သျှမ်းပြည် လားရှိုးမြို့ပေါ်ရှိ ဟိုတယ် နှင့် ဘား (Bar)များ ဦးတည်ပြီး ဗုံးထောင်မှု မကြာခဏ ဖြစ်လာကြောင်း ဒေသခံများ ပြောပြချက်အရ သိရသည်။
အဆိုပါ လားရှိုးမြို့ပေါ်ရှိ ဟိုတယ် နှင့် ဘား (Bar) များထံ လက်နက်ကိုင်တပ်ဖွဲ့မှ အခွန် (ဆက်ကြေး) ကောက်ယူမှုကို မပေးဆောင်သဖြင့် ဗုံးလာရောက်ထောင်ပြီး ခြိမ်းခြောက်မှုမျိုး ဖြစ်နိုင်ကြောင်း ဒေသခံများက သုံးသပ်ပြောဆိုကြသည်။
ပြီးခဲ့သည့် ဇွန်လ အတွင်းမှ စတင်ကာ လားရှိုးမြို့နယ်အတွင်း ဗုံးပေါက်ကွဲမှုများသည် ခပ်စိပ်စိပ် ဖြစ်ပွားလာပြီး ယမန်နေ့ ဇူလိုင်လ ၁၂ ရက်နေ့ ညတွင်လည်း လားရှိုးမြို့၊ (၁၂) ရပ်ကွက်မှ မန်ဆူက KFC လမ်းကြား၌ ဗုံးပေါက်ကွဲမှု ထပ်မံ ဖြစ်ပွားခဲ့သည်။
“မနေ့က ၈ နာရီဝန်းကျင်မှာ ဗုံးပေါက်ကွဲမှုဖြစ်တာ၊ ပေါက်ကွဲမှု အသံနှစ်ချက် ကြားရတယ်၊ မန်ဆူနားက KFC လမ်းကြားမှာ ပေါက်ကွဲမှုဖြစ်တာ၊ ထိခိုက်ပျက်စီးမှုတော့ မရှိဘူး” ဟု လားရှိုးမြို့ ဒေသခံ အသက် ၂၅ နှစ် ဝန်းကျင် အမျိုးသား တစ်ဦးက သျှမ်းသံတော်ဆင့်ကို ပြောသည်။
အဆိုပါ ဗုံးပေါက်ကွဲမှုဖြစ်စဥ်ကို ကြည့်ခြင်းအားဖြင့် ဟိုတယ် နှင့် Bar (ဘား) များတွင်သာ ဖြစ်နေပြီး အခြားနေရာတွင် လာရောက်ပေါက်ကွဲမှု မဖြစ်သဖြင့် လက်နက်ကိုင်တပ်ဖွဲ့ တစ်ခုမှ အခွန်မဆောင်မှုကို ခြိမ်းခြောက်သည့်အနေဖြင့် လုပ်ခြင်းဖြစ်ကြောင်း ဖြစ်စဥ်ကို သိနေသည့် သူတစ်ဦးက ပြောပြသည်။
“လက်နက်ကိုင် အဖွဲ့အစည်းတစ်ခုက အခွန်ဆောင်ဖို့ အကြောင်းကြားလာတာတဲ့၊ ကျနော်တို့လည်း အသေးစိတ် မသိရဘူး၊ တောင်းတဲ့ ပမာဏကလည်း များတယ်၊ ပိုင်ရှင်တွေကလည်း ဘယ်အဖွဲ့အစည်းက တောင်းမှန်း မသိတော့ အကြောင်းမပြန်ဘူးပေါ့၊ အဲ့ကြောင့် ခြိမ်းခြောက်တဲ့ အနေနဲ့ မနေ့က ဗုံးဖောက်ခွဲတာ ထင်တယ်” ဟု အဆိုပါ ဗုံးပေါက်ကွဲမှု အနီး နေထိုင်သည့် အသက် ၅၀ ကျော် အမျိုးသားက သျှမ်းသံတော်ဆင့်ကို ပြောသည်။
