သျှမ်းပြည် မူဆယ်ခရိုင် ၊ ၁၀၅ မိုင် နယ်စပ်ကုန်သွယ်ရေးဇုန်မှာ အခွန်လာကောက်သည့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တပ်ဖွဲ့ နှင့် အာဏာသိမ်း စစ်ကောင်စီ တပ်ဖွဲ့တို့သည် ယနေ့ (ဇူလိုင် ၁၁) ရက် နံနက်ပိုင်းတွင် ထိတွေ့တိုက်ပွဲ ဖြစ်ပွားခဲ့ကြောင်း စုံစမ်းသိရသည်။
ဖြစ်စဥ်မှာ ယနေ့ (ဇူလိုင် ၁၁) ရက် နံနက်ပိုင်းတွင် အရပ်ကားဖြင့် သေနတ်ကိုင်ဆောင်သည့် TNLA တပ်ဖွဲ့ သည် မူဆယ်မြို့နယ် ကုန်သွယ်ရေးဇုန် ၁၀၅ မိုင်၊ နမ့်တောင်းကျေးရွာအနီးတွင် အခွန်ကောက်နေစဥ်၊ စစ်ကောင်စီမှ ဝင်ရောက်ပစ်ခတ်ပြီး TNLA မှ တပ်သား တစ်ဦး ထိမှန် ကျဆုံးသွားကြောင်း မျက်မြင်တွေ့ရှိသူ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“TNLA တို့က ကားတစ်စီး နဲ့ အခွန်ကောက် ရောက်လာတာပါ၊ ကြိုတင်အကြောင်းကြားမှု မရှိလို့ဘဲ ထင်တယ်၊ ဟိုဘက်က လှမ်း မြင်တာနဲ့ ပစ်တာ၊ TNLA ဘက်က တစ်ယောက်ကျသွားတယ်၊ စစ်ကောင်စီဘက်ကလည်း ထိခိုက်ကျဆုံး မှုတော့ ရှိမှာ၊ အတိအကျတော့ မသိရဘူး” ဟု လုံခြုံရေး အရ အမည်မဖော်လိုသည့် ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
ယင်းပစ်ခတ်မှုသည် ၁၀ မိနစ်နီးပါး ကြာမြင့်ပြီး နှစ်ဖက် ကျဆုံးမှုများ၏ အရေအတွက်ကို တိတိကျကျ မသိရသေးကြောင်း ဒေသခံများက သျှမ်းသံတော်ဆင့်ကိုပြောသည်။
ထို့အပြင် ယမန်နေ့ ဇူလိုင်လ ၁၀ ရက်နေ့ မနက်ပိုင်းတွင်လည်း ကျောက်မဲခရိုင်၊ မိုင်းငေါ့ (မြို့နယ်ခွဲ) အနီး နမ့်တွေ ကျေးရွာအနီးတွင် စစ်ကောင်စီတပ်ဖွဲ့ နှင့် TNLA တို့ ထိတွေ့ပစ်ခတ်မှု ဖြစ်ပွားခဲ့သည်။
“မိုင်းငေါ့ကနေ နမ့်တွေကျေးရွာဘက် စစ်ကြောင်း တက်သွားတဲ့ စစ်ကောင်စီ တပ်ဖွဲ့က နမ့်တွေ ရွာအနီး စခန်း ချတဲ့ TNLA နဲ့ ထိတွေ့မှုဖြစ်ပြီး ပစ်ကြတာ၊ မိုင်းငေါ့က ရန်ကင်းတောင်ကနေ လက်နက်ကြီးနဲ့လည်း လှမ်းပစ်တယ်၊ ထိခိုက်ကျဆုံးမှုကတော့ မသိရဘူး” ဟု မိုင်းငေါ့ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ယင်းကဲ့သို့ စစ်ကောင်စီတပ်ဖွဲ့ နှင့် TNLA တပ်ဖွဲ့တို့ အကြား ထိတွေ့တိုက်ပွဲ ဖြစ်ပွားခြင်း နှင့် ပတ်သက်ပြီး TNLA တပ်ဖွဲ့၏ ပြောရေးဆိုခွင့်ထံသို့ တယ်လီဖုန်းဖြင့် အကြိမ်ကြိမ် ဆက်သွယ်မေးမြန်းသော်လည်း ဖုန်းလက်ခံ ဖြေကြားခြင်း မရှိပါ။
အာဏာသိမ်း စစ်ကောင်စီ တပ်ဖွဲ့သည် ၂၀၂၃ ဒီဇင်ဘာ ၃၁ ရက်ထိ တစ်နှစ်ကြာ အပစ်ရပ် ကြေညာထားသော်လည်း လက်ရှိမြေပြင်တွင် တိုင်းရင်းသားလက်နက်ကိုင်တပ်ဖွဲ့များ၏ တပ်ရင်း၊ ဌာနချုပ်များကို ဗုံးကြဲတိုက်ခိုက်ခြင်း၊ စစ်ကြောင်းထိုး တိုက်ခိုက်ခြင်းတို့ အဆက်မပြတ် ပြုလုပ်လာသည်ကို တွေ့ရသည်။
Leave a Comments