုက်တွင် အမျိုးသား လူငယ် နှစ်ဦး ပျောက်ဆုံးခဲ့ရာ တစ်နှစ်ကျော်ကြာပျောက်ဆုံးခဲ့ရာ ၂၀၂၅ခုနစ် နှစ်နှောင်းပိုင်းတွင် သေဆုံးသည့် ရုပ်အလောင်းကို ပြန်တွေ့ခဲ့သည်။

အဆိုပါ ပျောက်ဆုံးသေဆုံးသွားသည် လူငယ်နှစ်ဦးသည် သိန္နီမြို့ဒေသခံနှင့် ကျောက်မဲမြို့ဒေသခံ အသက် ၂၅ နှစ်ဝန်းကျင်ရှိ စိုင်းတုမ်လိန်ခမ်းနှင့် အသက် ၃၀ နှစ်ဝန်းကျင်ရှိ စိုင်းကျော်မြင့် ဖြစ်ကြောင်း သိရသည်။