ပြီးခဲ့သည့် ဇွန်လ အတွင်းမှာလည်း လားရှိုးမြို့ရှိ Fully Light Hotel မှ ဗုံးပေါက်ကွဲမှု နှစ်ကြိမ်၊ Golden Hill Hotel တွင် ဗုံးပေါက်ကွဲ မှု တစ်ကြိမ် နှင့် အသောက စက်သုံးဆီ ပန့်ဆီဆိုင်တွင် ပေါက်ကွဲတစ်ကြိမ် ဖြစ်ပွားခဲ့သည်။
ယခု ဇူလိုင်လအတွင်း ဗုံးပေါက်မှု အနေဖြင့် KFC လမ်းကြားပေါက်ကွဲမှုက ပထမဆုံးအကြိမ် ဖြစ်နေပြီး အဆိုပါ ပေါက်ကွဲမှုများသည် မည်သည့်လက်နက်ကိုင် တပ်ဖွဲ့မှ လုပ်ဆောင်သည်ကိုလည်း မသိရသေးသလို စစ်ကောင်စီ မှလည်း စစ်ဆေးမှု လုပ်နေသေးကြောင်းသာ အကြောင်းပြန်သည်ဟု ၎င်း အမျိုးသားက ဆက်ပြောသည်။
“ရဲတွေ ၊ တပ်တွေကို သွားမေးရင်လည်း စုံစမ်းစစ်ဆေးဆဲပါ လို့ပဲ ဖြေတာ၊ ဘယ်လို အခြေအနေရောက်ပြီလဲ၊ လုပ်တဲ့သူတွေကို သိရပြီလား ဆိုတာတွေ ဘာမှမပြောဘူး။ ဖမ်းမိတာလည်း တခါမှ မကြားမိဘူး၊ အဲ့ကြောင့် ပြည်သူတွေကို ဘယ်သူ့ကို အားကိုးလို့ ရမှန်း မသိတော့ဘူး” ဟု အထက်ပါ အသက် ၅၀ ဝန်းကျင် အမျိုးသားက ဆက်ပြောသည်။
လားရှိုးမြို့နယ်အတွင်း လှုပ်ရှားသည့် လက်နက်ကိုင်တပ်ဖွဲ့များ အနေဖြင့် အာဏာသိမ်း စစ်ကောင်စီ တပ်ဖွဲ့ အပြင် တိုင်းရင်းသားလက်နက်ကိုင် တပ်ဖွဲ့များ ဖြစ်ကြသည့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် SSPP/SSA ၊ ကိုးကန့်တပ်ဖွဲ့ MNDAA နှင့် တအာင်း (ပလောင်) အမျိုးသားလွတ်မြောက်ရေးတပ်မတော် TNLA တို့က သွားလာလှုပ်ရှား နေလျက်ရှိကြောင်း သိရသည်။
စစ်ကောင်စီမှ နိုင်ငံတော် အာဏာသိမ်းယူပြီး နောက်ပိုင်းတွင် သျှမ်းပြည်အတွင်း လှုပ်ရှားသည့် လက်နက်ကိုင် တပ်ဖွဲ့များသည် အခွန်တိုးကောက်ခြင်း၊ ပိုက်ဆံတောင်းခြင်း၊ ဆက်ကြေးတောင်း ပမဏ တိုးမြှင့်ခြင်း နှင့် အချင်းချင်းကြား ပစ်ခတ်သတ်ဖြတ်မှုများလည်း မကြာခဏ ဖြစ်ပွားလေ့ရှိသည်။
ယင်းကဲ့သို့ အခြေအနေများကြောင့် ဒေသအတွင်း မငြိမ်မသက်မှုများ ဖြစ်ပေါ်လာပြီး ဒေသခံများကလည်း လုံခြုံရေး ကင်းမဲ့နေသလို ခံစားရကြောင်း ပြောဆို ညည်းတွားနေကြသည်။
